Главная » Статьи » Лихачевские чтения I

М.П. Лихачёвлісь творчество начальнöй школаын велöтöм

Тарасова С., Кудымкарскöй педагогическöй училищеись велöтчись

Михаил Павлович Лихачёв öтлаын Андрей Никифорович Зубовкöт лоöны коми-пермяцкöй литературалöн основоположниккезöн, сiдз кыдз нiя медодз пондiсö гижны художественнöй произведеннёэз чужан кыв вылын.

Сборникö «Бöрйöм произведеннёэз», кöда петiс 1989 г. [1], разделö «Челядь понда…» М. Лихачёвлöн пыртöмöсь 11 кывбур. Нiйö туйö торйöтны сэтшöм темаэз вылö: пионеррез йылiсь, Гöрд армия йылiсь, природа да челядь йылiсь (школаын велöтчöм, челядьлöн удж да орсаннэз).

Кыдз гижö литературовед, профессор В.В. Пахорукова, «челядь понда медодзза кывбуррес вöлісö декларативнöйöсь агитационно-призывнöйöсь».

Начальнöй школа понда программаö (1986 г.) [2]. М.П. Лихачёвлöн вöлi пыртöма öтiк кывбур. Этö «Мыля öнi сымда мунö челядь школаö быд лун». Петö, что начальнöй школаись велöтчиссез эзö тöдсасьö коми-пермяцкöй литературалöн основоположниккöт, сылöн олан да гижан туйкöт. Виль программаын, кöда вöлi лöсьöтöм 2001 годö, эта списокыс кузьжык. II и III классэзö пыртöмöсь тексттэз «Нысянь пондöтчис коми-пермяцкöй литература», кöдна тöдсöтöны А.Н. Зубовлöн да М.П. Лихачёвлöн олан да гижан туйкöт.

II классын лыддьöтöны кывбуррез «Школаö» да «Мыля öнi сымда мунö челядь школаö быд лун».

III классын тöдсасьöны «Станок» кывбуркöт.

IV классын лыддьöтöны тор «Тöвся рыт», «Виль туйöт» рассказiсь, «Пистикла» да «Керкуын» кывбуррез.

Туйö висьтавны, что М. Лихачёвлöн челядь понда унажык кывбуррез талуння лунö эзö öштö ассиныс дон, кöть 20-30 годдэзсянь, кöр нiя вöлiсö гижöмöсь, чулалiс уна кад.

Учöт лыддьöтiсь тöдсасяс сiя кадся оланкöт, тöдас, кыдз челядь велöтчисö, отсасисö ыджыттэзлö да орсiсö.

Сiдзкö, эна произведеннёэзлöн ыджыт познавательнöй да воспитательнöй дон, бурöсь нiя и кыв ладорсянь, сiдз кыдз М.П. Лихачёв гижис ассис произведеннёэсö бытшöм, сöстöм, гора да мича чужан кыв вылын.

Произведеннёэз сьöртi уроккез чулöтiкö велöтiсьлö ковсяс бура думайтны, кыдз нуöтны словарнöй удж, сiдз кыдз пантасясö уна архаизммез да нельки историзммез, например: зобна, бурак, зу, джек и с.о.

Кывбур «Пистикла» талуння велöтчиссезлö öддьöн матын, сiдз кыдз нiя тожö радейтöны пистикавны да чöсмöтчыны быдкодь сёянöн эта быдмасiсь. Автор кужöмöн пыртöм фразеологизммез да сравненнёэз:

Ыджыт ассяас зобнаöн
Кыссьö Макарок, кыдз рак.
* * *
То тай, öтiк шедiс паныт,
Только мышкыртчы да босьт.
Тран сулалö, видзöт, Ванюк,
Петöм мусис, кыдзи ёсь.
* * *
- Ой-ёй-йой, челядя, татöн
Пистик петöма, кыдз зу! –
Дрин Опонька чирзö матын,
Аслас öм и ныр куш му.

Эта лыддьöтан уроклöн лоасö уна воспитательнöй моггез: öткö, и ёртасьöм зорöтöм:

Öтмöдöрсянь Пальник туйö
Челядь уна öксьöны.
Кин зобнаöн, кин ведраöн.
Мунöны, гажöтчöны.
* * *
Сьöкыт доз кыскö пельпоннэз,
Сьывтöн гортö лэдзчöны.
Ашын асыв учöт зоннэз
Пондасö чöсмöтчыны.

Мöдкö, велöтiсь нуöтас сёрни коми отирлöн сёяннэз йылiсь, тöдас, мый стряпайтöны гортаныс пистикись, отсасьöны я эта уджын маммезныслö.

Кывбурын «Станок» висьтассьö, кыдз челядь орсöны.

Öшын увтö, угöлокö
Челядь керöмась станок.
Ёгсö чышкöмась росокöн
Сэтчö пуктöмась росок.
Кык джекок стена гöгöрас…
Чожа шогмис виль пызан…

И эта кывбурыс челядьлö матын, сiдз кыдз öнi нiя орсöны сiдз жö:

Ва петкöтiсö дозокöн.
Кашник торö му кык пань.
Васö кисьтiсö, чагокöн
Мутэйтiсö – лоис нянь.
Лёдзöн чаггезлö пöжавны
Шаньгаэсö пуктiсö.
Пондiс шондiыс отсавны
Чожа няннез сукмисö.

Автор бура тöдö челядьлiсь психология, радейтö нійö, сiйöн и гижö ны йылiсь сэтшöм шоныта, шынь-серöм сорöн.

«Керкуын» кывбур сьöртi туйö нуöтны сёрни, кытшöм вöлi коми-пермяклöн керку, кытшöм удж керисö сiя кадö:

Лабич дорын, öшын весьтын
Шваткö-кыйö дед нинкöм.
Лыддьö книга пызан сайын
Учöт Ваню.
Мамыс дзольгö, ырöш керö,
Бабыс кага гыччöтö.
Мича нылöй пызан дорас
Печкö, гыжнас шваткöтö.
Керку шöрас, паськыт джеклын
Айыс вурö виль сийöс.

Сiдзжö, эта кывбурын паськыт этнографическöй материал, и велöтiсь вермас чулöтны сы сьöртi быдкодь удж.

Быдöс висьталöмыс сьöртi туйö керны вывод, что М.П. Лихачёвлöн челядь понда произведеннёэз öддьöн интереснöйöсь, познавательнöйöсь да воспитательнöйöсь, сiйöн и коланаöсь.

Литература

1.«Иньва», 1971 г. стр. 107 – 108.
2.Пахорукова В.В. Современная коми-пермяцкая литература.
3.Лихачев М.П. Бöрйöм произведеннёэз, стр. 99 – 106.
4.Коми-пермяцкöй кыв да лыддьöтöм сьöртi программа, 1986.
5.Коми-пермяцкöй кыв да лыддьöтöм сьöртi программа, 2001.

Категория: Лихачевские чтения I | Добавил: Библиотека (11.06.2015) | Автор: Библиотека
Просмотров: 442 | Теги: Коми-Пермяцкая библиотека, коми-пермяцкая литература, основоположник, Коми-Пермяцкий округ, Зубов А.Н., Пермский край, Лихачев М.П., Лихачевские чтения | Рейтинг: 5.0/1
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]