Главная » Статьи » Лихачевские чтения II

М. Лихачев кыдз вуджöтісь

Кольчурин В.Г., «Парма»  газетаись корреспондент

М. Лихачев кыдз вуджöтісь

(Касьтылöммез)

Ог согласитчы сэтшöм мненнёöн, что не быд мортын пукалö талант. Этö не сідз. Эмöсь миян коласын мастеррез, кöдна киись петö быдöс, эмöсь бытшöм артисттэз, враччез, трактористтэз, поваррез и с.о. но оз ков вунöтчывлыны, что бöра жö миян коласын пантасьлöны нія, кöдна талантливöйöсь быдöсын. Этадз позьö шуны и М.П. Лихачёв йылісь. Мийö тöдам, что сія вöлі бур велöтісьöн, журналистöн, гижисьöн. А талун дженытика сувтчам сы йылісь кыдз вуджöтісь йылісь. Быд морт тöдö, 20-öй векся 20-öй годдэзö Коми округын эз вöв литература. А эд коліс осьтны школаэз, мед велöтны грамотаö отирöс. Кыдз петны сьöкыт ситуацияись?

Решеннё вöлі адззöм неумöль: вуджöтны роч литературнöй произведеннёэз коми-пермяцкöй кыв вылö. И эта некокнит удж бердö кутчисьöны талантливöй коми-пермяккез, кöдна коласын вöлі и Михаил Павлович.

Кежавны кö окружнöй библиотекаö да окружнöй музейö, позьö адззыны не только коми-пермяцкöй кыв вылын эта гижисьлісь книгаэз, но и азбукаэз, букваррез, учебниккез. Мый диво, книгаезын неетша произведеннёз роч авторрезлöн, кöднö вуджöтöма коми-пермяцкöй кыв вылö М. Лихачёв. Ны коласын проза, кывбуррез да сказкаэз А. Пушкинлöн, М. Лермонтовлöн, Н. Некрасовлöн, А. Бартолöн, К. Чуковскийлöн, Н. Островскийлöн и с.о.

Лыддьöтан – сьöлöм радуйтчö. Эшö бы! Этö, натьтö, сійöн, что М. Лихачёв бура тöдіс мам кывсö, сылісь особенносттез, кужис адззыны колана кыввез, рифма, размер, эз öшты логическöй удареннё. Кокнита нія лыддьöтсьöны эшö и сійöн, что вуджöтöмöсь простöй кылöн. Эта баитö сы йылісь, что сія морт талантливöй.

Кыв-мöд эшö сыöн вуджöтöм произведеннёез сьöрті. Кöр лыддьöтан кытшöм-либо произведеннё роч авторлісь коми-пермяцкöй кыв вылын, сьöлöм корö эшö и эшö бертны сы дынö. Натьтö, бöра жö сійöн, что текстын неетша меткöй метафораэз, эпитеттэз, сравненнёэз. А мед этö вöлісö не пустöй кыввез, босьтам öтік произведеннё и вайöтам пример туйö.

 

А. Пушкин

Лöз море дорын дуб зелёнöй

Лöз море дорын дуб зелёнöй,

Цепь золотöй эм сы гöгöр:

И ой, и лун пыр кань учёнöй

Цепь кузя ветлö одз да бöр.

Веськытлань мунö – песня сьылö,

Шульгалань – сказка шогмö бур.

Тыр чудесаэз: вöрись кылö,

Русалка мыччöм ассис юр.

И эмöсь тöдтöмöсь туёккез,

Адззывтöм зверьлöн сэті след.

Сулалö керку курöг кока,

Ыбöстöм и öшынтöм, сьöд.

Сук вöр берсяöн сэтчин тырöм.

Асывнас сэтчин ваöн тырö

Песока берегыс, пустöй,

Куимдас витязь тіян одзын

Петöны сöстöм ваись лёдзöн

И ныкöт дядька эм морскöй.

И королевич, боки мунтöн,

Лöг царьöс босьтны пленö лют.

Пантасян сэтчин и колдункöт,

Кымöрсис сійö тэ он кут –

Нöбöтö богатырьöс чуд.

Тюрьмаын царьлöн ныв тужитö,

Сэтчин кöин сылö служитö.

А баба-шорикалöн гыр

Ыскöвтö одзлань шыр да шыр-р…

Кощей стрась косьмö зарни дорын,

Дух русскöй сэтöн… Русьлöн горыс!

Ме вöлі сэтчин, юи ма;

Эм море дорын дуб зелёнöй;

Пукаліс увтас кань учёнöй,

Висьталіс сказкаэз уна…

                                            Вуджöтісь М. Лихачёв

 

Кольччö висьтавны медбöрын öтікö: эд полö öштыны кад, решитат кö кежавны окружнöй библиотекаö али музейö. Оз ло сомненнё, что эта бöрын тіянöс пондас кыскыны сэтчин эшö и эшö.

Категория: Лихачевские чтения II | Добавил: Библиотека (11.10.2018) | Автор: Библиотека
Просмотров: 25 | Теги: коми-пермяцкий писатель, Коми-Пермяцкая библиотека, Лихачевские чтения II, Коми-Пермяцкий округ, Лихачев М.П., коми-пермяцкая литература конца хх | Рейтинг: 5.0/1
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]