Главная » Статьи » Лихачевские чтения III

Михаил Павлович Лихачев – детский поэт (изучение творчества М.П. Лихачева в школьной программе)

Михаил Павлович Лихачев – детский поэт (изучение творчества М.П. Лихачева в школьной программе)
Сыстерова Зоя Леонтьевна, учитель русского и родного языка и литературы, МАОУ «Корчёвнинская ООШ» с. Корчёвня, Коми-Пермяцкий округ

  М. П. Лихачёв чужис 1901 годö Белоевской районісь Ёгва посадын. Ёгвинскöй двухкласснöй училище кончитöм бöрын   Лихачёв  велöтчис Кудымкарскöй высшöй начальнöй училищеын и Юсьвинскöй начальнöй семинарияын. 1919 г. сентябрь 1 лунсянь уджаліс Поносовскöй начальнöй школаын велотісьöн. Год бöрті вуджöтісö Ёгвинскöй начальнöй школаö. Сыбöрын – Армия, вились – Ёгва школаын учитель. 1924 год – заведующöй Шипицинскöй начальнöй школаын, а 1925 годсянь уджалö Кудымкарскöй народнöй образованнё отделын специалистöн. 1926–1930 годдэз – окружной газета «Гöрись» редакциян литсотрудник, одзлань-Московской редакционно-издательской институт. Уджаліс педучилищеын преподавательöн. Ештіс велöтны и ыджытöс, и учöтöс.

 1934 год – М. П. Лихачёв – делегат  Всесоюзнöй писательскöй съезд вылын, кытöн пантасьліс А. М. Горькийкöт. Лихачёв вöлі примитöм СССР-ись писателлезлöн союзö.

 1937 годö август 27 лунö писатель ордö локтісö  тужуркаа да погоннэза морттэз, кöдна арестуйтісö сійö контрреволюционнöй удж понда. Октябрь 13 лунö лыддьöтісö приговор, но палаччез эз тэрмасьö орöтны гижисьлісь олан, кыскисö кад ноябрь месяцöдз. И только нимлун лунас, ноябрь 4 лунö,сійö вийисö. А эд мымда бы вермис  отсавны сія отирл, том гижиссезлö, мымда книга эшö ештіс козьнавны бы  лыддöтіссезлö!

 Первöй букваррез «Виль ованвань» и «Выддьыны-гижны вевöтчам» гижис М. П. Лихачёв. Эна книгаэз локтiсö быд коми-пермяцкöй деревняö, нысянь пондöтчис коми отирлöн национальнöй письменность.

Уна ветлöтö том  гижись деревняэзöт, öктö легендаэз, коми песняэз, а сы основа вылын гижö учебниккез челядь да ыджыттэз понда. Газетаэзын «Виль олан» да «Гöрись» публикуйтö очерккез,  рассказзэз, кывбуррез,мычалö деревняись олан. Том гижисьлöн крепамö талант. 1926 годö петö медодзза книга «Гымалан годдэз», сёрöнжык – стиххезöн сборниккез: «Медодзза петассэз», Зарниа луннэз», «Быдмам и вынсялам» и мöдіккез.

Гижись вуджöтö роч произведеннёз Пушкинлісь, Некрасовлісь, Гогольлісь, Островскийлісь, Шолоховлісь, Горькийлісь, а челядь понда – С. Маршаклісь да А. Бартолісь.

Зорамö коми литература. 1929 годö петіс  писательлöн виль книга «Виль туйöт». Эта книгасянь пондöтчö коми- пермяцкой художественной проза-литературалöн основа.   

30-ся унажык сборник петісö коми гижисьлöн. Лихачёв сувтö миян одзын не только кыдз коми-пермяцкой литературалöн основоположник, писатель, поэт, но и кыдз учебниккез гижись, переводчик, журналист, учитель, том литераторрезлö отсалісь.

