КОМИ-ПЕРМЯЦКАЯ НАЦИОНАЛЬНАЯ БИБЛИОТЕКА им. М.П. Лихачёва

Мальцева В.А.,Доеговскöй школаись коми-пермяцкöй кыв да литература сьöрті велöтiсь

1936 год – «Менам зон» роман Михаил Павлович Лихачёвлöн.

1989 год – «Ыбшар» роман Тимофей Павлович Фадеевлöн.

Эна кык произведеннё коласын кузь кад – джын век. А видзöтны кö Лихачёв романö, что сэтöн осьтöмöсь 20 век пондöтчан годдэз, то лоö вежöртана: кык произведеннёын событиеэз янсöтöмöсь эшö ыджытжык кадöн 80 годöн. Но проблема, кöдö осьтöмась писателлез асланыс произведеннёын, вöлöм коми-пермяк оланас, кыдз 19 векын, сiдз кольччöм и 20 векын.
Кыкнан романсö йитö öтiк проблема: «мирон», «мироння», «мирскöй кага» - «мирской» ребенок.

Овлö сiдз: проблемнöй вопрос, кöдö осьтö аслас произведеннёын автор, сiдз или этадз, веськыта я, гöгöртöмöн я, но йитсьö авторыс оланкöт. Мый туйдöтiс Лихачёвöс осьтны миронлiсь образ – эта кольччö ме понда тöдтöм вопросöн. Матынжыкöн миян дынсянь лоöны проблемаэз Фадеевлöн «Ыбшар» романын. Мыля сiя обращайтчö мироннялöн образ дынö, вежöртöтiс менö Тимофей Павловичлöн дона ёрт и инь Людмила Петровна Ратегова: айыс Фадеевлöн 1941 годö жö вöлi вийöм война вылын. Быдмис айтöг. А учöтжык сойыс шогмис война бöрсянь миронняöн. И кытшöм сiя öтка инькалöн мужиктöм оланыс и кытшöм олан айтöм челядьлöн – Фадеев вежöртiс бура. Корсьö висьтавны, что и Лихачёвыс вöлi пыдына тöдса эта проблемакöт аслас олан кадö.

Мый эшö корис писателлезöс сувтчыны «мирскöй» образзэз вылын? Мыля нiя бöрйисö айтöммезöс асланыс произведеннёö главнöй геройезöн и решитiсö висьтасьны именно «мироннэз» йылiсь?

Доегись öтiк пöрись баб, олансö пыдына вежöртiсь, пыр успокаивайтлöм соседдэзлiсь челядьсö, мироннэсö, эттшöм кыввезöн: «Чöвö, кагаэз, эд горзö. Мироннэзвас мирыс видзсьö». Эна мудрöй кыввезын пыдын правда. Ог пырö пыдына историяö, сыын и быль вöлiсö уна примеррез, кöр историясö мирас керлiсö айтöг быдмись морттэз. Сувтчам романнэз вылын.

Лихачёвлöн Мирош зорамö и сувтö чорыта туй вылö сiя кадö, кöр миян историяын вöлi медсьöкыт этап: важ олан вежсис виль вылö. Важ порядоккезöн олан вежсис виль вылö, сiдз кыдз сiя эз удовлетворяйт обществосö, колiс кошшыны виль туй. Виль туйсö кинлöкö колiс писькöтны. Эттшöм мортнас и лöсялiс вöвны Мирошлö.

А Фадеевлöн героиня – мироння Таисья – петö оланö историялöн сэтшöм жö сьöкыт кадö: отирöс эзö пондö удовлетворяйтны колхоззэзын порядоккез. Керсис уна умöльыс. Ковсис мыйкö оланас бергöтны, думайтны виль технологияэз. Но колхозiсь юралiссезлö эз вöв охота лэдзны вожжиэсö. Том поколеннё вайö оланö виль идеяэз. А быдöс вильыс йитсьö пыр сьöкыткöт, и эта кадö ковсьö öддьöн ответственнöй морт. Сэтшöмнас и петкöтö Фадеев ассис героинясö.

