Главная » Статьи » Лихачевские чтения II

Коми-пермяцкöй ойконимия йылісь

Аксёнова А.П., к.ф.н., ст. научный сотрудник Коми-Пермяцкого ООН ЯЛИ КНЦ УрОРАН

Коми-пермяцкöй ойконимия йылісь

 

            Наука ономастика кыдз «искусство сетны ниммез» да сылöн тор, ойконимика, «быдкодь оланіннэзлöн (поселеннёэзлöн) ниммез йылісь наука», греческöй кылісь (Подольская 1988:96, 89). Ономатика йитöм отирлöн культуракöт, историякöт, географиякöт, языкознаннёкöт.

         Коми-пермяцкöй ономатикалöн эм аслас история, историография. Медодзза коми топониммез-ойкониммес фиксируйтöмöсь путешественниккезöн да историккезöн летописсезын, важ акттэзын, картаэзын, писцовöй книгаэзын, да мöдік историческöй документтэзын.

         Исследуйтісö коми ономатикасö Александр Михайлович Шёгрен (1794-1855) (Федюнёва: 563-565), Иван Николаевич Смирнов (1856-1904), Наркис Константинович Чупин (1854-1916). Коми ниммез чукöртöмöсь Александр Алексеевич Дмитриев (1854-1902) да Василий Васильевич Шушонко (1831-1889) «Пермскöй летопись» да «Пермскöй старина» книгаэзын. Нія систематизируйтісö М.Ф. Кайсаровлісь, И. Яхонтовлісь переписсез (Дмитриев, 1889-1900, Шишонко, 1981-1987).

         Медплодотворнöй советскöй периодö зорöтісö коми ономатикасö Александр Фёдорович Теплоухов (1880-1943), коми-зырянскöй учёнöйез Василий Ильич Лыткин (1895-1981), Адольф Иванович Туркин (1936-1996) (Федюнёва 1998: 241-243; 497-498), коми-пермяцкöй гижись Василий Васильевич Климов (чужис 1927-й годö) и, конечно, тöдчана коми-пермяцкöй учёнöй Антонина Семеновна Кривощекова-Гантман (1921-1995) (Федюнёва: 72-74).

         Ономатика сьöрті А.С. Кривощекова-Гантманöн лэдзöм 35 статья да книга, чукöртöм ПГПИ-ись коми-роч отделеннёлöн студенттэзкöт богатöй материал, керöм быд ономастическöй раздел сьöрті почти быд вида анализ, сідз кыдз сія вöлі филолог, коми кыв тöдісь. Эта статьяын пондылам пыдынсьöтны статистическöй да этимологическöй анализзэз.

         Елена Николаевна Полякова этимологизируйтіс мукöд пермскöй географическöй терминнэз да фамиллёэз (Полякова 1988, 2001).

Öння кадö исследуйтöны коми ономастикасö Афанасьев А.П., Аксёнова О.П., Мусанов А.Г.

Коми округлöн ойконимия озыр (богатöй), аскодьöма. Сідз, 1926-öй годся Коми-Пермяцкöй национальнöй округлöн перепись сьöрті (Ф. 20. 0.1. Д.55), фиксируйтöма 1483 населённöй пункт. Öння кадö функционируйтöны 701, ны коласын 1 астионим – город Кудымкар, 700 комоним – сельскöй населённöй пункт.

Колö висьтавны, что сэк эшö эзö пырö анализируйтан субъектö вит волость.

Топониммез лоöны быдкодь этноссэзкöт контакттэз йылісь колана информационнöй источникöн. Например, сэтшöм деревняэзлöн ниммез, кыдз: Вылісь Пляково, Улісь Поляково, Поляки, Рочево, Вотиново, Вотяк, Отево (удмурттэзлöн вотяк, отяк ниммез сьöрті), Зыряново, Зюзин, Зюзьдин, Йöг (угррез), Лопвадор (лопь «сааммез»), Мараты (маара «мариеццез»), Модвино, Мосино (угорскöй фратрия мось сьöрті), Яранёво, Яранькино (Яран морт нимсянь).

Кыв происхожденнё сьöрті торйöтам ойконимиясö вит источник вылö: 1) прауральскöй, уральскöй; 2) финно-угорскöй (öтласа пермскöй, öтласа коми, коми-зырянскöй, коми-пермяцкöй, удмуртскöй; 3) роч; 4) тюркскöй; 5) западно-сибирскöй.

Прауральскöй кыв эпоха дынö позьö вайöтны формант кам Кама посад да деревня Камашор ойкониммезын, ср. удм. кам «ыджыт ю», фин kymi «ю, поток», угор. kam «сöстöм», тюрк. kam «ыджыт канал», индоевропейскöй kem, kom «ляпкöтны» (Мурзаев 1984: 247-248).

Миян представленнёэз сьöрті, уральскöй (öтласа финно-угорскöй да самодийскöй) кыв кадісь Кубень деревнялöн ним: гöп «учöт ты, пыдынін», удм. гоп «яма, ложбина, углубление», мар. куп «болото», общеперм. дор «ямка», саам. диорре «пещера», фин. kuoppa «яма» (Афанасьев 2002: 29).

Удмуртскöй увтыррезлöн ниммез бöдья, жыкъя, жикйа (Атаманов 2001: 38, 49) вежöртöны öтласа пермскöй (коми-зырянскöй, коми-пермяцкöй, удмуртскöй, субстрат: д.Бодич, д.Жигинова). Нылö соответствуйтöны коми-пермяцкöй нимкоддез.

