КОМИ-ПЕРМЯЦКАЯ НАЦИОНАЛЬНАЯ БИБЛИОТЕКА им. М.П. Лихачёва

Васькина Т.А., Гуринскöй шöрöт школаись велöтiсь

М.П. Лихачевлöн повесть «Виль туйöт» абу ыджыт, но идейнöй содержаннё да художественнöй достоинствоэз сьöртi произведеннёыс бур.

Действие мунö Конановчи деревняын. Геройес – коми-пермяцкöй крестьяна ны вековöй укладöн, нылöн пырся занятиеэзöн, уджöн, бур олан йылiсь думаэзöн. И баитöны нiя сiдз, что öтамöдöс вежöртöны öтiк кывсянь, баитöны важся фразаэзöн, кöдна мыччалöны ны гöгöрись олансö.

И Лихачёв пондöтö повестьсö тöвся кымöра асылöн, пурга-падера погоддяöн, мыччалö вöррез шöрö öшöм деревня, кöдаись, кажитчö, и петны оз туй. Отирыс кошшöны туй.

А беднöй крестьяна одзын нiя куима:
или одзза моз ниртны кулаккезлö,
или мунны кошшыны бур олансö Сибирись,
или öтувтчыны коллективö.

Деревняын мунö классовöй пессьöм. И эстöн сетсьö понятие пейзажлö, кöдö гижисьыс пыртö кык могöн: öткö, мед мыччавны, что геройкöт лоö сiя жö, мый пейзажын, мöдкö, медбы сувтöтны пейзажсö морт состояннёлö паныт.

Повестяс геройес абу уна, но и ны коласын тыдалöны кык группировка: виль туй кузя мунiссез и нiя, кин нылö мешайтö строитны виль олансö.
Эна группировкаэз коласын эм морт, кöда эшö оз верит колхознöй строй победаö и мунö Сибирьö кошшыны счастье, но год бöртi локтö бöр.

Повестьлiсь содержаннёкöт тöдсасикö велöтам челядьöс составляйтны цитатнöй план. Эта уджыс сизимöт классын велöтчисьлö кöть и тöдса ни, но абу кокнит. Колö эд правильнöя бöрйыны цитата, кöда осьтö содержаннёлiсь главнöйсö.

Петö сэтшöм цитатнöй план:
I. гл. «Деревня Конановчи».
1. «Ымöтö ойтöв, уöтö, пöльтö, горзö».
2. «Майöгöн бергöтö юрас дума зыр тош Филя Андрейлöн».

II. гл. «Отирыс кошшöны туй»
1. «Мунам, Андрей, мунам».
2. «Мун нö, мун. Бур туй тэныт».
3. «Эн сет, Андрей, зонытлö воля»

III. гл. «Мося Мишка тшöктö вийны Андрейлісь зонсö».

IV. гл. «Коллектив пансьö».
1. «Медбöрьяись дзар керис Васька донаинас, макнитiс кинас да сiдз и колис гортсö».
2. «Янсöтчисö кык ёрт, кыдз пуртöн вундыштiсö нянь шöрöм».
3. «Талун мöдам организуйтны колхоз».
4. «Коллектив эм, пансис…»

V. гл. «Сьöкыт эта вöлi кадыс».
1. «Сьöкыт думаэзöн ланьтiс Андрей».
2. «Вия прокленитöм коскаöс, вуп-воп керала чёрт мильöсöс…»
3. «Чулалiс быдса месяц, кыдз öтувтчис коллектив…»

VI. гл. «Локтiс тулыс».
1. «Гажöн панталiс тулыссö вились öтувтчöм коллектив».
2. «Сьöлöм радуйтчö: сiдз и бергöтöны-уджалöны».
3. «Ашын асывсянь петам меряйтны му».
4. «Öктöны медбöрья выннысö, мöдöны паныт сувтны одзын мунiссезлö».

VII. гл. «Кулацкöй бунт».
1. «Одз талун чеччис Мося Мишка».
2. «Ответсö эта понда ни тiянлö ыджытö ковсяс видзны суд одзын».

VIII. гл. «Бунтовщиккез получитiсö заслуженнöй наказаннё».

IX. гл. «Чулалiс куим год».
1. «Вель уна вежис деревня Конановчи».
2. «Илья Васька уджалö колхозын».
3. «Ёрдöмöн колис Мося Мишкалiсь керку Öрин».
4. «Рыжык юралöм сьöртi колхоз мунö аслас виль туй вылöт».