Михаил Павлович вöлі талантливöй мортöн: сія гижис, сьыліс, йöктіс, фотографируйтіс, орсіс футболöн, занимайтчис альпинизмöн, öктіс радиоприёмник-кужис керны быдöс, ештіс быдлаын.

Ог сорасьö, висьталам кö, что М. Лихачёв и челядь понда гижись. Медодз да унажык сія гижис кывбуррез да рассказзэз челядь понда. Школаын эз волö учебниккез коми кыв вылын, и гижись кутчö керны челядь понда букварь, кöда петіс 1925 годö и шусис «Одзлань». А сы коста жö гижöм кывбуррезісь да рассказзэзісь петісö челядь понда торья книгаэз «Пионер»,  «Учöтик ударниккез», «Челядьлö», «Челядь садын». Сія старайтчис коми-пермяцкой кага киэзö сетны не только букварь да грамматика, но и ас кыв вылын гижöм художественнöй произведеннёэз, оригинальнöй кывбуррез да рассказзэз. Образованнё да удж сьöрті Михаил Павлович бура тöдіс челядьлісь мывкыд, олан, интерессэз.

Лихачёв  бура тöдіс ассис родной кыв и сылiсь мыччаліс ассямасö кыдз настоящöй мастер. Точнöй, вына, боготöй кыв вылын гражданской позиция да ыджыт ответственность коми йöз одзын – медглавнöйыс сы творчествоын.

Кин лыддьöтіс писательлісь челядь понда рассказзэз, сія öнöдз  оз вунöт рассказ «Озъягöдок» (öні эта рассказыс пыртöм школьнöй программаö 5 класс понда). Кыв ладлрсянь эта рассказыс  самöй образнöй да выразительнöй. Озъягöдок не только самöй чöскыт, аппетитнöй ягöдок, кöдö любитö челядь, а Лихачёвлöн сія  «югыт синок», кöда «нёджжасьö гöрдкодь кор коласас», «донок», кöда «дюттьöласьö вöснит кокок вылас». Эта ягöдок, кöда адззö, кылö, баитö,  чувствуйтö, думайтö, радуйтчö, сералö, бергалö бок вылісь бок вылö, испытывайтö нійö чувствоэсö, кöдö вермö только морт.

«Ягöдок дзебö нырсö, вевттисьö листоккезнас, öт синокнас дзардасьыштлö,видзöтö, мый керсьö сы гöгöр». Сылöн пот мунö сьöлöмыс, кöр казялö, что челядь сы кодьсö жö öктöны. Рассказас сымда сравненнёэз, олицетвореннёэз,  фразеологизммез, метафораэз, эпитеттэз, кöдна керöны гижисьлісь кывсö несравнитанаöн мöдік авторрезкöт. Истиннöй коми фразеологизммез: синнэз гусялö, вир петö, кулöм не ловья, кöть синмö чурскы, кокнит сьöлöмöн и сідз одзлань. Не только эттшöм образнöй кыв, но и аспытшкся баитöм, думаэз озъягöдоклöн – удачнöй приёммез, кöдна керны рассказсö ловьяöн, матынöн быд  лыддьöтісьлö.

Рассказын  «Пионерскöй клубын» (1929 г.) автор мыччалö,мыйöн занимайтчöны учöт челядь свободнöй кадö. Нія лэдзöны стенгазетаэз, велöтöны  пионерскöй законнэз, рисуйтöны плакаттэз.

Автор сравненнёэз пыртö текстас, кыдз «ылö кылöны посадсяняс голосоккез, кыдз мошшез улöтöны мачуркаын» и мöдiккз.

Видзöтам челядь йылісь кывбуррез ладорö. Кыдз быд поэтлісь, кывбуррез Лихачёвлісь можно торйöтны  вот кытшöм темаэз вылö: Ленин, Армия, пионер, природа, животнöйез. Ленин, пионер, комсомолец – эна кыввез öння челядь понда чожа лоасö архаизммезöн. Кин сэтшöм пионер? Морт, кöда мунö  медодзын, кöда олö аслас законнэз сьöрті, выполняйтö Ленинлісь заветтэз, кöдалöн призыв – Ло готов! вылö ответыс: – Пыр готов!