Мыля мироннэз оланас öддьöн ответственнöйöсь? Пыралам Лихачёвлöн «Менам зон» романö.
Авторлöн цитата:

«Бура эшö миян коми йöз коласын видзсьö важ порядокыс: шогмас кö нывкалöн кага – сiя лоö отир насмехö, а кагалöн нимыс öтiк – мирон. Некин сiйö оз шу ас нимöн, а тöдöны мирошкоöн. Сьöкыт быдмыны сэтшöм мортлö, сералöны сiйö пöрись и том. Сiдз лоис и Мирошкöт, Öкульыс зонкöт. Дас год ни то тырö зонлö, и поп сылö пырттöнняс сетiс нимсö Мирон. Сiдз эта нимыс и кольччис пыр кежö. Дас год ни чулалiс сiя цветитан кадсянь… Пукалö то öнi öшын одзын Öкуль кисьтö синваэсö…»

И быль, лыддьöтiсь адззö, кыдз дас год ни сiйö пилитö-видö, ёрдö аймам мироныссянь. Некинсянь не сайöвт, не дорйöт абу. Зонсö вартлöм понда инька норасьö урядник Сюлепеткинлö, но отсалöм туйö сiя жö Öкуль вылын издевайтчö. Инька корö отсöт земскöй начальниксянь дорйыны сiйö насильниккезсянь, а бöрсяняс урядник, старшина да писарь сералöмöн косявлöны сылiсь заявленнёсö. Быдöс вын да правда оланас власть видзиссез киын.

Некин бердö Öкульлö лепитчыны, сiя кыдз чöвпанiсь вундыштöм шöрöм, некинлö сiйö зоныскöт жалейтны. Крепыта жмитас Öкуль ассис зонсö морос бердас, пондас малавны юрсисö, миссьöтны синванас сылiсь озъягöд тусьöн дзардан чужöмсö:
- Ох тэ, золотöй ид тусь менам, дона зонiньöй. Нем тэ эшö он вежöрт. Сьöкыт миянлö тэкöт олöмыс, арся нятя туй вылöт кыдз ми тэкöт мунамö.

Но Мирош сюсь, быдöс сiя вежöртö: «Чöв, мамук, чöв… Кöр ме быдма, сэк быдöнныслö кужа видзны паныт кыв, сэк ме некинлö ог сет тэнö обидитны. Мамук, дона тэ мамук…»
А кöр лоис ыджытжык, кöр зонкасö туйдöтiс оланас Иван Егорович – виль туй вылöт мунiсь, пондiс буржыка вежöртны Мирош, мый сэтшöм оланыс, кытöн правдаыс. Усьлiсö сылö тöдвылас кольöм годдэз, и пизис зонкаыслöн пым сьöлöмыс, лöгöн сiя тырис Яран Гавриллö, Чебрень Егорлö, урядниклö, кöдна гажöтчисö-олiсö да мый нылö колiс, сiдз и керисö, кыдз только кужисö, сiдз и кешитчисö гов отир вылын. Кыдз только эз чупкы сылiсь пым том вирсö яран Гаврил. А мымда Мирош новйöтö ас вылас видöмсö, вартлöмсö, пемыт ойлунсö… А öнi то оссисö сылöн синнэс.

Эта примерись бытшöма тыдалö, что Мирошлö бур олансö, готовöйсö, некин оз сет, некин оз дорйы не сiйö, не мамсö. Годiсь годö зонка велöтчö дорйыны асьсö ачыс, сы пытшкын содö ответственность и мамыс понда.

Кежам Фадеев роман дынö. «Ыбшар».

Чулалiсö тöв да тулыс, кыдз Таисья школа бöрсянь уджалö колхозын мамыс туйö кукань дозирайтiсьöн. Но некытöн и нем эз вежсьы: сiдз жö сулалö строиттöм ферма, кöть важыс пöрö ни, сiдз жö куканнез йирöны мусö, правленнё колхозлöн оз сет места, кытöн бы бура вердсисö куканнез, оз лэдзö и ытшкыны некытiсь турун вердöм могись. Таисья вежöртiс ни öнi, мыля пондiс шогавны мамыс, воштiс сiйö этчöдз колхозын быдöс ки вылын керан удж, сирньылöмись пессян удж, некинлö не колан удж. И дорйыны мамыс асьсö эз вермы, мужик-сайöвтiсь сылöн эз вöв, а киэз вылын – мироння, кинлö лысьтан мый шуны. Таисьялö мöдкодя керны сэсся оз туй – кольччö öтiк туй пессьöмын – асныравны. Раз колхознöй юралiссезсянь абу некытшöм отсöт, а куканнез понда сiя чувствуйтö асьсö ответ-ственнöйöн, сiя решитiс ыб вылiсь ытшкыны рудзöг, мед вердны подасö. Ытшкисьтöнняс Таисья эз и казяв бригадирöс, кöда кизявтöм пиджак полаэзнас öвтчöмöн, кыдз борддэзöн варыш, иньдöтчис веськыта сы вылö. Таисья сувтчис, жмитчыштiс быдöс вывтырнас. Кытшöмкö кадö сiя ештiс казявны вежöтöм пиннез коласын зэгалан папироса да бригадирлiсь лöг бичирöн коян синнэсö, и сы коста жö, кыдз горöн гымыштöм, сы весьтын кылiс:
- Тэ мый этö, мироння тэ, ылöсттöм юрнат керан?!

