Главная » Статьи » Литературная страница

Гожумся «Парма руись»: «Лязгайлӧн шогӧт», Василий Кольчуринлӧн висьт

Лязгайлӧн шогӧт

Медбӧрья луннэзӧ Егор Терентьевич оліс-лэбаліс жыв бабыв. И некин сылісь настроеннё эз вермы дзугны. Оліс и адззис, оліс и вӧтасис, кыдз сія чатыртчӧмӧн пукалӧ югыт кабинетын, юӧ чай или кофе, кӧдӧ вайӧны сылӧ ныр увтас. И ӧні некин оз  пыр сы дынӧ юасьтӧг, гусьӧн кытӧнкӧ оз нимкодяв, кӧстав нёштӧм  кыввезӧн. И некытшӧм  ӧні сія  не Терень Егор и Лязгай, кыдз шувлывліс сійӧ мамыс учӧт мыгӧрок да виньӧрик вывтыр понда. Вот эд кыдз мортлӧ оланыс лӧсяліс. Видзӧтӧ пӧ, кин ме сэтшӧмыс, кыдз колӧ овны, ачым пӧ Ен и Царь, быдӧс пӧ эта менам киын.

Кыным год сьӧрна ни сія видзчисис этӧ должностьсӧ! И вот локтіс шуда кадыс, кӧр сія вермис висьтавны – баитны трибуна вывсянь кыдз правильнӧя лыддьӧ, керны сідз, кыдз сылӧ колӧ. Эм жӧ, тыдалӧ, Еныс, вермис кӧ дзимлявны сы туй вылісь Ӧмельсӧ. Сідз сія шувліс районісь юралісьсӧ, кӧда вачкис неважын оча кок.

И бӧра Егор Терентьевичлӧн тырліс куш юрыс быдкодь думаэзӧн, кӧдна бӧрсянь сідз и кыскис сійӧ сьӧласьны. Колӧ жӧ, мымда шоныт кыввез синва  сорӧн висьталісӧ Андрей Степанович йылісь, кӧр сія туплясис эшӧ гробас. Бытьтӧ вӧлӧма сія зэв ни бур мортӧн, юра веськӧтлісьӧн, внимательнӧйӧн, ответственнӧйӧн, порядочнӧйӧн, быд удж дорӧ кужисьӧн. Ӧтік кылӧн, медбурӧн, кӧда вӧлӧма миян понда примерӧн. И былись, эттшӧм кыввез бӧрсянь кыдз он понды сьӧласьны?

А кӧр мортсӧ тапкисӧ муас, сёрӧнжык мукӧдыс нельки йӧктӧмась да сьылӧмась, гажӧтчӧмась сьӧлӧмсянь. Но недыр-мыйись басниэз пондісӧ мунны нач мӧдікӧсь. Но кыдз и пыр. Да мый пӧ сія керис отир понда бурсӧ? Оліс ас понда, кыскис-гусяліс сымда, жыв мӧдіс овны  куим век сьӧрна. Но да ась ни, эд быд морт думайтӧ медперво ас йылісь. Этӧ  тӧдіс и Андрей Степанович. А ӧні ась сэтчин,  могильникас,  яйюрыс нятьӧсь нырсӧ лэбталӧ. Татӧн жӧ, му вылас, ӧні медбур мортӧн лоас Егор Терентьевич. А кинӧс эшӧ позьӧ пуктыны эта должность вылӧ? Некинӧс.

Ӧтік кадӧ тай чуча юрсӧ сюйыштны мӧдіс Николай Петрович, сідз кыдз Андрей Степанович умӧля ни чушыктіс, ылавліс ни мывкыднас, кыдз Брежнев. Но сысянь толкыс  – кыдз кӧза барансянь йӧв. Мукӧдпыр пондас резсьыны дульнас собраннё коста, ачыс буржыка оз  вежӧрт, мый висьталіс. Не весь жӧ нимкодявлісӧ сійӧ Егор Гайдарӧн.

