Главная » Статьи » Коми-Пермяцкий округ

Игнатий Мöсшег "Асывся чёртовöй пöртын"

                                                         Асывся чёртовöй  пöртын.

                                                       (öтiк комилöн касьтылöммез)

                                    

                                                        Менам челядькад.

    Кама йылын да сылö вожжез, Иньва да Кöсва дорын, эмöсь комиэзлöн уна йöза да мича деревняэз, кытöн нылöн оланiнныс.

   Кöсва юсянь невна бокын, Дуров нима деревняын, олöны менам аймам, кыдзи и мукöд татiсь олiсь комиэз, вöдитöны видз-му.

   Аймамлöн вöлiсö  öкмыс челядь: нёль зон да вит ныв.Ныввезiсь  öтiк кулiс томöн, писти шогöтсянь.

   Медся бур челядькадся касьтылöммез лоöны пöрись баб йылiсь, менам айлöн мам йылiсь, кöда кулiс 94 воöн.Менам вежöрö сiя колис пöрись, виньöрик коми бабöн.Миянлö, внуккезлö, сiя бура висьтасьлiс важ олöм йылiсь, сказкаэз да легендаэз, аслас том кадся комиэзлöн олöм йылiсь.Касьтылöммез дырни сiя кыдз бытьтö  садьмывлiс да пальöтлiс миянöс.Сiя висьтасис и висьтасис.И ми юасим сылiсь быдтор йылiсь, нельки сэтшöм торрез, мый вылö сiя эз вермы ответитны.Торйöн бура касьтылiс  висьтасьöммесö лёк разбойниккез йылiсь, кытшöм ыджыт-ыджыт чукöррезöн нiя вовлiсö  Коми муö, вийлi сö да грабитiсö, пöимöдз сотлiсö керкуэз, сьöраныс нуöтлiсö ныввезöс да ичмоннезöс, кöдналiсь вийлiсö воннэзöс, айезöс да жöниккезöс.

   Баблöн том кад дырни этшöм разбойниккезлöн чукöр  ö тiк  ойö  пырöма ны керкуö, кöр быдöнныс узьöмась.Айсö кутöмась, пöрччöтöмась кушöдз, öзт ö мась джодж шöрас бипур да пондöмась сiйö сотны — корöмась сылiсь сьöм.Кöть сiя и сетöма быдöс сьöмсö, разбойниккез сотлöмась сэтчöдз, что куим лун бöртi сiя кулöма.

   Юалiм баблiсь, кин нiя лёк воррес, кытöн нiя олöны и эмöсь я эшö ? Юалöммез вылас баб ответитiс, что воррез вöлiсö роччез, кöдна миян мусянь олöны ылын, но Александр Вторöй реформа бöрын нiя сэсся эз вовлö.

   Бабсянь эшö кывлiм: важын комиэс вöлöмась ён да богатöй йöзöн, и только ыджыт тыш бöрын Москва вермис покоритны да босьтны мусö.

   Часто баб миянлö, челядьлö, сьывлiс сьыланкыввез, кытöн сiдзжö сёрни мунiс комиэзлöн важ могущество йылiсь.          

     Дедö вежöрö колис крепыт да ён мортöн, кöда етша овлiс гортын.Пöрись дырни сiя пыр чери кыйлic. Тулыссянь сёр арöдз олiс Кöсва дорын учöтик избушкаын, луннас узис, а ойнас чери кыйис.Гортö вовлic шоча.Только сэк, кöр помассьывлiс сёян-юан, или кöр колiс отсавны гортö вайны чери.Гортын овлiс недыр: дзик пыр бöр мунлiс черикыян избушкаас.Кöсва дорса паськыт, зелёнöй видз вöррес сылö вöлiсö мусаöсь.Гортö локтöм бöрын сiя гажöна висьтавлiс миянлö Кöсва бокса аслыссяма вöр-валöн олöм

йылiсь,  кöдна луныс моз жö шонытöсь; паськыт тыр дзоридззеза видззез йылiсь, кысянь ö вт ö кольмöтана тулысся мичлунöн; гажа вöр йылiсь, кöда олö кайезлöн сьылöмыöн.

   Шоччисян да вежалун луннэзö дедö пыр ёртасьлiс соседдэскöт, гöститöтлiс меддона чериöн да гортся сёянöн, часто аркмывлiс, что сiя сэк унажык ювлiс, а кöр юрас невна кайлiс, сьывлiс помасьлытöм сьыланкыввез.

                                                           Фронт вылö.

     Вöл июнь пом.Ештiс чöскыт виноград, и сiйö вузалiсö зэв донтöма.

  Месяц мымда фронт вылын вöлiсö ыджыт да вир киссяна тышкасьöммез.Николай Николаевичкöт  лöсьöтöм планнэз сьöртi нельки пондöтчисö наступленнёэз: эд Российскöй армия противникся вöлi неöтпöв ыджытык.Эта мыччалiс, кыдз Российскöй армия, одзö мунiкö, бырöтлiс пыкöттэз да чышкис кушöдз противниклiсь фронтсö.Роч оружиелöн вермöммез йылiсь жагöникöн пондiсö локны юöррез: пленнöйезöс босьтöма сюрссэзöн ( тысячаэзöн), пушкаэз — стоэзöн, пулемёттэз — тысячаэзöн да мукöд вида военнöй трофейез.Но фронт вылö одзö колiс сiдзжö сто сюрссэзöн содтöт войскоэз, и быд каррезын мунiсö  солдаттэзöн тыра поезддэз, кыдз тыртöм доменнöй горрезö лонтас.Только Туркестанi сь роч войскоэз фронт вылö эз ыстывлö.Миянлö полкись локтiс приказ мунны Кременчугö, призывнöй пунктö, фронт вылö мöдöтöм могись.Кременчугö туй мунiс Россиялöн да Украиналöн уна йöза каррез — Самара, Тула, Орёл, Курск, Харьков да Киев пыр.Быдлаын тыдалiс, что олöмыс пизис важмоз: велöтi ссез ветлöтiсö  асланыс велöтчиссезкöт, велöтчиссез мунiсö деревняэзö аймам дынö.Тыдалö, гажа, визыв олöм-вöлöм.Йöктiсö-сьылiсö да орсiсö, кыдз быдлаын роччезкöт вöвлi : йöзыс гöтрасисö, олiсö, бытьтö войнаыс эз и вöв.Карись олiссез эз и казялö, что фронт вылын öшис куим миллионся унажык морт.

 

           Журнал «Войвыв кодзув» 1992.№1.Стр.3;1992.№ 2.Стр.38.

 (Коми-зырянскöй кыв вылiсь коми-пермяцкöй кыв вылö вуджöтiс Аксёнова Ольга Петровна).

Категория: Коми-Пермяцкий округ | Добавил: Библиотека (03.07.2015) | Автор: Библиотека
Просмотров: 222 | Теги: Журнал «Войвыв кодзув», Игнатий Мöсшег Асывся чёртовöй пöрт, коми-зырянский я, Игнатий Мошегов, коми-пермяцкий язык | Рейтинг: 5.0/2
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]