КОМИ-ПЕРМЯЦКАЯ НАЦИОНАЛЬНАЯ БИБЛИОТЕКА им. М.П. Лихачёва

Дерябина В.В., Кудымкарскöй районісь Администрацияын образованнё отделлöн методист

1 ведущöй: Бур лун, дона ёрттэз!

Талун ёгвинской му вылын миянöс öктiс ыджыт юбилейнöй дата. Ноябрь 2 лунö М.П. Лихачёвлöн шогмöм лунсянь тырö 100 год. Коми-пермяккезлöн историяын да культураын М.П. Лихачевлö сетсьö вылын дон кыдз литературалöн основоположниклö, вуджöтiсьлö, велöтiсьлö да книгаэз лöсьöтiсьлö. И эта миян понда дона мортлö посвятитам литературнöй композиция: «Ась миян вöр пытшкись поэзия поэтлö памятникöн лоас». (С. Караваев)

Тiян одзын Лихачёв,
Кöда эз немись и пов.
Гижис и кывбуррез, проза,
Кöть оланыс эз вöв розъя.
Жаль, что эз ов öддьöн дыр,
Кöть богатсьöтiс коми кыв.
Эд вунöтö этö мортсö,
Йöг посадiсь бур поэтсö.
Босьтö стиххез да лыддьöтö,
Эд вунöтö «Менам зонсö»
Пуктiс отир понда лов,
Вунöтны этiйö оз ков.
Бур, что эстöн талун мийö
Уськöтам тöд вылö мый эз вийö.

2 ведущöй: Коми отир дыр видзчисис сiйö лунсö, кöр сы удж йылiсь, сы олан йылiсь, сы тождiсьöм да любитöм йылiсь лоасö гижöмöсь книгаэз. Этö уджсö вермис керны морт, кöда бура тöдiс коми йöзлiсь олöмсö, кöда ачыс петiс сы коласiсь. И олан чужтiс сэтшöм талантливöй мортöс – Михаил Павлович Лихачёвöс.

Тэ сьылöтан и йöктöтан,
Тэ дзерöтан и бурöтан.
Тэ велöтан и туйдöтан,
Серöмтöтан, шынь нуöтан.
Тэнат мывкыд – сöстöм ю,
Тэнат гижöмыт тыпу.
Тэнат сьöлöм чочком юсь,
Тэнат чужöм öмидз тусь.
Чужан лун тэнат – югöр,
Кулан лун тэнат – вуджöр
Да оланыт тэнат – асыв,
Дженытöв, топ öтка сыв.
Ов миянкöт велöтiсь
Да талантливöй гижись.
Талун тэнат дассэз дас
Дона медодзза петас.

1 ведущöй: Михаил Павлович Лихачёв чужис ноябрь 2 лунö 1901 годö Кудымкарскöй районiсь Ёгва посадын крестьянин семьяын. Айсö шуисö Павел Агеевич, а мамсö Вера Никитьевна. Ны семьяын быдмисö сизим челядь. Вот кыдз гижö М.П. Лихачёв томся кад йылiсь:
Менам томся кад,
Да гажöтчан кад.
Сöстöм сьöлöмöй,
Мича юриньöй,
Вына ки-кокö!
Öмö окасьö!
То эд шогмиссьöм
Кöркö йöз шöрö,
Мамö зорöтöм –
Петi отирö.
Горöн сьыла ме,
Кывзö зон и ныв,
Норöн нюжöта
Коми сьыланкыв!
Кöр эд гижа ме
Коми йöз йылiсь,
Сьöлöм пот мунö,
Лэбзьö пöткаöн.
Эшö ёнжыка
Чужöм саймыштö,
Кöр ме пармаö
Мöда кайнытö.
Сэтчин гора
Песня паськалö,
Коми му пасьта
Кисьтö-ольсалö!
Горöн сьыла ме,
Горöн гижа ме, –
Кывзö, коми йöз,
Лыддьö, муса йöз!
(стих «Менам томся кад», 1927 г.)

2 ведущöй: Михаил Павлович Лихачёв сэкся кад сьöртi получитiс бур образованнё – перво Ёгвинскöй начальнöй училищеын, сэсся Кудымкар городiсь Высшöй начальнöй училищеын, нельки Юсьвинскöй учительскöй семинарияын.

1919 годö сентябрь 1 лунсянь уджалö велöтiсьöн Поносовскöй, а серöнжык – Ёгвинскöй школаын. Сiя уджалiс и Кудымкарын народнöй образованнё отделын, окружнöй газета «Гöрись» редакцияын. Этасянь сiя часто ветлывлiс командировкаэзö округ пасьта, öктiс песняэз да сказкаэз.