Медуна, конечно, öтласа коми происхожденнёа кыввез: д.Бадья, д.Нятино. Торйöтам ас (собственно) коми-пермяцкöй да ас (собственно) коми-зырянскöй кыввез: кп. д.Балина, д.Вилиб, кз. д.Войвыл (вой «ой»), д.Пугыр (пугыр «песока, невöтяна остров но поймаын) (Кривощекова-Гантман 1983: 138).

Финно-угорскöй происхожденнёа примеррезись позьö торйöтны удмуртскöй топониммез: д.Вырово, удм. выр «керöсок» (Лобанова 2006: 152), д.Вотяк (воть, вотяк – удмурттэзлöн роч дореволюционнöй этноним).

Пантасьöны карело-вепсскöй этимологияэз: п.Кебраты (кар. корби «сыспуа нюр»), Юрла (юр «вылын листа», кар. ла «места») (Лобанова 2006: 191, 161).

Угорскöй (ханты-мансийскöй) субстрат последовательнöя адззам ойвылын, Кочёвскöй да Косинскöй районнэз территория вылын: Коса посад (манс. хоса «кузь, дыр кыссяна ю»), п.Сяпар (манс. сёпыр «дозмöр») (Лобанова 2006: 163, 183).

Мöд места лыд сьöрті роч топониммезлöн, кöдна концетрируйтöмась роч Юрлинскöй районын: Усть-Березовка, Серебрянка.

Паськыта пантасьлöны и тюркскöй ниммез: п.Солым, ср. тюрк. Ним Салим, Салым, тат. Салым «налог, оброк, налоговöй, оброчнöй» (Кривощекова-Гантман 1983: 144), д.Шайтаново, ср. тюрк. шайтан: 1) сатана, дьявол, демон; 2) совраститель, соблазнитель (Хамзин 1965: 708).

Сідзкö, ономастиканын кольччис быдкодь када важыс (архаичностьыс). Сідз, мукöд топонимическöй единицаэзын, адззам диалекттэз понда, öння кыв понда, öшöм ним кыввез, кывлöн аскодьöммез. Нижнеиньвенскöй диалект вылын важын ни функционируйтö роч гора керöс кыв туйö, но географическöй термин кольччис Юрманка керöс микротопонимын.

Вермисö бы вильсьöтны öння коми-пермяцкöй словарь диалектнöй да важмöм кыввез, кöдна пантасьöны деревняэз ниммезын: дзиткай « большая синица» (д.Зиткаева), лигыр «дуга» (д.Верх-Мега), турöп «пурга» (д.Турöп), ябыр «дрозд» (д.Ябурова) и уна мöдік кыввез.

Унажык топониммес аркмöмась морт нимсянь, нимкодьсянь, увтырсянь. Мукöд дифференцированнöй признаккес сідзжö абу фиксируйтöмöсь öння словарьын: байбак «лодырь» (д.Байбак), кокуй «öтка морт» (д.Кокуй), мижуй «жаг морт» (д.Мижуй), мисуль «несöстöм морт» (д.Мисуль), мурмар «небаитöсь морт» (д.Мурмарова), чемез – увтырлöн ним (д.Чемизова) и сідз одзлань.

Сідзкö, коми-пермяцкöй ономастикалöн коми-пермяккезлöн этногенез видзöтöмын да кыв зорöтöмын ыджыт дон.

 

Литература.

  1. Атаманов М.Г. По следам удмуртских воршудов. – Ижевск, 2001.
  2. Афанасьев А.П. Топонимия Европейского Севера России. – Сыктывкар, 2002.
  3. Баталова Р.М., Кривощекова-Гантман А.С. Коми-пермяцко-русский словарь. – Москва, 1985.
  4. Дмитриев А.А. Пермская старина. Вып. 1-8. – Пермь, 1889-1900.
  5. Кривощекова-Гантман А.С. Географические названия Верхнего Прикамья. – Пермь, 1983.
  6. Лобанова А.С. и др. Труды Института языка, истории и традиционной культуры коми-пермяцкого народа Вып. IV. – Пермь, 2006.
  7. Мурзаев Э.М. Словарь народных географических терминов. – Москва, 1984.
  8. Подольская Н.В. Словарь русской ономастической терминологии. – Москва, 1988.
  9. Полякова Е.Н. От «арианы» до «яра». – Пермь, 1988.
  10. Полякова Е.Н. К истокам пермских фамилий. – Пермь, 1997.
  11. Федюнёва Г.В. и др. Коми язык. Энциклопедия. – Москва, 1998.
  12. Хамзин К.З. Арабско-татарско-русский словарь. – Казань, 1965.
  13. Шишонко В.Н. Пермская летопись. – Пермь, 1881-1887.

 

Архивнöй материаллэз:

Коми-Пермяцкöй окружнöй государственнöй архив. Фонд 20. Опись 1. Дело 55.

         Джендöтöммез:

Д. – деревня                                   П. – посёлок

Кар. – карельскöй                         Саам. – саамскöй

Кз. – коми-зырянскöй                   Тат. – татарскöй

Кп. – коми-пермяцкöй                   Удм. – удмуртскяй

Манс. – мансийскöй                       Угор. – угорскöй

Мар. – марийскöй                          Фин. - финскöй

Общеперм. – общепермскöй

Категория: Лихачевские чтения II | Добавил: Библиотека (22.10.2018) | Автор: Библиотека
Просмотров: 393 | Теги: Лихачев М.П., Коми-Пермяцкая библиотека, Лихачевские чтения II, коми-пермяцкий писатель, коми-пермяцкий язык, Коми-Пермяцкий округ | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]