Полуянова Н.И., учитель Сервинской основной общеобразовательной школы Кудымкарского района

Велöтан книга кыдз челядьöс зорöтан источник

Коми-пермяцкöй кыв сьöртi 5-6 классэз понда учебник только петiс, сiя локтiс эшö не быд школаö. Унажыкыс эта книга сьöртi уджалöны ни и вермасö мыйкö висьтавны авторрезлö. Кин ошкас авторресö, кин жалейтас, кин завидyйтас, что уна деньга шедтісö, а кин видны кyтчисяс, что умöля лöсьöтöм книгаыс. Но велöтiсь-авторресö вежортасö только морттэз, кöдна асьныс уджалiсö ни книгаэз лэдзöм вылын. Миян сэтшöм велöтiссес етша, этö Р.С.  Надымова, Н.Е. Бражкина, М.В. Четина, В.В. Федосеева да с. одз. Колö висьтавны и сійö, что авторресö некин и некытöн эз велöт, нельки курссэз вылö некытчö эз иньдывлö (эта йылiсь мийö авторрес уна баитлiм). Ыджыт спасибо учёнöйез З.К. Тудвасевалö да Е.В. Ботевалö, кöдна пыр туйдöтiсö велöтiсь-практиккесö. Сьöкыт лöсьöтны книгасö учёнöйлö практикатöг, а нач нем оз пет велöтiсьлöн учёнöйтöг. Коми-пермяцкöй кыв теория вылын уджалöны учёнöйез.

5-6 классэз понда учебникыс петiс сьöкыта. Ме думайта сысянь, что Администрациялöн образованнё да наука сьöртi управленнё эз вермы бытшöма организуйтны уджсö: аскадö эз вöв гижöм приказ, мед аркмöтны авторскöй группа, да эз вöв лöсьöтöм авторрезкöт договор. Да и öнöдз абу договор, кöть и чулалiс кык год (12.05.2004-02.11.2006 гг.). Этаись ни тыдалö, кыдз уважайтöны авторресö, а эшö буржыка коми-пермяцкöй кывсö. Мылякö мукöд юралiссес лыддьöны, что йитiсö кö округсö областькöт, то коми кылыc должен кувны. Но мийö тöдам: кылыc олö сэтчöдз, кытчöдз эм кöть национальностьлöн oтік ловья представитель. Сiдзкö, дыр ковсяс мукöдыслö видзчисьны коми кылыслiсь кулöмсö. Поди, одзжык асьныс куласö.

Ме бы талун висьтала коми-пермяцкöй кыв сьöртi велöтiссезлiсь шог йылiсь. 18 год ни чулалiс, кыдз вöлі лőсьőтőм коми-пермцкöй кыв да литература сьöртi программа (1989 год). Коми-пермяцкöй литература сьöртi программатöг петiсö ни учебниккез 5 класс понда – 1992 годö, 6 класс понда – 1993 годö, 7 класс понда – 1995 годö, 8 класс понда – 1997 годö, 9 класс понда­ – 1999 годö. Программaтöг ни петiс 5-6 классэз понда коми-пермяцкöй кыв сьöртi учебник. Программатöг ни уджалö 7-9 классэз понда авторскöй коллектив учебник лöсьöтőм вылын. Этö кыным год пондам прграммaтöг велöтны???

Сьöрам талун вайи начальнöй классэз понда коми-пермяцкöй кыв сьöpтi учебниккез, кöднöн öнi велöтчöны челядьыс. 2 класс понда коми грамматика петöм 1987 годö, 3 класс понда - 1988 годö, 4 класс понда - 1989 годö. Книгаэзнас челядьыс велöтчöны 18, 19, 20 годöн. Тiян коласiсь кин бы аслас кагалö ceтic этö отрепьёсö? Комиöн шуны, öс петö эна книгаэз вылö видзöтiкö, а не мам кыв дынö радейтöм зорöтны. Разь учöтик мортокыс пондас радейтны коми кывсö да чужaнiнсö, кöда сылö эз вермы лэдзны кодя книгасö? Натьтö, оз. Не этасянь я талун пöднассьöны национальнöй школаэс округас? Не этасянь я аймаммес озö бы велöтö асланыc пияннэзкöт мам кывнымöс? Юpын чужöны öтiк вопроссэз, кöдна вылö сьöкыт видзны ответ.

