Главная » Файлы » Мои файлы

Мукöд методическöй приёммез М.П. Лихачёвлiсь «Козинтöг» поэма школаын анализируйтiкö
[ Скачать с сервера (55.5 Kb) ] 13.07.2012, 13:40

Цыбина Е.А.,

ПГПУ-ись велöтчись,

Гагарина О.А.,

филологическöй наукаэз сьöрті                                                                                    кандидат, г. Пермь /ПГПУ/

 

Мукöд методическöй приёммез М.П. Лихачёвлiсь

«Козинтöг» поэма школаын анализируйтiкö

 

            Важын ни творчество М.П. Лихачёвлöн, коми-пермяцкöй поэзия да художественнöй проза основоположниклöн, лоис миян отир понда достояннёöн. Кытшöм бы сьöкыт олан периоддэз пырйöт сылöн произведеннёэз эз мунö, öння кадö ми вежöртам, что нiя – классика; эд ныын быдöс коми-пермяцкöй кывлöн богатство, выразительность, ассямаыс. Сiйöн школаын М. Лихачёвлiсь проза да поэзия велöтiкö, велöтiсьлö колö пыдына, серьёзнöя да интереснöя анализируйтны произведеннёэз: петкöтны нылiсь идейнöй содержаннё, художес-твеннöй мастерство, яркöй образзэз, йитны оланкöт, кывкöт. Только сэк позьö велöтны челядьöс донтны, любитны роднöй кыв, литература, а сiдзжö зорöтны ны дынö интерес.

            Школаын литература уроккез коста произведеннё вылын удж чулалö этаппез сьöртi, кытчö пырöны произведеннёкöт медодзза тöдсасьöм, сылöн анализ да обобщеннё. Быдыс ны коласiсь видзö ас пытшкас определённöй методдэз да приёммез. Асланым уджын ми сувтчам медважнöй, кыдз ми лыддям, этап вылын, кöдöн лоö произведеннёлöн анализ. Сiя отсалö осьтны гижисьлiсь идея, геройезлiсь характеррез да поступоккез, казявны произведеннёын кывлiсь ассямасö да бытшöмсö, вайöтны челядьöс выводдэз дынö лыддьöтöм сьöртi.

            Материалöн анализ понда ми босьтiм программнöй произведеннё М.П. Лихачевлiсь «Козинтöг» (7 класс). Сы велöтöм вылö программа сетö кык час. Ми вайöтам приёммезлiсь кынымкö группа текстлiсь анализ понда, кöдна отсаласö велöтiсьлö чулöтны сы вылын удж.

  1. Приёммез, кöдна отсалöны анализируйтны геройезлiсь образзэз:

а) сёрнитöм.

Вайöтам кынымкö примернöй вопрос:

        Кытшöм кад йылiсь гижсьö произведеннёын?

        Кытшöм историческöй событиеэз вöлiсö эта кадö?

        Кытшöм тема пуктöм М. Лихачёв аслас произведеннёö?

        Кыдз оссьö авторскöй идея поэма названнё пырйöт?

        Кин геройез коласiсь тiянлö медöддьöн гленитчис? Мыля?

        Мый тiянлö висьталöны геройезлöн ниммез?

        Кытшöм кык группа вылö позьö янсöтны геройесö? Кытшöм принцип сьöртi тiйö этö керит? Эм я янсöтöм группаэз коласын конфликт? Мый куйлö сы основаын?

 

б) «Портретнöй галерея».

Кытшöм геройлö соответствуйтö сетöм описаннё?

Ø  …зэв шупыт, визыв вира;

Мыгöрыс – кудриа кыдзок;

Чужöмыс синö быдлö пырö…

Быдлаö судзö нывлöн прок.

                                /Öгаша/.

 

Ø  Чужöмыс – небо: гажа, мича.

Сьöд синыс дзардö, кыдз сэтöр.

                                        /Дёма/.

 

Ø  Öт кокнас сiя                              Или: Горöтчис… öмсис быг,

Чотö эшö чуть,                                    Кыдз шальнöй понлöн,

Пондöтiс басни                                       резьсьö, койö.

Виа кылöн горöн.

/Пуд Паша/.

 

Ø  А синнэз сылöн, кыдзи ёссез,

Хозяин – чорыт кöрт.

                               /Микиш/.

 

        Кытшöм изобразительнöй средствоэз пыртö автор аслас описаннёэзö?

Вайöтö примеррез.

        Сетö кыввезöн геройезлiсь внешность. Кыдз тi нiйö адззат? (Туйö тшöктыны челядьлö рисуйтны геройезöс бумага вылö).

 

в) Опорнöй схема вылын удж.

  Кыным группа вылö туйö торйöтны произведеннёись геройезöс?

  Киннэзöс ны коласiсь пыртатö быд группаö?

  Кытшöм отношеннёэз аркмöны эна группаэз коласын?

  Вайöтö текстiсь определеннёэз сетöм группаэз дынö.

  Кытшöм рöммезö краситiт бы поэмаись кык мир? Мыля?