1 ведущöй: Сэсся велöтчис Москваын издательскöй институтын, öткоста велöтчöмкöт уджалiс центральнöй издательствоись коми секцияын. А Кудымкарö локтöм бöрын уджалiс научнöй бюроын коми кыв исследуйтöм вылын и велöтiс коми литература сьöртi Кудымкарскöй педучилищеын.

2 ведущöй: Михаил Павлович Лихачёв öтнас коми гижиссез коласiсь вöлi бöрйöм делегатöн писателлезлöн 1 Всесоюзнöй съезд вылö. Эстöн тöдсасис Горькийкöт.

1 ведущöй: Образованнё да удж сьöрті Михаил Павлович бура тöдiс челядьöс, нылiсь мывкыд, олан, интерессэз. Сiйöн 1923 годсянь сiя пондiс гижны, отiкöн первöйез коласiсь, коми кыв вылын стихотвореннёэз да рассказзэз челядь понда. Вот, например, стихотвореннё «Пашко да Серко».

2 ведущöй: Пашко:
Ноко, Серко,
Осьт-ко пельтö –
Пондамö велöтчныны.
Сьöд ныр, сувт,
Эн тэ вувт,
Бокö не пöрöтчыны.

1 ведущöй: Серко:
Пашко, мый тэ,
Лякöсь ныр тэ,
Ме эд учöт эшö пон.
Котрасьыштны,
Быглясьыштны
Недыр лэдз менö, бур зон.

2 ведущöй: 1925 годö петiс букварь «Одзлань», а челядь понда петiсö сэтшöм торья книгаэз, кыдз «Пионер», «Учöтик ударниккез», «Челядьлö», «Челядь садын».

1 ведущöй: М.П. Лихачёв ештiс гижны стиххез, поэмаэз да проза и ыджыттэз понда. Онi быд морт, кöда велöтiс коми кыв да литература школаын, тöдö сылiсь произведеннёэз: стих «Межатöм ыб дорын», поэма «Козинтöг», повесть «Виль туйöт», роман «Менам зон». Главнöй темаэз сы творчествоын – классовöй вермасьöм Гражданскöй война коста да коллективизация.

2 ведущöй: А эшö миян гижись не только гижис ачыс, но уна уджалiс и переводдэз вылын. Сiя вуджöтiс роч вылiсь аслас кыв вылö уна стихотвореннёэз А.С. Пушкинлiсь, Некрасовлiсь, Кольцовлiсь, Горькийлiсь да мöдiккезлiсь.

Например, стихотвореннё «Сибирьö».
Сибирь рудаэз шöрын тi
Хранитö гордöй ас терпеннё,
Оз öш, мый керис тiян ки,
И думаэзлöн бур стремленнё.
Несчастьеыслö вернöй сой –
Лёк пемыт му пытшкын
Надейтчöм,
Саймöтас гаж и бодрость чеччас,
Видзчисян кадыс вежас ой.
Любитöм, дружество сэк шуч
Иган пыр локтас быд пораö,
Кыдз тiян каторга нораö
Свободнöй менам локтö шы.
Оковвез усясö быдöс
Тюрьмаэз оссясö, - свобода
Панталас радöн, выныт содас,
Меч босьтат, оссяс кöр ыбöс.

1 ведущöй: Лихачёв бура тöдiс мам кыв, радейтiс сiйö и вуджöтiс да гижис бытшöм кыв вылын, кыдз настоящöй мастер. Кытшöм сöстöм кыв вылö вуджöтiс Пушкинлiсь стихотвореннё «Лöз море дорын дуб зеленöй».
А. Пушкин

