КОМИ-ПЕРМЯЦКАЯ НАЦИОНАЛЬНАЯ БИБЛИОТЕКА им. М.П. Лихачёва

Федосеева Е., Кудымкарскöй педагогическöй училищеись велöтчись

М.П. Лихачёвлöн букварь «Шондi югöр» петiс Москваын 1926 годö «Вевöтчан нига выддьыны-гижны Иньва дорись коми кыввын» гижöма молодцовскöй алфавит вылын, сыын 116 листбок. Автор гижö: «Эта букварьыс гижöма быдса словоа методöн, гижöмыс сьöртi туйö велöтны грамотаас кöть кытшöм метод сьöртi. Шыпассэсö (букваэсö) колö мыччавны жагöникöн, норовитöмöн, тэрмасьны оз ков, челядьыс асьныс оз казялö, кыдз быдöс букваэсö пондасö тöдны. Букваэз велöтöм понда, колö керны уна наглядность, колö уджавны челядьыскöт, клеитчыны, рисуйтчыны, вундавны бумага, медбы велöтчиссезлöн, мый велöтiсö, пыдöжык пырис юрас, медбы одзлань нiя нем эз вунöтö». М.П. Лихачёв пондöтiс букварьсö каньсянь. Мыля? Вот кытшöм сiя сетö эта юасьöм вылö объясненнё: «Кань пыр миян гöгöр бергавö, пыр челядьыс син одзын, да и кывас «кань» только куим буква. Вот сiйöн ме сiйö и босьтi». Книгаын медодзза комплексыс «ован кагавöн гортас, шковаас воктöдз, гожумнас».

Пример понда туйö вайöтны сэтшöм тексттэз:
Асыв.
Паша, ковö шковаö-ни мунны! То йöв, сёй да мун. Паша сёйöм, ювöм, пасьтасьöм и мунöм. Сьöрас котöртö Серко. Паша Серкосö вашöтöм. Мунöм шковаас öтнас.

Öгань масьтö ид.
Öгань косьтiс горвын ид. Сiйö масьтiс гырйын, тöвöтiс. Вот и шогмис тусь. Пувис сэтiсь шöма шыд Пронясö вердны. Проня ошкö да сёйö. А öшö мый Проня сёйвö? Сёйвö яй, кушман, вук, картовкаовöй шаньгаэз. А тiянöс мыйöн мамныт вердвыввö?
Книгаын уна орсаннэз, загадкаэз. Орсöны каньöн да шырöн.
Мийö орсiмö шковаас каньöн да шырöн. Сувтiмö унаöн кругö. Кругас пырис Машу. Сiя шыр. Паша кольччис круг саяс – сiя кань. Каньыс Пашаыс пондiс кутны шырöс Машуöс. Öшö мийö орсам чик-чикиöн, пешкаöн, каравайöн.

А вот загадка:
Тöд жö тö-ö-öд:
Гöрд мöс сьöд мöсöс нювö? (би да тшын).
Вöрын увтас, увтас – воктас гортас, вабич увтö водас? (чер).
Коробья тыр гöрд пань? (биа шоммез горын).
Кык шыр, нёль бöж (нинкöммез).
Сы коста жö быдöс гижöмыс янсöтчö годлöн каддэз вылö: ар, тöв, тулыс, гожум. М.П. Лихачёв гижö, что гижöм сiйö не янсöтöмöн, а сьöрсьöн-бöрсьöн, гижикас ёна видзчöма комплекссэз бердö, гижöм быдöс отир олан йылiсь.

Ар.
То и ар воктiс. Вунiсь вун зэрö. Тöвыс вашöтö кымöррэсö. Сера вуннэз воктiсö. Лисыс усьö пуэзвись. Турун кувö. Кувисö номмез да оваддэз. Кайес мунiсö шоныт местаэзö. Арнас дыш петö öтöрö петны.
Зэрö, зэрö… оз и шондiыс петаввы.

Тöв.
Кöдзыт тöвыс воктiс,
Вымыс тыртiс му.
Умöль кайвö сёйны
Сёйны нем абу…

Мукöд текст конецын пантасьлöны вопроссэз, кöдна йитöмöсь челядь оланкöт, например: «Идзас». – А тiян тыраöсь ни рудзöггезныт? Мöдiк текст конецын: «Тiян эмöсь жö пожумаиннэзыс? Кыз рыжыксö öктыват жö?»

Эм йитöт математикакöт:
Пашаэсвöн тöвйöтöны куим баля. Неважын öтiк баля пиявöм. Кык дзель эмöсь: öтыс дзель, мöдыс баран. Но уна я öнi нывöн баляэс воисö?

«Шондi югöрын» лингвистика да этнография ладорсянь туйö казявны вот мый. Букварьын пантасьöны уна тексттэз, кöдна висьтасьöны, мый сiя кадö новйисö, мый быдтiсö, мый сёйисö, кытшöм вöлi дозмук. Пример понда туйö вайöтны сэтшöм тексттэз:

Миян кöмкöтыс: нинкöм, сапог, пими, котi, чушни, чарки.
Паськöм: йöрнöс, вешьян, шабур, поньток, зипун, пась, тувуп, дубас, мыг, шамшура, ковта, чышьян, паголёшки.