А кыдзкӧ басниэз мунісӧ, мед  Андрей Степанович кулӧм бӧрсянь пуксьӧтны Галина Васильевнаӧс, но бӧра жӧ сія, кыдз думайтіс Егор Терентьевич, оз лӧсяв. Юралісь пӧ должен лоны культурнӧй мортӧн, а кин сія? Михайло тэ арканнё, мыйлӧ только еныс сійӧ чужтӧма. Кышалас юр вылас ассис ракапозсӧ, кӧдӧ неблӧма томувьяс, краситыштас кӧбыла тырппесӧ да чочком синкыммесӧ, мавтчыштас тройнӧй одеколонӧн – матӧ эн лок. Лешачика, лешачика и эм. Серавлісӧ тай одзжык, что нельки пӧ ачыс жӧникыс адззӧм сылӧ нимкодьсӧ. И былись, люпкӧм и ляпкӧм, топ и топ старушка Шапокляк. И кыдз эшӧ сыкӧт узьлӧ жӧникыс? А юрас мый? Кӧр пӧ сеталӧмась валеттэсӧ, бытьтӧ гортас абу вӧлӧма. Кыв ни сэсся оз тырмы мыйкӧ содтыны.

Адззисьліс и куимӧт морт, кӧда тожӧ пелитчис, жыв кӧза йӧр коласӧ, эта должность вылӧ. Этӧ Владимир Егорович. Асьсӧ эд оз адззы, кытшӧм сія.  Шымырт бы бӧжсӧ да пукав, а критикуйтны кӧ миянӧс – пыр медодзын, эн сюйышт чуньтӧ ӧмас. Горӧтас сэтчӧдз, нельки пымалас, топ бур жеребеч. Но только отирыс оз вунӧтчӧ, кыдз сы веськӧтлӧм коста паськалісӧ районісь не ӧтік организация. Нельки тай отирын баитсьӧ, что рака пӧ оз разь ассис позсӧ, кытчӧдз абу вильыс. А сія – ме не ме, кӧркӧся тойӧсь коммунист, а ӧні серӧвӧсь пельбока единоросс, разис посадсиным важ клубсӧ, но а вильыс кытӧн? Да только я ӧтік клубсӧ дзимляліс? Сэтшӧм Бабайыс вермас кокнита паськӧтны и быдсӧн районсӧ. Ӧтік кылӧн, оз ков миянлӧ сія. Да мый сы йылісь унасӧ баитны, кӧр гортас порядоксӧ оз вермы керны, кӧр иньыс морт туяс сійӧ оз лыддьы, кыскасьӧ  мужиккезкӧт син одзас. Ась ни сія сюррезнас ветлӧтӧ – гажӧтӧ отирсӧ, кытчӧдз эз кыскӧ сэтчин жӧ, моргас.

Но а кыдз вунӧтан сипож пасьта чужӧма Иван Гавриловичсӧ? Тожӧ эд вӧлі кандидаттэз коласын. Асьсӧ только лыддис мортнас. И мед некин сэсся эз шед сылӧ туй вылас кодувьяс – кӧть кинӧс страмалас. Да и адззывліс я сійӧ кинкӧ садьнас? Кыдзкӧ тай нельки пӧ челюстьсӧ ӧштӧма ӧтлаын очкиэзнас. Етша, тыдалӧ, бӧра шедліс бӧж увтас. Но отирыс лӧгcӧ оз видзӧ сы вылӧ, тӧдӧны ни, что Иван Гавровичлӧн этӧ нормальнӧй состояннё. Абу Еныс сетӧма сылӧ уджавны садьнас.

И былись, бура кӧ думайтыштны, эта ответственнӧй да ыджыт должность вылӧ вермас лӧсявны только Егор Терентьевичлӧн кандидатура. Ась кӧть и мортыс неыджыт мыгӧра, лязгай кодь. Мыйлӧ  видзӧтны, кытшӧм сылӧн мыгӧр, кыдз олӧ и пасьтасьӧ, эм я сыись кытшӧмкӧ толк. Мед только депутаттэз сетісӧ ассиныс голос сы понда. И тӧдісӧ бура – Егор Терентьевичлӧн эм желаннё уджавны. Да и оз ков повны сыись, что шогмас мыйкӧ не сідз. Да и кин оз сорасьлы? Оланыс эд кузь, быд понда тырмас кадыс, мед пешлыны асьӧс ыджыт должность вылын.

Василий Кольчурин

ПАРМА РУ 

Категория: Литературная страница | Добавил: Библиотека (07.06.2017) | Автор: Библиотека
Просмотров: 47 | Теги: коми-пермяцкая литература, Коми-Пермяцкий округ, коми-пермяцкие писатели, Пермский край, коми-пермяцкий язык, Кудымкар, Кольчурин Василий Григорьевич | Рейтинг: 5.0/1
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]