КОМИ-ПЕРМЯЦКАЯ НАЦИОНАЛЬНАЯ БИБЛИОТЕКА им. М.П. Лихачёва

Исакова А., г. Пермь /ПГПУ/

Талун челядь оз любитö лыддьöтны. Ми асьным босьтам книга и медперво видзöтам, кыдз сiя гижöм: интереснöя ли? Кокнита ли лыддьöтсьö? Кытшöм кылöн гижöм? Сійöн первоосноваöн произведеннёын лоö кыв. Сiя отсалö мыччавны образзэз, геройезлiсь дей-ствиеэз, осьтны произведеннёлiсь думасö, адззыны быдкодь йитан средствоэз.

Школаын кыв да литература велöтiкö, ми ог вермö торйöтны энö кык дисциплинасö. Дидактическöй материал коми-пермяцкöй учебниккезын сетöм унажыксö роднöй литератураись. Причинаэзöн эта понда лоöны:

1) миян кылын книжнöй стиллезiсь представитöм бура дзир художественнöй стиль;
2) составителлезöн учебниккезö пыртöмöсь литературнöй тексттэз, кöдна нöбöтöны воспитательнöй да эстетическöй функцияэз.

Асланам уджын ми пондывлам мыччавны, кыдз туйö йитны öтiк урок вылын материал роднöй кыв да литература сьöртi. Эта понда ми босьтiм витöт классiсь программнöй произведеннё М.П. Лихачёвлiсь «Озъягöдок», кöда вылын туйö чулöтны обобщающöй урок «Синтаксис да пунктуация» тема велöтöм бöрын.

Тема «Синтаксис да пунктуация» велöтöм понда сетсьö 10 час. Сы чулöтöм бöрын велöтчиссез долженöсь тöдны сэтшöм понятиеэз, кыдз: словосочетаннё, предложеннё, предложеннёлöн главнöй да второстепеннöй членнэз, сложнöй предложеннё, обращеннё, прямöй да косвеннöй сёрни, диалог, текст. А сiдзжö челядь долженöсь кужны сувтöтны предложеннёын колана знаккез.

Медодз велöтiсь сёрнитö велöтчиссезкöт, мый отсалö вежöртны, кыдз усвоитöм понятие «текст»:

−Мый ми шуам текстöн? Докажитö, что тiян одзын текст. Кытшöм признаккез сьöртi эта тыдалö?
−Кыдз тi определитат текстлiсь тема?
−Кытшöм основнöй дума пыртöм текстö?
−Богат ли гижисьлöн словарнöй запас? Докажитö.

Уроклöн мöдiк этапöн лоас упражненнёэз вылын удж, кöда мыччалас, кыдз челядь вежöртiсö велöтöм тема.

1. Сетöм предложеннёэсö янсöтö словосочетаннёэз вылö. Висьталö, кытшöм сёрни торöн сетöм главнöй кылыс.
1) Федя мунö одзас. Некинлö оз сет медодзза нырсö.
2) Онiсь кыдз саймис ягöдок.
3) Локтiс ягöдокыс дынöдз ни.
4) Ыджыт эд кинкö локтiс бекöр дынас, аслас киас кружка.

2. Гижö сетöм предложеннёэз, бöрйö предложеннё членнэз сьöртi, составитö нылiсь схемаэз.
1) Шонытöсь да мичаöсь сулалöны луннэс. 2) Ылын кытöнкö пондiс кывны уксöм, аксöм. 3) Матынжык и матынжык пондiсö кывны голоссэз. 4) Бöра садьыс сылöн бырис.

3. Гижö сетöм предложеннёэсö однороднöй членнэзöн. Соответствуйтöны ли предложеннёэз дынö сетöм схемаэз.
1) Шонытöсь да мичаöсь сулалöны луннэс. ( да )
2) Полöмöн гöрд юроксö пыдöжык сюйыштiс лöз лист увтас, дзебсисис. ( )
3) Видзöтö ягöдок да думайтö, мый сыкöт лоас одзлань.
(да)

4. Лыддьöтö предложеннёэз правильнöй интонацияöн. Сувтöтö предложеннёэзын обращеннё дырни знаккез.
1) Видзöтö жö, видзöтö мый ыждаö ме ягöдсö адззи!
2) Сеня-а-а! Татчö локтö, лог дорас.
3) Сымда эд мийö, тыдалö, и олiмö, дона ягöдокиньöй.

5. Лыддьöтö сетöм текстсö выразительнöя. Сувтöтö диалог дырни колана знаккез, объяснитö нiйö.

Сы коста сылö кинкö чувйыштiс бокас да шуö:
−Сымда эд мийö, тыдалö, и олiмö, дона ягöдокиньöй.
Дзар керис ягöдок, нем эз адззы, а голоссö кошшö. Сы кодь жö кинкö баитö:
−Мыля? Кытöн мийö? – юасьö голосыслiсь ягöдок.
−Öктiсö миянöс быдöннымöс да нöбöтöны кытчöкö, – шуö сылö бöра голосыс. – Овсис, тыдалö, миян. Эг ештö и гажöтчыштны, мымда колö миянлö мича шондi увтас.

6. Адззö сложнöй предложеннёэз. Объяснитö ныын знаккез, составитö схемаэз.
1) Дзар керис ягöдок, нем эз адззы, а голоссö кылö.
2) Югыт только лоис сы гöгöр, кöр садясис да осьтiс синнэсö ягöдок.
3) Нет, батя, не сiдз вöлöма…

Видзöтöм упражненнёэз интегрированнöй урок вылын отсалöны анализируйтны произведеннёлiсь кыв, зорöтны интерес сы дынö, зорöтны велöтчиссезлiсь творческöй инициатива, паськöтны челядьлiсь кругозор.