Главная » Статьи » Коми-Пермяцкий округ

Коми-пермяккез: Информация на коми-пермяцком языке

ПГУ-ись профессор, историческöй наукаэз сьöртi
доктор Г. Н. Чагин

Молодцовский шрифтКоми-пермяккез – увтыр, кöда важ кадсянь олö Пермскöй крайын. Ассис вуж сiя босьтö ломоватовскöй да родановскöй культура йöзсянь, кöда олiс VII-XV веккезын Кама кытшын.

1462 воö Чердыньын – Пермь Великöй юркарын – коми-пермяккез вöлiсö пыртöмöсь христианствоö. 1472 воö пырисö Роч государство пытшкö. 1925 воö Россияын медодззаись вöлi аркмöтöм Коми-Пермяцкöй национальнöй (1977 восянь 2005 воöдз автономнöй) округ. Öння кадö коми-пермяккез олöны Пермскöй крайын.

2002 вося перепись сьöртi Пермскöй крайын олicö 103,5 сюрс коми-пермяк, ны коласiсь 80,3 сюрс морт Коми-Пермяцкöй округын (59%).

Асьнысö коми-пермяккез важынсянь шувлiсö пермяк, пермич, пермян. Быдöс этна ниммез аркмöнны пермь кывсянь, кöда сюрс вося унажык ни пантасьлö гижан формаын. Учёнöйез чайтöны, что пермь кыв аркмиc вепссэз (отир, кöда олöны Заонежьеын) кылын. А Уралöдз сiйö вермисö вайны Новгородiсь олiссез. Вепссэз кылын пермь кылыс пантасьлöма кыдз перема – «ылын му» вежöртасын. Кама кытшын коми-пермяккез серниын пондöм пантасьлыны кыдз перемь, а сесся кольчöма – пермь. Чайтöны, что Пера-богатырь ним сiдзжö аркмö пермь кывсянь.

Коми-пермяк этноним серниö паськыта пырис 1920 воэз шöрын. Вöлi содтöма коми кыв. Кыдз лыддьöны лингвисттэз, коми нимыс важжык, лоö аснимöн и аркмöма ас кыв пытшкын. Медодзза вежöртасыс вöлöма морт, ас увтырись морт, ас отирлöн морт.

Коми-пермяккез, коми-зыряна да удмурттэз – медматынöсь аркмöм кыв сьöртi. Мир пасьта кыввез коласын этна куим отирлöн кыв шусьö пермскöйöн, кöда олö урал кыв семьялöн финно-угорскöй группаись подгруппаöн.

Археологическöй памятниккез да местаэзлöн ниммез сьöртi позьö шуны, что коми пермяккез одзжык олöмась Пермскöй край пасьта. XV вексянь оланiнныс пондöм чинны сысянь, что коми-пермяккезлöн кöркöся муэз вылö пондöм овмöтчыны роч йöз.

1М.П. Лихачев и А.Н. Зубов - основоположники коми-пермяцкой литературы925 воö, кöр аркмис национальнöй округ, помассьö кад, кöр öтiклаö йитсисö ойвывся (косинско-камскöй) да лунвывся (кудымкарско-иньвенскöй) коми-пермяккез. 1930-öт воэз пондöтчикö иньвеньскöй диалект снова вылын пондшс зорамны литературнöй кыв. Медбöрья воэзö коми-пермяцкöй кыв пыдына велöтöны ученöйез, уна ны коласын и нiя, кин петiс аслас отир коласicь. 2002 вося перепись сьöртi коми-пермяккез коласiсь 83,1% лыддьöны коми-пермяцкöй кывсö чужан кылöн.

Лоö тöдчанаöн и сiя, что коми-пермяккез одз тöдсасисö Севернöй Двина да Заонежьеись роч отир культураöн. Кык народ коласын аркмис уна öткодьыс кыдз оланын, сiдз и культураын. Коми-пермякез и роччез вöлiсö православнöйезöн, сiйöн нылöн вöлicö öтiк и нiя вежалуннэз, семьяын öткодь обычайез. Но тшöтш этакöт коми-пермяккез олöмын öнöдз кльчисö и языческöй обычайез. Коми-пермякезлöн виль да важ еннэзлö веритöм кольчис ассяма аскылöм да олöмыс вылö аскодя видзöтöм.

Вöра-ва коми-пермяккез понда пыр вöлi кыдз ловья, сiйöн нылöн вöлiсö асланыс еннэз да чуддэз. Ойпель нылöн – ыджыт вын, кöда вермис дорйыны отирсö быдкодь шогтсянь да врагезсянь. Веритiсö и вöр царьлö. Вöрисьлö, кöда вöлi кайезлöн да зверрезлöн юралiсьöн. Рудзöговöй ыб вылын олö иньпöв ен – Луншöрика, кöда содтö вын сю воöмлö. Ассяма вöрся енöн лоö Сюра-пеля.

Коми-пермяккезлöн эм асланыс висьтасьöм, кыдз аркмис гöгöрся олöм. Енöжын пондic овны Ен, шондi, кодзуввез, кайез, отир аркмöтiсь, а ваын – Куль, улiсь мир да лöг выннэз лöсьöтiсь. Шöрисьыс, мувылыс вöлi козьналöм мортлö.

Кудым-Ош да Пера-богатырь лоöны коми-пермяккезлöн легендаэзын да преданнёэзын геройезöн. Кыдз позьö адззыны висьтасьöммезiсь, нiя уна бурсö керисö асланыс увтыр понда. Кудым-Ош велöтiс ассис отирсö сылöтны кöрт да керны сэтicь уджалан берся, ылiсь муэзiсь ваис нянь да басöк товар. Медбы отирлö овсис бура, Пера вермис вöрисьöс, вакульöс и змейöс.

Коми-пермяккез му вылын сюрс да джын во сьöрна зорамис медись да бронзаись быдкодь торрез керöм, кöда серöнжык пондic шусьны «пермскöй зверинöй стиль». Быдöс керöмын унажык пантасьöны сэтшöм образзэз, кыдз ош, вöрмöс, мöй-дзöдзыв, вöв, юсь, чöж, змея (зооморфнöй) либо морт-вöрмöс, морт-кай, (зооантропоморфнöй) кöда бура йитсьöмöсь ас гöгöрся олöмкöт, уджкöт, ен веритöмкöт да вöр-ва йылiсь тöдöммезкöт.

Эшö öтiк тöдчана художественнöй торöн лоö храмовöй скульптура – пуись керöм еннэз, кöднö позис адззыны Пармаын. Мединтереснöйез ны коласiсь керöмöсь Ыджыт Коча, Ёгва, Коса да Юксеево посаддэзын.

Богатöй кöркöся историко культурнöй кольöмыс керö ассямаöн öння коми-пермяцкöй профессиональöй культурасö.

КОМИ-ПЕРМЯКИ: информация на русском языке

Категория: Коми-Пермяцкий округ | Добавил: Библиотека (24.06.2014) | Автор: Библиотека
Просмотров: 413 | Теги: Коми-Пермяцкая библиотека, коми-пермяцкая литература, Коми-Пермяцкий округ, Андрей Зубов, Михаил Лихачев, молодцовский шрифт, коми-пермяцкий язык | Рейтинг: 5.0/2
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]