Главная » Статьи » Литературная страница

Войнася гижиссез

Война кад сё ылынжык и ылынжык кольччӧ бӧрланьӧ. Фронт вылӧ миян Коми округись муніс 30 тысячася унажык морт. Ны коласын и том гижиссез:
• Иван Дмитриевич Гагарин
• Александр Егорович Аникин
• Степан Иванович Караваев
• Михаил Дмитриевич Вавилин
• Николай Васильевич Попов
• Василий Иванович Исаев
• Валериан Яковлевич Баталов
• Анатолий Денисович Баяндин
Фронт вывсянь локтісӧ не быдӧнныс. А кӧдна вермисӧ мездісьны врагись да сибалісӧ бӧр гортӧ, война йылісь касьтылӧммез пыртісӧ асланыс произведеннеэзӧ.

Источник

Screenshot_11Михаил Дмитриевич Вавилин чужис январь 22 лунӧ 1921 годӧ Кочёвскӧй районісь Кукушка деревняын. 1939 годӧ кончитіс Кудымкарскӧй педагогическӧй училище да уджаліс велӧтісьӧн аслас районын. 1941 годсянь 1946 годӧдз служитіс армияын, участвуйтіс Великӧй Отечественнӧй войнаын. 1955 годӧ кончитіс Горький нима Литературнӧй институт. Уджаліс окружнӧй газетаын, веськӧтліс книжнӧй издательствоӧн. Куліс 1992 годӧ.

Бой бӧрын

Чулаліс бой, и лоис лӧнь быдлаын
Но юрын олӧ сё кытшӧмкӧ зык.
Шоччисямӧ, вӧрок сайын сулалам.
Ме мӧрті муӧ свиттялана штык.
Пымалі стрась, и бусӧсь юрсянь кокӧдз.
Июльскӧй шонді сотӧ менчим бок.
Турун коласын оссьӧмась цветоккез,
И гӧрд видзӧ турунас ягӧдок.
А ордчӧн виль могила, кытчӧ дзебим
Ми лейтенантӧс. (Вӧлі том ӧддьӧн).
И документтэс ӧні сылӧн ме дын
И орден, получитіс кӧдӧ тӧн.
Сулалам шытӧг, нем йылісь висьтасьны.
И некинлӧ, мый шогмис, он норась.
Ми тӧдам только бура этӧ асьным.
Сэтшӧм войналӧн мортыс вылын власть.

 

Screenshot_12Степан Иванович Караваев чужис декабрь 19 лунӧ 1908 годӧ Кудымкарскӧй районісь Отево посадын. Четырёхкласснӧй начальнӧй школа кончитӧм бӧрын сія уджаліс сельскӧй хозяйствоын. 1928 годӧ кончитіс Пермскӧй совпартшкола. Уджаліс избачӧн Отевскӧй да Пешнигортскӧй изба-читальняэзын. 1930-32 годдэзӧ Караваев Кудымкарын окружнӧй издательствоын литсотрудник. 1933 годӧ кончитіс Московскӧй редакционно-издательскӧй институтын курссэз. 1941 годсянь служитіс Советскӧй Армияын, участвуйтіс бойезын, вӧлі кыкись ранитӧм. Демобилизируйтчӧм бӧрын бертіс издательскӧй удж вылӧ. Заведуйтіс Коми-Пермяцкӧй книжнӧй издательствоӧн. Куліс 1974 годӧ.

Узьӧ муын солдат

Дуз керсис ӧтӧрыс, пондіс кымрасьны.
Гажтӧм синбанӧн видзӧтӧ посад.
Туй дынсянь матын, кытӧн кӧркӧ бой гӧрӧдасьліс,
Тӧдӧ кӧть кин,
Муас важын,
Узьӧ солдат.

Люззьӧмӧн зэрӧ, и тӧв пӧльтӧ небыт.
Кыдз ни могиласӧ сэтӧн оз вад!
Кисьтӧ и кисьтӧ синваэсӧ му вылас небо
Тэ понда, зон,
Отирлӧн зон,
Повтӧм солдат.

Шонді югйӧвтіс, и гажмис быдлаын:
Ловзисӧ вӧррез, быд ыб лоис рад.
Кадыс чулалас, но миян свободной странаын
Оз вунӧт вӧр
Тэнӧ некӧр,
Повтӧм солдат.