И сiдз, мийö тöдiм, что коллектив Конановчиын пансис. Но миян, велöтiссезлöн задачаыс мыччавны, кытшöм сьöкыт вöлi нiйö панны, мыччавны, что не быдöс пыр оланас бур да волькыт, что вöлi жестокöй пессьöм кулаккез да крестьяна коласын, что коллективизация дырни и вöлiсö ошибкаэз правительство ладорсянь.

Кыдз жö чужис миян Киров нима колхоз?

Миян территория вылын (Мижуевскöй сельский совет) колхоззэз пондiсö аркмыны 1927 годö. Мижуй ладорись деревняэз пырисö Ёгвинскöй колхозö (председатель – Петров В.В.), Гурина ладорись деревняэз пырисö Белоевскöй колхозö.

1930 – 1934 годдэзö колхозлöн öння территория вылын аркмисö 11 колхоз. 1950 годсянь 1959 годöдз ныись öтлаöтöм бöрсянь кольччисö 3 колхоз:

1) « Путь Ильича» – сэтчö пырисö Алёкова ладорись деревняэз (Председатель Гуляев И.И.);
2) «Искра» – Гурина ладорись деревняэз (Председатель Нечаев Г.П.);
3) «Киров нима колхоз» – Мижуй ладорись деревняэз (Председатель Тупицын С.К.);

А 1959 г. энö колхоззэсö öтлаöтiсö. Аркмис öтiк – Киров нима колхоз (Председатель – Гуляев И.И.).

1961 г. колхознöй собраннё вылын председательöн бöрйисö Кетов Валерий Петровичöс, и сiя уджалiс юралiсьöн 1993 годöдз.

1993 – 1995 гг. – веськöтлiс колхозöн Тупицын Владимир Николаевич.

1995 годсянь уджсö организуйтö Трушников Михаил Николаевич.

Колхозын нёль производственнöй бригада, уджалöны куим МТФ, кык кукань ферма, и колхоз вöдитö порссез.

Коллективизация чулалiс, а кыдз жö сiя мунiс отир сьöлöммез пыр? Сьöкытöсь вöлiсö эна луннэс, эта кадыс. Бура мешайтiс классовöй врагыс, но «оссьö виль лун, вайö виль удж, югдöтö чужöмбан, перытсьöтö йöзлiсь вир. Пондöтчö виль олан».

Виль олансö дорöны передовöй отир. Ны коласын Рыжык.

«Дзар керан сы вылö, дак абу бытьтö и тыдалiсь мортыс, а ви-дзöтан кö сы вылö бытшöмика, сэк казялан: уна эта мортлöн вын, мывкыд, чорыта сiя тальччöм виль туй вылас. Крест пуктöма быдöс важыс вылö да оськöлöн мунö одзлань».

Рыжыклöн характеристика.

План.

1. Кин сэтшöм Рыжык?
2. Геройлöн портрет.
3. Характерлöн чертаэз: решительность, настойчивость, личнöй интерессэз общественнöй дело интерессэзлö подчиняйтöм.
4. Рыжыклöн да народлöн öтамöд дынö отношеннё.
5. Рыжык – колхозлöн юралiсь.

Урок вылын (или гортын) позьö составляйтны геройезлiсь характеристика группаэзöн:

I. гр. – Рыжыклö.
II. гр. – Илья Васькалö.
III. гр. – Филя Андрейлö.

Кыдз уджавны характеристика вылын?
1. Характеристикасö литературнöй произведеннёсис оз туй торйöтны, оз туй сiйö босьтны öтнасö. Колö вежöртны, кытшöм кад, кытöн действуйтö герой, кытшöм историческöй эпоха мыччалöм произведеннёын.
2. Осьтны геройлiсь общественнöй да семейнöй быт, сылiсь взгляддэз да привычкаэз, мöдiк действующöй лицоэз дынö отношеннё.
3. Дополнительнöй даннöйез вермас сетны портрет, сылöн баитöм, пейзаж и обстановка, кöдаын сiя мыччалöм.
4. Оз ков кошшыны геройлiсь торья качествоэз, кöдна öтамöд коласын абу йитöмöсь.

