КОМИ-ПЕРМЯЦКАЯ НАЦИОНАЛЬНАЯ БИБЛИОТЕКА им. М.П. Лихачёва

Федосеева В.В., Кудымкарскöй педагогическöй училищеись велöтісь

Коми-пермяцкöй литературалöн основоположник М.П. Лихачёв олiс дженыт олан, но пуктiс ыджыт пай миян литература чужöмö да зоралöмö. Аслас художественнöй программа йылiсь гижись шуис:
«Кöр эд гижа ме
Коми йöз йылiсь,
Сьöлöм пот мунö,
Лэбзьö пöткаöн.
…Горöн сьыла ме,
Горöн гижа ме, -
Кывзö, коми йöз,
Лыддьö, муса йöз!
(«Менам томся кад», 1927 г.)

Вылына донтiс М. Лихачёвлiсь творчествосö коми-зырянскöй учёнöй В.И. Лыткин, кöда шуис рассказ «Виль туйöт» медбурöн коми литератураын [1, с. 17]. Вылын оценка сетiс и литературовед В.В. Пахорукова.

М. Лихачёв творческöй наследиеись туйö петкöтны сэтшöм традицияэз:

• произведеннёэзлöн фольклоркöт йитöттэз (поэма «Козинтöг», роман «Менам зон».);
• этнографическöй материал пыртöм (кывбуррез «Пистикла», «Керкуын», поэма «Козинтöг» (корасьöм), роман «Менам зон» (вежалуннэз – стречалун, розосво, светтё, сёяннэз да паськöм мыччалöм, ворожитчöм, пукаланiннэз, лён керöм);
• мортлöн природакöт йитöт, природа ловья герой произведеннёэзын (тöвся дженыт лун, тöлiся рыттэз, лымдорчачаа тулыс, уна рöма гожумся лун – рассказын «Виль туйöт», романын «Менам зон»;
• сöстöм, мича, гора выразительнöй коми-пермяцкöй кыв.

Сiдз ылiсь 20-30 гг. öтлаын медодзза произведеннёэзкöт, кöднö гижисö А.Н. Зубов да М.П. Лихачёв, чужисö коми-пермяцкöй литературалöн традицияэз, кöдна олöны и öнняся коми-пермяцкöй литератураын.

Пример понда босьтам В.В. Климовлiсь роман «Гублян». Литературовед, профессор В.В. Пахорукова сьöртi, В. Климов – фольклорист, сiя ачыс чукöртö йöзын чужöм да йöз коласын зорöтöм поэзиясö. И, конечно, поэт, прозаик да фольклорист дугдывтöг велöтö аслас гижöттэзöн, что том коми-пермяцкöй литератураын наци-ональнöй характер лöсьöтö мый оз позь бергавны фольклорнöй да этнографическöй материалтöг. Фольклорнöй материал пыртöм сы понда, медбы паськытжыка, точнöйжыка мыччавны сiйö средасö, кытöн олöны геройез [2,с.137].

Романö «Гублян» автор пыртöм 25 висьт, бывальщина да быличкаэз: нечистöй выннэз йылiсь («Вöриссез», «Ваиссез»), вына отир йылiсь («Кудым-Ош да Юкся», «Пера-богатырь»), кладдэз йылiсь («Кладыс пышшис», «Гор увтiсь клад») да заговоррез («Кыдз лудыкöс кольлалöны», «Кыдз курöг шогöт öвны»). Олявка часто осьтлö ассис веж тетрадьсö, кошшö сыын вопроссэз вылö ответтэз. А этö заговорсö, кодö тöдiс Дзолиньсянь, сiя видзö юрын: «Чирöй Васильöй, чирöм попыльöй! Тэ эн госсяв, тэ эн тырсяв, а косьмы да усь, кыдзи сьöдтусь» [3, с.242].

«Гублянiсь» туйö адззыны и богатöй этнографическöй материал. Висьтын «Кöркöся коми мужик» мыччалöм коми-пермяклöн олан зыбкасянь, мый сiя новйöм. Мöдiк висьттэзын «Сэтшöм сiя, не мöдкодь» да «Простöй морт» мыччалöм коми мужиклöн характер, кöда öддьöн ассяма.
Сiдзжö автор мыччалö инькалiсь удж. «Нiя (монашкаэс) гöрдззисö чулки-испотка, кыйисö дöра – сöдзовöйö, джендöсовöйö, торковöйö, крученка, поньтоковöйö, керисö ной. Асьныс жö и кыйисö берся нинкöм: вотяцкöйöсь, мордовскöйöсь, рочöсь и нельки сапог кодьöсь – келаннэз».

