Главная » Статьи » Лихачевские чтения III

Талуння коми-пермяцкöй литература сьöртi учебниккезын виль виззез

Т. А. Васькина (г. Кудымкар) 

Пермскöй крайись образованнёлöн Министерство вöзйöм сьöртi «Виль коми-пермяцкöй учебник» губернаторлöн проектöн пондiсö петны коми-пермяцкöй челядь понда виль велöтчан небöггез.

Эта жö рамкаэзын и пондiсö лöсьöтсьыны коми-пермяцкöй литература сьöртi небöггез.

Сiдз, 2010 воö петiс 5класс понда, 2011 воö – 6 класс понда и öнi помассис ни 7 класс понда рукопись вылын удж.

Видзöтам, кытшöм жö виль виззез позьö казявны эна велöтчан небöггезын.

5 да 6классэз понда небöггезын уна öткодьыс.

Öткö, нiя лöсьöтöмöсь тематическöй принцип сьöртi. Сiдз, ныын произведеннёэз йитöмöсь сэтшöм темаэзöн:

                  Важ оланiсь.

                  Челядьлöн олöм.

                  Вöрва да морт.

                  Чужанiн да горт.

                  Война йылiсь произведеннёэз.

                  Шынь-серöма произведеннёэз.

                  Öтiк родвужись отирлöн литература.

Мöдкö, торья визьöн мунö гортын лыддьöтöм понда литература. Только 5 классын учебникö пыртöмöсь тöдсасьöм понда произведеннёэз, а 6 классын – гортын лыддьöтöм сьöртi уроккез дынö темаэз и ны дынö произведеннёэз.

Куимöткö,  асмозöн сетöм литературоведческöй материал: быд гижисьлiсь биографиясö содтö критическöй статьяись тор,  кöда пыртöм гижисьлöн олан мыччалöм понда или велöтан произведеннёэз вежöртöтöм понда.

Например,  И. А. Мининлiсь «Ва увтын пос» вежöртöтöны В. В.  Пахоруковалöн «Иньва йылiсь сьыланкыв» книгаись тор и Т. З. Кривощёковалöн «Поэтлöн югыт бипур» статьяись тор.

А «Челядьлöн олöм» глава пондöтöны талуння гижиссез В. Рычков да Л. Гуляева асланыс челядькадiсь медгажа да медгажтöм серпассэзöн.

Нёльöткö, сетöм разноуровневöй методическöй аппарат.

          1 уровень – оценка «3» вылö. Видзöтам, кыдз велöтчись вежöртiс сетöм произведеннёсö. Сувтöтам юасьöммез Кин? Кöр? Кытöн?

           2  уровень – оценка «4» вылö. Поисковöй заданнёэз. Юасьöммез: Кыдз? Мыля?

          3  уровень – Оценка «5» вылö. Сёрни зорöтöм сьöртi (творческöй) заданнёэз:

               – лöсьöтны презентация, мультимедия, мини-книжка;

               – адззыны интернетiсь вежöртас,

               – вуджöтны роднöй кыв вылö;

               – докажитны, что …; и мöдiккез.

Витöт визь – литературнöй теория. Эта торын вежöртöтöмöсь 5класс понда 11статья

(Сравненнё йылiсь вежöртас, олицетвореннё йылiсь,  Метафора, Портрет и с.о.). 6класс понда 9 статья (Морт художественнöй литератураын, Конфликт. Басня. Псевдоним. и с.о.).

Кватьöт. Небöггезö пыртöмöсь коми-пермяцкöй художниккез картинаэзлöн репродукцияэз.Нiя бöрйöмöсь произведеннёэз дынö и методическöй аппарат йитö художественнöй произведеннё живописькöт.

Кыкнан учебникын эм литературоведческöй терминнэзöн кывчукöр.

Тiйö казялiт, что 5-6 классэз понда коми-пермяцкöй литература сьöртi велöтчан небöггезын уна öткодьыс. Мöкодьöн мыччассьö 7 класс понда велöтчан небöг.

Öткö, пыртасыс ни, кöда мыччалö, кытшöм уна сетö мортлö книга лыддьöтöм, кыскö дынас.

Мöдкö, небöг лöсьöтiссез кежöмась тематическöй принципсянь и босьтöмась историко-литературнöй принцип. Эта жö принцип сьöртi пондасö лöсьöтсьыны 8 да 9 классэз понда небöггез. Литература видзöтсьö пондöтчöмсянь талуння лунöдз.

Шуч мунан визьöн лоö А. Н. Зубов да М. П. Лихачёвлöн творчество, т. е. эна гижиссезлiсь творчествосö велöтöны витöтсянь öкмысöт классöдз.

                      5 кл.                 6 кл.              7 кл.                 8 кл.           9 кл. 

А. Зубов       кывбур              кывбур             поэма

 

М. Лихачев  Сказка               кывбур             поэма              повесть        роман

                    Кывбур

 

Куимöткö, быд жанр видзöтсьö зоралöмын, т. е. кыдз вежсьö сiя быд историческöй этап вылын. Пример туйö босьтам поэма. Видзöтсьö, кытшöмöн вöлi поэма литература пондöтчöм дорын. Например, А. Н. Зубовлöн поэма «Виль туй вылöт». Сылöн содержаннё ладор, тэчас (композиция), оланкöт йитöт.

– Мый вильыс тöдчö 50-й воэзся поэмаын? (Лöсьöтöм реальнöй морттэз олан вылын. Поэма «Анна Хомякова» С. И. Караваевлöн)

– Кытшöм сiя öнi? (Ф. С. Истоминлöн символическöй поэма «Олёна».

Быдöс энö юасьöммесö вежöртöтö Л. А. Косовалöн статья «Поэма кыдз литературнöй жанр».

Нёльöткö, пыртöмöсь уна фотографияэзöн тор «Гижись нимöн округын йитöм местаэз», кöда вöзйторья юасьöм.

Витöт, литература теория сьöртi статьяэз уна мый вежöртöтöны: например, кывбурын лирическöй герой и автор, автобиографическöй повесть и с. о. Сетсьö вежöртас литератураын роддэз да жанррез йылiсь. Эта лоö тöдчана визьöн.

Кватьöт, юасьöммез лöсьöтöмöсь и компьютернöй технологияэз сьöртi, и тестовöй заданнёэз, и сёрни зорöтöм вылö.

Сизимöт, этнокультуроведческöй материал сетсьö кыдз произведеннёлöн содержаннёын, сiдз и методическöй аппаратын.

Например, М. Лихачёвлöн поэма «Козинтöг» висьтасьö, кыдз чулöтлiсö коми-пермяцкöй свадьбаэз обряддэз сьöртi.

Заданнё: юасьö пöрись баббезлiсь, кыдз кöркö чулавлiсö свадьбаэз: корасьöм, ки кутöм, чикись путшöтöм, венчайтчöм и с.о.

Керö исследовательскöй удж….

 

Категория: Лихачевские чтения III | Добавил: Библиотека (03.07.2019) | Автор: Библиотека
Просмотров: 359 | Теги: образованнёлöн Министерство, новые книги, Пермскöй крайись, Лихачевские чтения III, виль велöтчан небöггез, Пермский край, коми-пермяцкая литература, Коми-Пермяцкий округ, коми-пермяцкий язык, коми-пермяцкöй челядь, Коми-Пермяцкая библиотека, Кудымкар | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]