Произведеннёлöн содержаннё вылын уджалiкö позьö чулöтны викторина сэтшöм вопроссэз сьöртi:
1. Тöдны описаннё сьöртi геройсö. «Бобгöмöн петiс ыджыт мыгöра старик, паськыт, зыр кодь гöрд тоша, руд понитока. Юр вылас кышалöма пеля шапка. Öт пельыс лэдзчисьöма, мöдыс чуй керсьöм, вывлань видзöтö. Петiс да öдва столасö вуджис…»
(Филя Андрей)

«Кокас сылöн руд пимиэз, суконнöй вешьяна. Öнi сiя богатöй: деньга öксьöма сотня-мöд: вузалiс керку, пода, берсясö».
(Илья Васька)

«Баитö сiя жагöна, кыдз из тэчö сьöрсьöн-бöрсьöн додь вылö. Кыдз векнитик щеллез пытшксянь дзуз видзöны лэчытöсь, пыжьян кодь синнэз, сiдз нiя и видзöтöны – мöртчöтчöны мортыс сивиö, лöсьöтчöны каттьыны мортсö чераньвезö».
(Мося Мишка)

«Неыджыт мыгöра, вöснитик, сяркан голоса морт. Синкыммес, кыдз кöз увез, вывлань кыссьöны, чур видзöны. Синнэс учöтикöсь, перытöсь. Юрси тшöтшкöртöм, юр вылас кыдз шапкаок пукалö, дзар видзö-свиттялö, оз эд, тыдалö, дышöтчы öтпыр-мöдпыр елейöн мавтны».
(Карпунь Данько)

«Учöтсянь радейтö сiя книгаэз, бура велöтчис да кончитiс начальнöй школа. Казявтöг быдмис да лоис зэв мича зон. Мывкыда эта мортыс, уна вермас керны сылöн высиныс. Кыв кö горöтчас, кыдз черöн тякнитас да лэчыта висьталас».
(Рыжык)

«Оз сiя лысьт Андрейлö кыв горöтчыны, немись мукöд пырся леш-вош видас жöникыс. 25 год ни олö сыкöт, маитчö».
(Рыжыклöн мам)

«Эз ешты сiя висьтавны Рыжыклö, мый кылiс талун ойнас: кыдз хозяиныс да мукöдыс лöсьöтчисö сiйö вийны, кыдз перво, мед син одзись быдöс вуджöтны… Пессьö сьöлöмыс, кыдз молотоккезöн кинкö вартö кöсичаэзö, нем оз письты керны. Нырыштсис öшын косякас, сулалö, кыдз кельдöтöм лист».
(Öрин)

Неыджит проверочнöй уджöн лоас сэтшöм тест.

1. М. П. Лихачёв аслас «Виль туйöт» повестьын мыччалö:
а) революция;
б) Великöй Отечественнöй война;
в) коллективизация.

2. Кытöн мунö действие?
а) Йöг посадын;
б) деревня Конановчиын;
в) Кудымкарын.

3. Кин лöсьöтчис мунны Сибирьö?
а) Илья Васька;
б) Мося Мишка;
в) Торшенев.

4. Богаттё порйöтöны нимлун?
а) Филя Андрей ордын;
б) Карпунь Данько ордын;
в) Тувдöм Петра ордын;
г) Мося Мишка ордын.

5. Кин видзö строшнöйöн Öринöс?
а) Мося Мишка;
б) Торшенёввез;
в) Филя Андрей.

6. Кин сьöрö мунö беднота?
а) Андрей Мутшаков сьöрö;
б) Миков сьöрö;
в) Илья Васька сьöрö.

7. Муэсö локтiсö меряйтны городiсь?
а) землемер;
б) ВКП(б) ячейкаись представитель;
в) уполномоченнöй.

8. Медбöрья главаын событиеэз вотöдз чулалiс:
а) öтiк год;
б) куим год;
в) джын год.

9. Кин юралiсьыс виль аркмöм колхозын?
а) Öрин;
б) Мутшаков Андрей;
в) Рыжик.

10. Повестьын ним означайтö?
а) Отир строитöны виль олан;
б) Керисö виль туй и сы вылöт ветлöтö отир.

Ответтэз:

1(в), 2(б), 3(а), 4(г), 5(а), 6(б), 7(а), 8(б), 9(в), 10(а).

М.П. Лихачёвлö.

Тэ Йöг посадын кöркö чужин,
Оланыт эз вöв тэнат кузь.
Роман да стиххез уна гижин,
А öнi шуам тэныт: «Узь…»
Лёк враг нуöтiс тэнö гортiсь,
Он берт тэ миян дынö, он,
«Репрессия» сьöлöмö мöртiс,
И тэкöт мунiс Зубов – вон.
Миянлö кольччисö геройез:
Мирош, Öкуль, Мариш, Öгань.
Мирошсянь пышшöны Чебреннез,
А уджын ныввез – кык акань.
Оланыс виль локтiс посадас,
И абу ни Яран Гаврил.
Виль школаэз да челядь саддэз
Строитiсö кооператив.
Спасибо тэныт, дона мортöй!
Тэ вынтö эн жалейт некöр.
Сьöлöмыт пыр тэрмöтiс гортö,
Кытöн видзчисис ёрт чукöр.

Т. Васькина