Главная » 2017 » Декабрь » 25 » Виль годöн!
15:14
Виль годöн!

Дона миян лыддьöтіссез

Кöсъям тіянлö бур Виль год да дивуйтан небöггез!

С Наступающим Новым Годом!

КÖСЙÖМ

(джендöтöм)

 

Ыджытжыкö  удача,

Мед зепö пырис ачыс.

Унажык терпитöм,

Мед оз доймы сьöлöм.

Паськытжык рад да шуд,

Мед юрпыдöс эз луд.

Судзöтны вылын мог,

Мед эз вöв только шог.

Пыр öгралана öд,

Кöть тöдан  и он тöд.

Пыдынжыкö вежöр,

Мед шуны кыв кöть кöр.

Чорыт да лэчыт кыв,

Медбы мыччавны выв.

Пельпоннэз вылын юр,

Мед налькас эн  жö сюр.

Чöскытжыкö нянь-сов,

Мед крепыт вöлі лов.

                 

 Людмила Ивановна Селина,

 с. Архангельское

 

***

Виль год

 

Декабрь павкöтчис кын бордöн,

Тыдлö ни месяцлöн пом.

Виль годöн! Виль годöн! Виль годöн!

Дöс отир – и пöрись, и том.

 

Оськöвтіс порогсö кöзокыс,

Гусялö син виль мöдöтчан.

И мийö гажöтчамö бокас,

И югмö быдöнлöн синбан.

 

Звездаыс радъялöмöн öзйö

И резö югöрсö омöн.

Миянлö Виль год мыйкö кöсйö,

Сё буржыкö, нежели тöн.

 

Ась небоöдз радыс кöвьяссьö,

Лымоккез танцуйтöны вальс.

Виль годыс ась вайö виль счастье,

Кöть важыс невночка и жаль.

 

Людмила  Петровна  Гуляева, коми-пермяцкий поэт

с. Крохалево

***

Виль годöн, донаэз, Виль годöн!

Быдöнлö гаж, здоровье, шуд.

Ась бурыс лунісь лунö содö.

Ась шогыс, гажтöмыс оз кут.

Олансö югытö да кузьö

Ась сьöрас вайö локтан год.

Ась могныт Еныс дынöдз судзö

И ордчöн лоö бытшöм ёрт.

Виль годöн, донаэз, Виль годöн!

Радуйтö уджöн Парма-горт.

Ась радейтöмыт лоö борда.

Тэ крепыт вына, коми морт!

                                 Елена Коньшина

Дед Мороз с подарками

Просмотров: 311 | Добавил: Библиотека | Теги: Виль годöн!, Коми-Пермяцкий округ, С новым годом 2015, коми-пермяцкий язык | Рейтинг: 5.0/4
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]