Мироння нимкодьыс сибалiс нывка бердö, кыдз кушöтöм выв-тыр бердö плеть, öзтiс сiйö перыта саймöтöм лöгöн. Бригадир нюжöтiс кисö литовка дынö.

- Видзöт, кыдз кашникыт голя вывсит лэбзяс! – Нывка киэзöн лэбтыштöм да киэзöн öдззöтöм литовка кöдзыта югйöвтiс аслас дорышöн бригадир юр вевдöрын. Öзтöм лöгсянь гыжвурыссэзöдз пизян вира, зэгалан кикока, нёштöмсялöм, сьöдöтöм да пиньласьöм чужöма, биöнмоз öгралан сина Таисья ас местас вöрöтчытöг сулавтöн видзöтiс бригадир сьöрö…

Эттшöм отчаяннöй состояннёöдз, вежöртана, нывкаöс вайöтiс бригадир, вайöтiсö колхозiсь юралiссез, кöдна понда мироння вöлi нем туйö. Но кыдзкö эд колö асьсö дорйыны Таисьялö! Мöдкодя керны сiя эз вермы. «Кеймисьны бригадирлö нимкодялöмыс бöрсянь охота эз ни вöв, и керны сымдасö нывка эз вермы. Асныраэзöн мироннэсö мыччалö кыдз Фадеев, сiдз и Лихачёв. Р. Баталова да А.С. Гантман коми-русскöй словарьын «асныравны» кывлiсь значеннёсö петкöтöмась сэтшöмö: своевольничать, упрямиться, противничать, капризничать. Ме думайта, этна романнэзын «асныралöмсö» позьö вежöртны паськытжыка: литературнöй геройез: и Мирош, и Таисья – не просто асныралöны – нiя дорйöны ассиныс достоинство, дорйöны асьнысö, кыдз морттэзöс, дорйöны право лоны му вылас морттэзöн. А то лэдзис нiйö судьбаыс мирас да вевттьöтсö ны понда эз лöсьöт. Олан туй вылас нылö надейтчыны некинлö, сысянь мироннэз öддьöн ылöсаöсь (а бригадиркöт, кöда шуö Таисьясö ылöстöмöн, миронняöн, согласитчыны ог вермö). Эта жö словарьыс «ылöса» кывлiсь значеннёсö объясняйтö сiдз: сообразительный, смышленый, умный, рассудительный. Эттшöмöсь и адззам мийö Лихачёвлiсь да Фадеевлiсь мироннэсö.

Гижиссез бура кужöны нiйö донтны. Вевдöрсяняс нiя абу басöкöсь. Зато пытшкныс басöк! Медбы мыччавны пытшксис басöксö, писателлез пыдына пырöны геройезлöн думаэзö, осьтöны нылiсь психологиянысö. Не быдыс мортлiсь шогсö да зубытсö вежöртас, сысянь геройез ас думаэзöн оз старайтчö кинкöткö торйöтчыны, а думайтöны аскöттяныс, анализируйтöны оланöт ассиныс оськöввез, отиркöт отношеннёэз, керöны выводдэз да туйдöтöны асьнысö одзлань. Думаэз нылöн сöстöмöсь, югытöсь. Ны сьöртi и тöдам, кытшöм зарниöн öгралö геройезлöн пытшк.

