КОМИ-ПЕРМЯЦКАЯ НАЦИОНАЛЬНАЯ БИБЛИОТЕКА им. М.П. Лихачёва

Медодзза сборникö («Пионер», 1929) Лихачёв М.П. пыртöм 11 кывбур («Тулыс», «Школаö», «Лым», «Пашко да Серко», «Станок», «Миян быдöс», «Гöрд армия», «Пионерскöй клубын», «Ленин туйлöт», «Пионер», «Пионерскöй клуб»), кык висьт («Сюв сотны»,  «Керöс дорын») да сказка («Озъягöдок»).

Небöг сулалö 23 листбокись, гижöм молодцовскöй графическöй основа вылын. Серпассэз сыын неуна, быдöссö 7.

«Учöтик ударниккез» (висьттэз поснит челядьлö)  сборник (1931) сулалö 6  произведеннёись: «Учöтик ударниккез», «Отсаліссез», «Öтласа», «Челядьлöн удж советын», «Октябрь лун школаын», «Катушка». Листбоккес  небöгын – 41, графическöй основа – молодцовскöй, серпассэс нёля.

«Челядьлö (кывбур чукöр)» сборникын (1933) кывбуррез 14, (листбоккез – 40): «Талун», «Вöтны и кольны», «МЮД», «Лоам готовöсь», «1905 во», «Челядь керкуын», «Колхоз вартö», «Виль керкуын», «Лямпаэз вылын», «Велöтан техника», «Школаö», «Вартны», «Школа», «Осьтö ясли»; сідзжö «Колхознöй урожай» инсценировка. Небöг тожö гижöм латинизированнöй  графическöй основа вылын.  Сборник абу серпасалöм.

«Челядь садын» (1934) небöг сулалö 17 листбокись и видзö ас пытшкас 15 кывбур: «Маммезлöн праздник», «Челядь садын», «Удав челядь», «Вöввезöн орсöм», «Писюй», «Ысласьöм», «Вадорын», «Мийö орсам», «Зонöкöт басни», «Яслиын», «Сьыланкыв», «Олö сöстöма», «Локтö öксям», «Сувтö ордчöн», «Арöн». Серпассэз сыын 25, мукöдыс ны коласісь рöмаöсь. Графическöй основа – латинизированнöй.

М.П. Лихачёв, кыдз гижö В. Пахорукова, «ассис творческöй туйсö пондöтіс челядь понда поэзиясянь. Уна кывбуррезын геройез  – велöтчиссез. Кывбуррезас том геройыслöн не пыр тыдалöны конкретнöй чертаэз; мукöдас рифмуйтöмӧсь пионерлöн правилоэз (например, «Ленин туйöт» кывбурын).

Сборниккезлöн бöрйöм мыччаліс, что асланыс кадö нія вöлісö öддьöн колана небöггезöн челядь понда, сідз кыдз отсалісö зорöтны учöт лыддьöтісьöс да ыждöтісö ас гöгöрись олан йылісь тöдöммез.

М. Лихачёвлöн произведеннёэзын темаэз быдкодьöсь: челядьлöн школаын велöтчöм, нылöн орсаннэз, ыджыттэзлö отсасьöм, деревняын виль олан лöсьöтöм, вöр-ва йылісь.

Сборниккезын пантасьöны политизированнöй тексттэз, например: «Ленин туйлöт», «1905 во», «Октябрь лун школаын».

Туйö висьтавны, мый М. Лихачёвлöн медодзза сборниккезсянь ни тöдчö, мый гижись бура тöдö чужан кыв, кужöмöн лöсьöтö ассис произведеннёэз, пыртö быдкодь выразительнöй средствоэз.

Медодзза сборникись (1929) произведеннёэз пыртöмöсь талуння велöтчан небöггезö. Мöдік классын лыддьöтан урок вылын челядь тöдсасьöны «Школаö», «Пашко да Серко» кывбуррезöн, куимöт классын лыддьöтöны «Станок».

«Озъягöдок» сказка, кöда  велöтсьö 5 классын, öддьöн ассяма лексика ладорсянь. Эстöн уна изобразительнöй кыввез, звукоподражаннёэз, сравненнёэз; бура мыччалöм челядёклöн мывкыд.

М. Лихачёвлöн челядь понда сборниккез талуння лунö видзöны ас пытшканыс быдкодь  велöтан выннэз, нылöн ыджыт тöдмалан дон. Талуння урок вылын эна небöггезöн тöдсасьтöн, велöтчиссез ыждöтасö тöдöммез гижисьлöн творчество йылісь, сія кадся олан йылісь.

Сідзжö паськыта эна небöггез сьöрті туйö уджавны и коми-пермяцкöй кыв сьöрті уроккез вылын кыдз начальнöй школаын, сідз и ыджытжык классэзын.

Петö, мый челядь понда небöггезлöн эм и лингвистическöй дон: ны отсöтöн позьö бöрйыны, кытшöм вöлі коми-пермяцкöй кывлöн графика, лексика, орфография, морфология, синтаксис чулалöм веклöн 30-й воэзö. Сборниккез лоасö колана источниккезöн исследовательскöй удж чулöтöмын.

Талуння лунö öддьöн корсьö челядь понда  М. Лихачёвлöн произведеннёэзöн лэдзöм сборник. Надейтчам, мый гижисьлöн мöдік юбилей кежö эта öддьöн колана уджыс лоас керöм.

Литература

1. Лихачёв М.П. Пионер. – Москва: Центральное издательство народов СССР, 1929.
2. Лихачёв М.П. Учöтик ударниккез (висьттэз поснит челядьлö). – Москва: Центральное издательство народов СССР, 1931.
3.  Лихачёв М.П. Челядьлö (кывбур чукöр). – Москва: Молодая гвардия, 1933.
4. Лихачёв М.П. Челядь садын. – Кудымкар: Окриздат, 1934.
5. Пахорукова В.В. Иньва йылісь сьыланкыв. – Кудымкар: Пермское кн. изд. Коми-Перм. отд., 1989.