Монастырьын овтöн Анна велалiс гöрдззыны саккез да мордаэз, кыйны пестеррез, зобняэз, куддэз, сов видзан дозоккез, лöсьöтны пожжез, корзинаэз… [3, с.40-41]

В. Климов тöдсöтö миянöс, кыдз одзжык касьтiсисö: «Одзжык коми отир кулöммесö дзебис винатöг и кузь басниэзтöг, лишньöй стряпня эз вöв, но пыр вöвлi черинянь, пельнянь, ырöш. Ежели гожум да не кöс видз коста – керлiсö селянка, йöла сёян. Абу кö яй, пельнянь керöны капустаись, тшакись, кушманiсь, пиканiсь, пистикись – мый эм заптöмыс» [3, с.304].

Олявка пырö баб Дзолинь чомö и адззö: «квашня, кринкаэз, чуж, öр, сельница, пожжез да няньбекöр. Сэтöн жö печкан, куддэз, зу, пыркöтчан».

«Романiсь геройез, кöдна крепыта вужьясьöмась асланыс чужан муö (Котöрок, Олявка, Дзолинь), сьöлöмнаныс кылöны и асмознаныс донтöны природаыслiсь гармониясö», – гижö В.В. Пахорукова [2, с.135]. Природаыс ловья, гажöтчö и тöждö отлаын геройескöт. «Енöшка пичкö-юö Гублянка кöджись васö, оз и вöрзьöтчы… Мыс увтас боргöны кык ключ, чеччöвтöмöн визывтöны Гублянка ю дынö, ошшасьöны кымöрыс одзын вот пö мийö писькöтiмö изъя керöссö, петiм югытiнас, и пондыв пö миянöс кутны, пондыв йöртны! А мыс вылас сернитöны Жогор да Бакар – не тэрмасьöмöн, дзик богатыррез… И ештас кö локны кин эта кадö ны дынö, то, может, и кылас нылiсь серöм сора шушкöм: «Енöшка, енöшка, йöрнöстö эн öшты» [3, с.124].

Сiдз жö, кыдз думаэз Олявка юрын, уйöны кымöррез. «Юр вевдöрас уйисö серакутшша кымöроккез и орсiсö шондiкöт: то сайöвтасö сылiсь бледöтöм чужöмсö и му вылö ольсаласö пемыт вуджöр, мыйсянь дузгыльтчас не öтiк векся Жогор да сылöн сосед Бакар и сы гöгöрись муэс, то бöр осьтасö, лэдзасö сыись югöрресö, и пожуммес, понуля керöсыс, и посадыс шынь-шынь серöмтчасö, гажмасö.

Торйын колö сувтны «Гублянлöн» кыв вылын. «Повествованёыс и персонажжеслöн сёрниыс богатöй, уна рöма».

«Ог вежöрт öнi томмесö – не кушман, не сёртни, не роч, не коми», - шуö Дзолинь. «Но счастьеыс – руч, сiйö сьöкыт вöтны и кузь кока солдатыслö; счастьеыс – ваын ёкыш, сiйö он гумышт ведраöн, он кут куш киöн.

В. Климов пыртö лыддьöтiссесö разговорнöй серниö, интонацияэс кöдалöн быдкодьöсь.

В. Климов часто пыртö языковöй маска, геройесö туйö тöдны ны сёрни сьöртi.

В. Климов повествованнёын уна пантасьöны изобразительнöй кыввез, фразеологизммез, парнöй кыввез, сравненнёэз да мöдiк языковöй средствоэз.

Петö, что лихачевскöй традицияэз олöны öння литератураын и öддьöн корсьöны сыö, медбы лэбтыны литературалiсь дон.

М.П. Лихачевлöн произведеннёэз корöны одзланься пыдын исследуйтöм.

Литература
1. Пахорукова В.В. Современная коми-пермяцкая литература /В.В. Пахорукова. – Сыктывкар, 1996.
2. Пахорукова В.В. Иньва йылiсь сьыланкыв /В.В. Пахорукова. – Кудымкар, 1989.
3. Климов В.В. Лöньыс оз ло. /В.В. Климов. – Кудымкар, 1987.
4. Зубов А.Н. Бöрйöм произведеннёэз /А.Н. Зубов, М.П. Лихачев. – Кудымкар, 1989.