ЛÖЗ МОРЕ ДОРЫН ДУБ ЗЕЛЕНÖЙ
Лöз море дорын дуб зеленöй,
Цепь золотöй эм сы гöгöр:
И ой, и лун кыдз кань ученöй
Цепь кузя ветлö одз да бöр
Веськытлань мунö – песня сьылö,
Шульгалань – сказка шогмö бур.
Тыр чудесаэз: вöрись кылö,
Русалка мыччöм ассис юр.
И эмöсь тöдтöмöсь туёккез,
Адззывтöм зверьлöн сэтi след.
Сулалö керку курöг кока,
Ыбöстöм и öшынтöм, сьöд.
Сук вöр берсяöн сэтчин тырöм.
Асывнас сэтчин ваöн тырö,
Песока берегыс пустöй,
Куимдас витязь тiян одзын
Петöны сöстöм ваись ледззöн,
И ныкöт дадька эм морскöй.
И королевич, боки мунтöн,
Лöг царьöс босьтны пленö лют.
Пантасян сэтчин и колдункöт,
Кымöрсис сiйö он тэ кут –
Нöбöтö богатырьöс чуд.
Тюрьмаын царьлöн ныв тужитö,
Сэтчин кöин сылö служитö.
А баба-шорикалöн гыр
Ыскöвтö одзлань шыр да шыр-р,
Кощей стрась косьмö зарни дорын,
Дух русскöй сэтöн… Русьлöн горыс!
Ме волi сэтчин, юи ма;
Эм море дорын дуб зеленöй;
Пукалiс увтас кань ученöй,
Всьталiс сказкаэз уна…
Вуджöтiс М. Лихачёв.

2 ведущöй: Лихачёвлöн вöлiсö художественнöй вкус и музыкальнöй даннöйез, этасянь сiя пондö организуйтны национальнöй праздниккез, певеццезлiсь да музыканттэзлiсь конкурссэз. Отирлiсь лэбтыны культура бура отсалiсö коми рыттэз, кöдна вылын комиöн сьылiсö, лыддьöтiсö, сувтöтiсö дженыт пьесаэз.

1 ведущöй: Лихачёв кывбуррез вылö композитор Александр Клещин гижис музыка. Сiдз чужисö сьыланкыввез «Нинкöм, нинкöмок», «Одзжык олiм бусын, саын», «Сьöлöм сотчö».

2 ведущöй: Уна эз ешты керны коми литературалöн основоположник: эз ешты гижны виль стиххез челядь понда. Эз ешты лöсьöт-ны виль учебниккез. 1937 годö Михаил Павлович Лихачёв, кыдз и уна тысяча сы кодь жö талантливöй морттэз омöн страна пасьта, волi арестуйтöм. И эта жö годö сiя волi вийöм.

1 ведущöй: Постановленнёöн, кöдö 1956 годын лэдзис СССР-ись Союзлöн секретариат, Лихачёв посмертнöя восстановитöм СССР писателлез Союзлöн членöн 1934 годсянь.

2 ведущöй: Округын быд мортлö колö тöдны М.П. Лихачёвлiсь творчество, гордитчыны сiйöн, кыдз коми отирлöн медбытшöм зонöн, гижисьöн.

1 ведущöй лыддьöтö кывбур «Михаил Лихачёвлö» Степан Караваевлiсь.
С. Караваев

МИХАИЛ ЛИХАЧЁВЛÖ
Тэ – мортыс честнöй. Эн вöв немкерись,
Шыннялiс тэныт мича асыв.
Пымалiн томсянь, мырсин, мугöрись,
Порой тшакьялiн ыркыт расын.

Югйöвтiс вильмоз шондiлöн югöр,
И тэ нырнитiн виляс юрнат.
И умöль йылiсь эн думайт некöр,
И йöзö петiн только бурнас.

Мирош любимöй чужис, тэнат зон,
Зорамис, счастье понда пессис.
А меным вöлiн – просто роднöй вон,
Но мыгöражык, енжык месся.

Кулак моз кöркö эн вöв тэ богат,
А ветлiн даже бурлакавны.
И вöлiн только сiйöн виноват,
Что кужин сьывны да серавны.

Но вот адззисис отiк ляк морток,
Кин, поди, другöн шусис тожö,
Решитiс вердны ассис кань юрок,
Джендöтны тэнчит рöма гожум.

И мед эн сьыв тэ песня горалан,
Мортоклöн чушкис тэнö жало…
Но адззö, адззö правдасö олан,
Да лишь не чожа кöр висьталö.

Дрöжитö, полö совесть вузалiсь,
Что тэнö бурöн отир шуö.
Кöр эм народлöн вернöй туйдöтiсь,
Сэк он дзеб правдасö уль муö.

Бур морт козьналö отирлö сьöлöм,
Мед одзлань вештыны олансö.
А умöль морт, мед тырис öр кынöм,
Ньылыштны вермас и аймамсö.

Баитны сэтшöм йылiсь – жаль и кыв.
Ась гырка пу моз жагвыв кулас.
А тэнö сьылö – лэбтö коми ныв,
И радмö мича-мича тулыс.

Ми одзлань йöзас нуам песня.
Кыдз тэ жö, ог жалейтö голос…
Ась миян вöр пытшкись поэзия
Поэтлö памятникöн лоас.