Вот Таисья кузь туй гортас локтiкö думайтö, кытшöм, натьтö, деревня дынас басöк рудзöг. «Охота лоис öнi жö петны эта вöрись том петассэза ыб дорö, мыдзтöг, кöть век сьöрна оськавны ны коласöт чуклясян туёк кузя, а öткоста кывзыны, кывзыны унася-уна ыбшаррезлiсь ас весьтын мыдзтöм сьылöм». Думайтöм увья нывка нельки вунöтiс ас йывсис. Ыб дорас сувтiс. Гажсянь шардöм синнэзöн пондiс видзöтны осяэз вылö. Сiя лажмыта мышкыртчис му весьтö, челядёклöн кодь учöтик ки долоньнас жагвыв нуöтiс шоныт да небыт петассэз кузя. Гажувья сiя чатыртчис, казявтöг вазьыштöм синнэзöн пондiс видзöтны вывлань…» Таисья тырö вöвлытöм гажöн! Кыдз сiя радейтö ассис дона пельöсоксö! Страницаись страницаын наблюдайтам, кыдз пыма радейтöны геройез мамнысö, донтöны сiйö. Мый вермас лоны светын донажык мамöс любитöмся? Нем! Мирош мамсö жалейтöм могись мунö строшнöявны, кытшöм бы курыт эз вöв олан, а Таисья кутчö уджавны мамыс туйö фермаö вöдитны куканнез, кытшöм бы эз вöв сьöкыт. А кытшöм öдöн нiя кутчисьöны да керöны ассиныс удж. И удж коста эз кольö нiйö думаэз. «Нiя, кыдз мошшезлöн рой, дугдывтöг бергалiсö юрын, сувтöтiсö вопрос бöрын вопрос, кыдз да мый пондыны керны одзлань…, - гижис Фадеев Таисья йылiсь. Нельки ас думаэзöн нывка дорйö асьсö. Вот сiя думайтö, что куканнез дынын уджалöм бöрсянь сiя мунас велöтчыны городö. Сэсся локтас гортас, мыччисяс рытнас отир син одзö, мед сы йылiсь думайтiсö: «Видзöтö то, миронняыс городас овтöн кытшöм лоöм. Некытчö, батя, абу торксьöм. Кöмасьöм, пасьтасьöм, да морт вылö жö топ пондöм вачкисьны. И местасö, натьтö, сэтчин, кытшöмö колö, адззис. Вот öнi сы сьöрын и вöтлiсь. А гортын овтöн сё ни бы бур морт туйö эз пуктö…»

Асланыс думаэзöн геройез кужисö асьнысö успокаивайтны, лечитны зубыт олансянь.

А вот этадз гижö Лихачёв Мирош йылiсь: «Дзар керыштiс одзас и аслыс эз веритсьы, что локтiс гортас. Гортын ме, гортын! – мель-книтiсö юрас думаэз. – Мый ни керö мамö, кыдз олiс метöг. И Маришсö адззыла… – бура эд, зубытöдз ёткöп мунiс сьöлöмыс. – Дона Маришенька, талун ме тэныт висьтала, кыдз ме тэнö радейта, – сэтшöм думаэз каттисисö Мирош юрын.

- Маму, здорово! – кыдзкö ласкова-ласкова шусисö эна кыввес. И сэсся киэсö паськöтыштiс да уськöтчис мамыс дынö…»

Медбöрья думаэз роман конецын Мирошлöн мамыс да дона Мариш йылiсь.

«…Быдöс шогыс ны йылiсь вöлi сы сьöлöмын, сы сöстöм да мывкыда юрын… Мирош пуксис öшын дорö, мöртчöтчис синнэзнас öшынö да дыр пукалiс вöрзьытöг, шысеттöг видзöтiс паськыт да тöдтöм оланö…

А ашынас …коми зон петiс ыджыт туй вылö да кокнита, югыт думаэзöн оськалiс одзлань…»
И сiдз, писателлез сетöны ыджыт дон асланыс геройезлö-мироннэзлö. Лихачёв нельки романсö шуис «Менам зон», а Фадеев нимтiс ассис героинясö «Ыбшарöн». Геройез нылöн сöстöм душаэзöн, югыт думаэзöн, ыджыт моггезöн, кужöны уджавны и любитны, донтны асьнысö, мамнысö и чужан мусö.

Оланыс подтверждайтö энö думаэсö мироннэз йылiсь. Кудымкарскöй районiсь Вылын Мыс (Высокая гора) деревняын, кытöн ме чужи, быдмисö Великöй Отечественнöй война бöрсянь даскык мирон да мироння. Быдöнныс нiя оланас получитiсö образованнё да кытшöмкö специальность. Вöлiсö öддьöн уджалiсьöсь, но оланас скромнöйöсь. Нiя и öнi бура уджалöны быдкодь профессияэз сьöртi. Ны коласiсь и ме, тожö старайтча керны ачым аслым туй.