Пышнавö.
- Мам, а маму, кытöн пыжьяныс? Ме мöда асвым пышнавны виль нинкöммез.
- То, кага Пашу, öшынвас, пышнав, пышнав, айытвö некöр, мöдö мунны навог вежтыны.
Пашу пуксис, пышнавис, вот и виль нинкöма зонкаыт.
Пашкавö мамыс вурис виль зипун. Айысвö вурö шабур. Вöз рöма сöдзись шöравис. Корман дорресö мöдö плисöн öшö вурны. Но да эд и Пашкаысвöн зипуныс не умöль! Виль эд виль!
Этшшöм тексттэз челядьлö вежöртанаöсь.
Мамö ректасьö. 10 пасма ни ректавöм, öшö ковö 2. Мамö косьтiс лён. Öнi пондас нярьявны.
Букварьыс гижöм иньвенскöй диалект вылын. Сiйöн сiя ассяма фонетика ладорсянь
 звук [л] пантасьö только небыт: умöль, Улю, нёльöт.
 Мöдiк случайезын быдлаын звук «в». Мийö тавун шковаас баитiм пода йывись, кыдз ковö подасö дозирайтны.
 звук [j] пантасьлö 2 гласнöй коласын, эта явленнё абу современнöй коми кылын.
баjитiм, пöjимöн, пуjезыс;
существительнöйын местнöй падежын:
вымjас, горjын;
множественнöй числоын суффикс – эз одзын:
челезнаjез, нигаjэз, гунаjэз;
 буква «т» öшöм прилагательнöйез конецын (вöсни) да заимствуйтöм кыввезын (наизусь, лиссэзвö);
 буква «дз» местын пантасьö «т»: ветчöтö (лэдзчöтö);
 буква «ы» местын «у»: гутчöтö;
 роч кылын буква «к» öшис: нига;
 буква «б» местын «г»: гумага.

Эм и ассямаыс морфология ладорсянь,
1. Послелог «вылын» употребляйтöм:
Местнöй падежын послелог гижсьö существительнöйкöт öтлаын да джендамö: горвын, кыдзвас, сьöвöмвын, изнавын.

Мöд послелоггес кольччисö сiдз жö:
пода-йывись, сы-йывись.

2. Пантасьöны парнöй глаголлэз: поткöтö-сьывö; чавкjö-кöдзö;

3. Эмöсь звукоподражательнöй глаголлэз да кыввез:
Вон воктö Паша шковасянь. Мунö и сьывö: «Тури круксö: крив-крив! Сильканыс пö лив, лив».

Кыв состав ладорсянь туйö казявны вот мый: кылын «дзел-лезысвö» пантасьö притяжательнöй суффикс -ыс-; сотчиссяс – суффикс -ис-; жагвывик – суффикс – вывик – .
Лексика ладорсянь материалыс талуння лунö представляйтö ыджыт интерес, пантасьöны историзммез да архаизммез:
 ёгпеш;
 ньöр;
 Сивиас öшöтöм кöдзан куд, сэтчин кисьтöм кöдзыс – зöр.
 Дыр, кыдз он назьмит мусö, дак сiя изöрмö да беднöйсялö, сэтöн няньыс дугдö шогмыны
 Миков вöсйöм пу тор, адззöм кытiськö öжын, мовоток, пондöм керны асвыс ководка. Ководкаас пондöм видзны пероэз, карандаш да ручкаэз.
 Мунас му понöдззас, сыбöрын бöра бöр воктö – кöдзö.
 Гришук ыстiс воныслö Краснöй Армияö грамотка.

Тексттэзын пантасьöны уна кыввез, кöдна йитöмöсь дöра кыйöмкöт:
пасма – каттьöм шöрт;
пышнасьны – нинкöмын дöраись лöсьöтны пышыннэз;
ректан – приспособленнё шöрт каттьöм понда.

Букварьлöн анализ отсалö вежöртны орфографиялiсь историческöй вежсьöм:
 Частицаэз ни, пö, эд сiя кадö гижсьöмась кырöлок пыр: пыдын-ни-пö-эд; пöрись-ни-пö-эд; мый-эд;
 Сiдзжö кырöлок пыр гижсьöны и послелоггез: виль-моз; зыпка-дынын; кöч-йывись; пипуись-пипу-дынö;
 Сочетаннё кык «чч» местаын гижсьö «тч» кольтчисö, четчавö.
Бытшöма представитöма букварьын синтаксис: Предложеннёэз пантасьöны:
 простöйöсь, однороднöй членнэз да обобщающöй кыввезöн ны дырни:
Бабаö сьывö, мöдö ваньтöтны Улюсö.
Тыр воктöм сэтчö сякöй кайыс: жоньыс, ур кай, кöрым кай, ракаыс сэтöн жö карзö.
 односоставнöйезлöн быд видыс:
назывнöйöсь:
То кöдзись. Ок, тэ кыщöм гажа – асывыс!
Ок, тэ кыщöм долыт сьöвöмвын! То Пашавöн чарва.

определённо-личнöйöсь:
Перво баитiм, мый мийö öтамöдвö сьывам. Ашын мунам видзöтны кайез, кöдна кольтчисö миянö тöвйыны. Мийö тавун шковаас баитiм пода йывись, кыдз ковö подасö дозирайтны.
неопределённо-личнöйöсь:
Кыдз сотчиссяс сартасыс, бöра вились пешöны. Воктöны только гуна дынас, а кöчыс вöвöм стопа увтын.

 пантасьöны предложеннёэз инверсияöн:
Керöмась зонкаоккез пöв, сэтчö кисьтöмась сю, да öшöтöмась кыдзвас.
 да сложнöй синтаксическöй конструкцияöн:
А тöдö ноко, мыля пожумыс, кыдз öтнас, дак паськыта паськавö, а кыдз вöрын, дак выввань кайö, а оз паськав?

«Шондi югöрлöн» содержаннё видзчисьö одзланься исследуйтöм этнография да лингвистика ладорсянь.

Литература

Лихачев М.П. Шондi югöр /М.П. Лихачев. – М., 1926.