Главная » Файлы » Мои файлы

Вуджöтом пырйöт сёрни зорöтöм
01.11.2018, 12:31

Бражкина Н.Е.,учитель коми-пермяцкого языка и литературы 

МОУ «Белоевская средняя общеобразовательная школа»

 

Вуджöтом пырйöт сёрни зорöтöм

 

  1. Историяись: М.П. Лихачёв – вуджöтісь.
  2. Теорияись: мый лоö вуджöтöм кыв (лексика) ладорсянь, грамматика ладорсянь, стилистика ладорсянь, мыля сійö колö пыртны урок вылö.
  3. Практикаись: мый мийö вуджöтам, мый петö этаись.

 

Кольöм векись 30-й годдэзö, кöр чорыта сувтіс кок йылö миян округын национальнöй школа, кöр велöтчис и пöрись и том, М.П. Лихачёв ордчöн учениккез лэдзöмкöт да художественнöй литература пондöтöмкöт керис эшö öддьöн колана удж: вуджöтіс роч гижиссезлісь произведеннёэз коми-пермяцкöй кыв вылö, медбы тöдсöтны отирсö роч литературакöт.

Сія вуджöтіс А. Бартолісь, Д. Бедныйлісь, М. Кольцовлісь, С. Маршаклісь, К. Чуковскийлісь, Некрасовлісь, А. Пушкинлісь кывбуррез, поэмаэз, сказкаэз и нельки романнэз: М. Горкийлісь «Мам», Н. Островскийлісь «Кыдз калитчис сталь», и керис этö öддьöн бытшöма. Энö вуджöтöммесö позьö адззыны Кудымкарись краеведческöй музейлöн библиотекаын. Босьтам пример туйö «Чериалісь да чериок йылісь сказка», кöда вöлі лэдзöм Москваын 1937 годö, да лыддьöтам кынымкö строка:

Олісö старик да старуха

Öддьöн матын море дорын;

Олісö нія му керкуокын

Быдса куимдас да куим год.

Старик кыйис неводöн чери,

Старуха печкис ассис кудель…

 

Сідзкö, и вуджöтöмö Михаил Павлович ештіc пуктыны ассис пай.

Мый жö лоö вуджöтöм?

Вуджöтны öтік кыв вылісь мöдік вылö лоö точнöя да быдсöн (полнöя) висьтавны не только содержаннесö, но и авторыслісь сайöвтöм думасö, кылыслісь кöрсö. Öддьöн бура эта удж йылісь висьталіс А. Истомин «Вуджöтісьлö» кывбурын:

Коми кылыс тэ понда – сьöд вöр.

Сэтчин стиххез менам кыдз малина.

Вуджöтісь, кöр ны вылö тэ инман,

Эн вунöт вуджöтны нылісь кöр.

 

Кыв вылісь кыв вылö вуджöтöм колö пондöтны школасянь, сідз кыдз эта уджыс бура йывдö мортлісь кывсö быд ладорсянь: лексическöя, грамматическöя, стилистическöя.

Вуджöтісь бöрйö кыввесö (словоэсö) сідз, мед нія йитсисö мöдік кыввескöт да сетісö колана дума. Эта понда колö бура тöдны кылыслісь словарнöй состав, сылісь пласттэз, медбы вермыны уна кыввез коласісь бöрйыны öтікö, медлöсяланаö, колö тöдны предметсö, кöда йылісь вуджöтан, а сідз жö тöдны кыв вуджöтан способбез:

– полнöй синонимöн кыв вежöм;

– матына кылöн нето кыв сочетаннёöн вежöм;

– виль кыв аркмöтöм;

– кыввезлісь порядок вежöм;

– заимствуйтöм (кыв одзöстöм).

Пример туйö босьтам быд велöтісьлö тöдса текст, кöда сетöм 5-6 классэз понда дидактическöй материаллэзын, текстыс шусьö «Как зайка Петя рыбу ловил».

Давно уже собирался зайка Петя сходить на речку рыбу половить. – Важын ни лöсьöтчис кöч Петя ветлыны ва дорö чери кыйны.

Эта примерын быд роч кывлö адззисис коми-пермяцкöй кылісь полнöй синоним. Вуджöтсьö волькыта, нельки оз ков вежны кыввесö местаэзöн.

Категория: Мои файлы | Добавил: Библиотека | Теги: коми-пермяцкий язык, Коми-Пермяцкий округ, коми-пермяцкий писатель, Лихачев М.П., Коми-Пермяцкая библиотека, Лихачевские чтения II
Просмотров: 8 | Загрузок: 0 | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]