Школьнőй учебник – этö велöтан книга. И.Я. Лернер, Н.М. Шахмаева лыддьöны учебниксö кыдз «главное средство обучения, в котором фиксируется подлежащий усвоению конкретный материал, а также способы и последовательность организации учебного процесса. Учебник всегда был средством обучения. На протяжении всей истории он выполнял разные функции:

– отражал социальный опыт;

– фиксировал программный материал;

– служил основой упражнений, повторения, закрепления изучаемого материала, контроля за его усвоением;

– обеспечивал решение образовательных и воспитательных задач.

        Названные функции сохранились и в настоящее время».

5-6 классэз понда учебник лоö мöдiк изданнёöн. Учебникын вежöмöсь уна yпpажненнёэз, пыртöмöсь вильöсь. Унажыкыс ны коласiсь – связнöй тексттэз. И витöт, и кватьöт классö пыртőм виль раздел «Сёрни». Сыын сетöмöсь сведеннёэз устнöй да письменнöй сёрни йылiсь, диалогическöй да монологическöй сёрни йылiсь, текст йылiсь.

Учебникын сетöмöсь сiдзжö теоретическöй сведеннёэз синтаксис, пунктуация, лексика, фонетика, морфология сьöртi, кыдз и одззася изданнёын. Пыртöмöсь нiя теоретическöй сведеннёэз, кöднö колő тőдны челядьлö, медбы велавны грамотнöя гижны да баитны, зорöтны ассиныс сёрни.

Упражненнёэз понда бöрйöмöсь сэтшöм тексттэз, кöднаын эм этнокультуроведческой характера информация: роднöй край йылiсь, сылöн культура да отир йылiсь.

            Быдöс этö колö сы понда, медбы челядь радейтiсö чужан кыв да ассиныс горт; старайтчисö, кöр быдмасö, керны сы понда мыйкő бурö, коланаö.

Кыдз челядьыс примитiсö виль книгасö? Книгаыс гленитчис, челядьыс быдса урок видзöтiсö, листалiсö, гижисö, мый гленитчис. Вот кынымкö мненнё. «Кытшом басöк книгаыс! Меным охота видзöтны художниккезлiсь картинаэз дыр и дыр». « ... Меным гленитчис упражненнё 179, кытöн позьö велöтчыны доддявны вöв. Ме ола деревняын, а вот сийöс-сермöтлiсь ниммесö ог тöд», «Меным гленитчис обложкаыс да форзаццез. Нiя лоöны кыдз бы шпаргалкаэзöн урок вылас. Жаль, что рисуноккез кык цветаöсь».

Быль, книгасö любо босьтны киö. Учебниклöн красочнöй, целлофанированнöй обложка, чочком бумага, гырись шрифт. Бытшöма лöсьöтöмöсь форзаццез, удачнöя пуктöм теоретическöй материал: жирнöй шрифтöн выделитöмöсь велöтöм понда правилоэз, примеррез сетöмöсь курсивöн. Син вылö усьö ynpажненнёэзлöн нумерация, рисуноккез кык цветöн, но чёткöйöсь, бытшöмöсь фотографияэз. Первуись коми-пермяцкöй кыв сьöрті учебникő пыртöмöсь асланым художниккезлöн картинаэз сьöрті репpoдукцияэз. Ме думайта, что виль книгаыс лоас челядьöс зорöтан источникöн.

Предложеннёэз:

1. Коми-пермяцкöй кыв да литература cьöpтi программа да учебниккез лэдзны быд 5-7 год бöpтi.
2. Образованнё да наука cьöpтi управленнёлö аскадö лöсьöтны авторскöй коллективвезкöт учебниккез лэдзöм понда договоррез да организуйтны лэдзöмсö.

Литература:

1. Лернер И.Я., Каким быть учебнику: дидактические принципы построения 1-2. Москва, 1983.