Етша весь сія  котрасьö

Небыт сьöлöм, визыв вир.

Часто лыддьö да лякасьö

Книга бердö, кыдзи сир.

 

Или «Пионерскöй клубын» кывбурын:

Мый эд только оз и керö

Клубас челядь – пионер;

Стенгазета гижö – гöрö,

Дума киссьö, кыдзи зэр.

Сэтöн бокас, пызан дорас

Челядь гижöны плакат

«Пионер оз видзсьы шöрас. –

Гижöм: – Юрат сійö варт!»

 

А миян Армия медвына, кöда вылö старайтчисö вачкисьны мöдіккез. Гöрд Армия некинлісь оз пов,сія гöрд герой:

Миян Армия Советскöй

Эз эд повлы некöр на

Вит пельöса сылöн сотчö

Юр вевдöрас гöрд звезда.

Природа – этö быдöс, мый миян  гöгöр. Этö не только бимороза тöв да гажа ягöдалан пора гожум,не только кузь йыжоллеза тулыс  да рöма бипурöн каттьöм ар. Этö  и лым, и ой, и мича асыв, и зэр, и пуж, и сöстöм ю. Быд поэтлöн аслас любимöй годлöн кад, но Лихачёвлö,  ме думайта, вöлі дона быдöс эта югыт оланын: вöррез, юэз, небо, шонді, кöда увтын сылö усис овны совсем недыр.

«Зэр»,  «Лым», «Тулыс» «Ловзисö ыббез», «Кöдзан кад», «Ытшкисян кад», «Вундан кадö»  – кывбур ниммез сьöрті позьö висьтавны, что поэтöс волнуйтö быдöс, мый сы гöгöр керсьö. А кытшöм кылыс!

Лунокыс талун дзардö мича нылöн,

И енöж сöстöм, сöстöм, кыдз синва.

Лыддьöтны лихачёвскöй строчкаэз можно дыр – эд 30-ся унажык сборникын вöлі уна бурыс, интереснöйыс, сьöлöм вöрзьöтанаыс. Медодзза петöм сборниккез-быдöс, челядь понда, кöднö Лихачёв бура радейтіс и веритіс, что быд школьник  пондас тöдны и радейтны ассис мам кыв.

Творческöй олан туй орис том  талантливöй писательлöн 1937 годö. Косьмис «лымдорчача» миян коми-пермяцкöй литературнöй ыб вылын, но сылöн нимыс дыр пондас овны отир сьöлöммезын.

Медбöрын тöдсöта  аслам кывбурöн:

Тіян одзын Лихачёв,

Кöда некинлісь эз пов.

Гижис и кывбуррез, проза,

Кöть оланыс эз вöв розъя.

Жаль, что  эз ов öддьöн дыр,

Кöть богатсьöтіс коми кыв.

Эд вунöтö этö мортсö,

Йöг посадісь бур поэтсö.

Босьтö стиххез да лыддьöтö!

Эд кольö бокö» «Менам зонсö».

Пуктіс отир понда лов.

Вунöтны этійö – оз ков!

Бур, что эстöн талун мийö

Уськöтім тöдлö, мый эз вийö.

Категория: Лихачевские чтения III | Добавил: Библиотека (22.07.2019) | Автор: Библиотека
Просмотров: 330 | Теги: детский поэт, коми-пермяцкая литература, детская коми-пермяцкая литература, третьи лихачевские чтения, Коми-Пермяцкая библиотека, Коми-Пермяцкий округ, изучение коми-пермяцкого языка, коми-пермяцкий язык, школьная программа, Михаил Павлович Лихачев, Кудымкар. Пермский край | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]