Вопроссэз вылын уджалiкö вермас аркмыны то кытшöм схема:

 

«Гöрд свадьба»                                         «Нывкасö сетны кыдз некыдз»

«Том отир»                                                                               «Важся вез»

«Гажа тулыс»                                                                         «Мороза тöв»

 

Овал: Öгаша

Дёма
Овал: Пуд Паша

Микиш
 

 

 

 

 

 

 

 


2.      Авторскöй отношеннё геройез дынö.

а) Сёрнитöм:

-        Киннэзлö геройез коласiсь гижись симпатизируйтö? Мыля сiдз думайтат?

-        Кытшöм кыв средствоэз пырйöт автор мыччалö ассис отношеннё геройез дынö?

(Челядь вермасö висьтавны, например: «Мыдзöм бура ни ёртiньöй» - сочувствие Öгань дынö отсалö мыччавны уменьшительно-ласкательнöй суффикс;

«Локтö Пуд Паша – черань» - негативнöй оценка сетсьö геройлö сравненнё пырйöт.)

3.      Пейзажлöн роль авторскöй идея осьтiкö.

а) Сёрнитiкö сопоставительнöй таблица составляйтöм:

-        Кыдз природалöн состояннё соответствуйтö морт состояннёлö?

Заданнё: сетöм таблицаын мöдiк колонкасö тыртö текстiсь соответ-ствующöй цитатаэзöн.

Таблица вермас лоны эттшöм:

 

Природа

Мортлöн  состояннё

а) «Шондi лэдзчö вöр вевдöрын,

     Кыдзи биа öгыр дон…»

б) «Лэбтiсис талун

     ыджыт вына пурга»

в) «Сибалiс гора, гажа тулыс…»

г) «Мороза тöвсö вежö

    гажа тулыс…»

(«Эттшöм кадас мывкыд орсö…»)

 

(«Сьöлöмыс шогсьö,

 Доймö кыдзи жель.»)

(«Сэк юрын дума орсö, мунö…»)

(«И лунiсь лунö

  Важ оланыс кулö…»)

 

            Таблица составитöм бöрын велöтiсь вайöтö челядьöс эттшöм вывод дынö:

Поэмаын природа лоö и фонöн, и событиеэзын участникöн; сiя отсалö авторлö мыччавны мортлiсь настроеннё, чувствоэз да переживаннёэз.

б) Словеснöй рисованнё:

Представитö асьнытö художниккезöн. Кытшöм рöммезöн тiйö бы краситiт гижисьöн «рисуйтöм» картина:

            «Шондi лэдзчö вöр вевдöрын,

            Кыдзи биа öгыр дон.

            Лымыс лöз рöм лоö гöгöр.

            Рытьяв небо öзйö вон».

Или: «Ньылалö югыт пемытсö,

            Паськалö бöра виль лун».

4.      Фольклорнöй элементтэз поэмаын.

а) Историко-бытовöй комментарий (öнняся кадкöт сравненнёын).

Велöтчиссез керöны неыджыт сообщеннёэз корасьöм обряддэз йылiсь, нывкалöн олан дореволюционнöй кадö да öнняся кадö.

 

б) Сёрнитöм:

        Кытшöм фольклорнöй элементтэз позьö адззыны текстiсь?

(обряддэз корасьöм коста: «Локтi корасьны…»; «Пондiс знамьё корны Паша…»; йöктан сьыланкыв: «Экма, туна-на…»)

        Мый понда автор пыртö нiйö текстö?

        Лыддьöтö Пуд Пашалiсь сьыланкыв. Кытшöм изобразительнöй средствоэз отсалöны мыччавны сьыланкывлiсь динамика?

 

 

  1. Геройезлöн сёрни.  

а) Сёрнитöм:

        Кыдз геройезлöн сёрни характеризуйтö нiйö?

        Кыдз геройез сёрниын мыччасьö мортлöн природакöт йитсьöм (обращеннёэз пырйöт: «Милöй, милöй, югыт шондi,

                                       Öмидз тусь тэ, лапыт кадж».

Сравненнёэз пырйöт: «Öганёк тэ, мича, гöрд,

                                      Кыдз лог дорын озьягöд». и с.о.)

б) Роллез сьöртi поэмалiсь отрывоккез лыддьöтöм.

 

      М.П. Лихачёвлöн поэма «Козинтöг» и öння кадö эз öшты ассис вынсö. Произведеннёсö школаын велöтiкö, челядь тöдсасьöны асланыс народлöн историякöт, сы обычайезкöт да обряддэзкöт, гижисьлöн образнöй да выразительнöй кывкöт; велöтчöны сетны объективнöй оценка чулалöм эпохалö. Эта неыджыт удж отсалас велöтiсьлö пыдынсьöтны текстлiсь анализ, разнообразитны анализлiсь приёммез.

 

Категория: Мои файлы | Добавил: Библиотека
Просмотров: 346 | Загрузок: 57 | Рейтинг: 5.0/2
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]