Юсьвинскöй районын Доег посадын, кытöн öнi ме уджала, олöны 25 морт мироннэз да миронняэз. Ны коласiсь нёль морт высшöй образованнёöн, 15 гöгöр среднеспециальнöй образованнёöн, мöдiккеслöн сельскöй хозяйство понда специальносттез. Эна «мирскöй каббез» немöн не умöльжыкöсь мöдiк отирся. А мукöд местаас пытшкнаныс эшö басöкжыкöсь. Босьтам Мальцева Альбина Александровнаöс. Уджалiс школаын учительницаöн, образованнё аслас высшöй, быдтiс куим челядьöс, быдöнныс вежöраöсь, кыдзи мамныс жö (öтiк ны коласiсь – Мальцев Герман Иванович). Öнi Альбина Александровна пенсия вылын ни, но сы пытшкын сё югыта сотчö биок, сiя посадас керö быдкодь общественнöй удж.

Якимова Полина Васильевна – вöвлi одзжык колхозас медответственнöй бригадирöн, öнi фермаын заведующöй, сылöн быдлаын порядок.

Аксёнов Николай Сергеевич – колхозiсь шофёр – бытшöм лола морт, уджалöм понда наградитöм Дружба орденöн и Трудовöй Знамя орденöн.

Мальцева Надежда Юрьевна – школаын велöтiсь, высшöй образованнёöн, öддьöн умнöй, порядочнöй морт быд ладорсянь. Бытшöм семья. Таво медыджыт зоныс кончитiс МВД-лöн Московскöй юридическöй институтлiсь Пермскöй филиалiсь факультет, получитiс специальность «юриспруденция».

А мымда мироннэзöн быдмытöн нiя сьöд луннэсö адззылiсö! Надежда Юрьевна висьтасьö: «Быд ладорсянь челядь кадö чувствуйтi айтöм олансö, униженнёэсö быдлаын дорыштiсö, кыдзкö да старайтчасö дойдны, öбидитны…»

Якимова Полина Васильевна баитö: «Видлiсö мироннэсö бура инькаэз нiя мужиккезлöн, кöднасянь мийö вöлiм. Айтöммес бура уджавлiсö, учöтсянь ме кыскалi турунъюррез, кöть вöлi нывка. А öтпыр öтiк мужик менам вöвлö бытшкис вилаöн. Вöлыс чепöссис, ме таралi вöлыс бöрö, турунюрыс ме вылöт мунiс».

Мальцева Мария Дмитриевна йылiсь соседдэс висьтасьöны (вöлi школаын велöтiсьöн, öнi абу ни ловья): шогмöм пö сiя миронняöн, мамыс лэдзчöтöм ю дорö, мöдöм чапкыны отир сералöмсянь, да дедыс абу лэдзöм, гижöт пö ме вылö кагатö, ась пö Дмитриевна лоас, а кыдз пö гижан Мария Внебрачная, сэк пö сю жизь пондасö серавны.

Ассяням содта сiйö, что мироннэзлöн только сiя и вöлi ним: мирон, мироння, миронята, мирскöй каб. И мый бы умöльыс эз шогмы деревняас, гусяласö я мыйкö кинлiськö, жугöтасö я, кань я, дзодзог я öшас, – сё ни мирскöйлö кышаласö, а мамсö леш-вош ругайтасö.

Великöй Отечественнöй война бöрын быдмис быдса поколеннё айтöм челядьлöн. Эта вöлi общегосударственнöй проблемаöн. Но айтöм челядь вылö позис надейтчыны, нiя оланас самостоятельнöйöсь, мунöны одзлань асланыс решимостьöн, некин одзын и некöр оз унижайтчö. И нылö эм мыйöн гордитчыны, нiя оланас пырöтчöны асьныс, сiдз кыдз надейтчыны немлö и некинлö. Быдöс этö отсалöны вежöртны отирлö М. Лихачёвлöн да Т. Фадеевлöн романнэз «Менам зон» да «Ыбшар». Нiя лэбтiсö дон мирскöй челядьлiсь, сувтöтiсö нiйö ордчöн аяэзкöт, осьтiсö ны ловлiсь богатство.