 

Screenshot_13Леонид Егорович Нилогов чужис 1924 годӧ Косинскӧй районісь Гортлуд деревняын. 1938 годӧ, семилетка кончитӧм бӧрын поступитіс велӧтчыны педучилищеӧ. А сы-бӧрын – Кудымкарскӧй учительскӧй институтӧ. Год велӧтчӧм бӧрын пондӧтчис война, и Нилогов шедіс военнӧй власттез увтӧ. Воюйтіс Западнӧй фронт вылын. Гортӧ локтӧм бӧрын уджаліс школаын да педучилищеын.

 

 

 

Войналӧн чужӧм

(висьтісь тор)

…Кытшӧмкӧ солдат дзугис лӧньсӧ, сія корис музыкантӧс орсны йӧктан. Дунаев пондіс серӧтны барыня. Боец чеччӧвтіс местасис, пиньӧвтіс шапкасӧ и пондіс йӧктыны: бергаліс тӧвчикӧн, сыбӧрын «в присядку», керис сэтшӧм коленцеэз, бытьтӧ некытшӧм война эз вӧв. Вот и эшӧ ӧтік талант мыччисис.
Эта жӧ коста кинкӧ горӧтчис: «Воннэз, почта!» И гыж только солдат чукӧрыс резсис.
Неыджыт, цыган чужӧма боец кыскаліс ме-шӧкись корреспонденция, бергӧтліс юрвевӧрас письмоэз, тшӧктіс йӧктыны нійӧ, кинлӧ адресуйтӧмась. Сеталіс центральнӧй и армейскӧй газетаэз.
Лёва Лудов тожӧ первой треугольник-письмо босьтіс, нӧитчӧм, самӧм, мымда лун сія котӧртіс, кошшис Лудовӧс, но главнӧйыс сія, локтіс адресат дынӧдз. Солдат лыддьӧтіс письмо и кыдз гортас вовліс. Сы син одзын, кыдз кинолента вылын, котӧртісӧ посадісь керкуэз, улицаэз, тӧдса отир, Чикись ю, видззез и ыббез. И сы морос пытшкын лоис шонытжык…

 

Screenshot_10Иван Дмитриевич Гагарин чужис июль 11 лунӧ 1916 годӧ Гайнской районісь Пятигоры посадын. Кончитіс Косинской педаго­гическӧй техникум. Уджаліс велӧтісьӧн Ёгвинскӧй школаын. Гижны да печатайтчыны пондіс 1935 годсянь окружнӧй газетаэзын.
1941 год конецын И. Д. Гагаринӧс вийисӧ Сталинградскӧй фронт вылын.
1946 годӧ Коми-Пермяцкой книжнӧй издательство лэдзис сы стиххезӧн книга.

Коми зон — патриот

Локтіс кад военнӧй,
Грознӧй, боевӧй,
Тэкӧт, друг бесценнӧй,
Тэкӧт, друг роднӧй,
Милӧй друг Афоня,
Мунімӧ бӧра
Мийӧ, коми зоннэз,
Дорйыны страна.
Мунтӧн кӧр прощайтчим
Тэкӧт, друг роднӧй,
Каждӧйлӧ желайтім:
— Пессьы, кыдз герой!..
Одзжык месся шедін
Фронт вылӧ тэ, друг.
Повтӧма тэ пессин,
Воин-политрук.
Одзланьӧ нуӧтіс
Тэнат смелӧй клич.
Бандасӧ репӧтіс
Ротаыт — да сідз!
— Лёк ордаыс куйліс
Му вылас, кыдз вӧр…
Ловйӧн кӧда кольччис,
Рытлань пышшис бӧр…
Эта грознӧй бойын,
Воин-политрук,
Усин тэ геройӧн,
Менам милӧй друг. ..
Сьӧлӧмӧлӧ зубыт…
Мийӧ эд некӧр
Огӧ ни пантасьӧ
Тэкӧт сэсся бӧр.
Огӧ мийӧ жмитӧ
Ӧтамӧдлӧ ки,
Огӧ ни шутитӧ
Тэкӧт, другӧй, ми.
Паськыт ыбын узян,
Смелӧй коми зон…
Тэныт сета клятва,
Кылан я тэ, он?
Тэ понда лёк враглӧ
Вешта ме ёна!
Честно тырта долгӧс,
Дорйытӧн страна.
Менам пым сьӧлӧмын
Пизьӧ только месть!
Бӧбмӧм враглӧ вештам!
Бӧбмӧм враглӧ смерть!



Источник: http://xn--80aaaalnn7bzals.xn--p1ai/?p=60511
Категория: Литературная страница | Добавил: Библиотека (02.11.2015) | Автор: Библиотека
Просмотров: 736 | Теги: Коми-Пермяцкая библиотека, Коми-Пермяцкий округ, Великая Отечественная Война, коми-пермяцкие писатели, Войнася гижиссез | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]