Главная » Статьи » Лихачевские чтения II

Михаил Павлович Лихачёв творчествоын журналистикалöн роль

Коньшина Е.И., поэтесса, журналист,главный редактор газеты «Иньвенский край» (г.Кудымкар)

« Я чувствовал, что мы люди непригодные для настоящего момента, что жизнь захлестнёт своими волнами, …невозможно в деревне здраво мыслить о происходящих событиях…»
(Автобиографияись)

Михаил Лихачёвлö журналистикаын удж унаöн отсалö зорамны прозаын.

Окружнöй газета «Гöрись» редакцияын Лихачёв уджалö 1926 – 1930 годдэзö. Эта кадö сія и пондö унажык гижны. Сідз 1928 годö, кöр, кыдз страна пасьта, сідз и округын пондісö оссьыны медодзза колхоззэз, Михаил Павлович гижö повесть «Виль туйöт», кытчö пыртö уна мый фольклорись, кöдö öктö округ пасьта газетаын уджавтöн. Сэкжö гижö и рассказзэз: «Кресттöм», «Икота», лирическöй поэма «Козинтöг».

Колö висьтавны, что эта удж öддьöн отсалö творчествоын. Журналист гижö статьяэз газетаö, а сёр рытöн лов кыскö гижны не ни кывбуррез (мыйсянь пондöтіс ассис творчество), а рассказзэз, ыджыт произведеннёэз, сідз кыдз журналистика мунö ордчöн прозакöт. А темасö сетö олан, и вились, кыдз уджлö, сідз и творчестволö. Лихачёвлöн девиз – быд лун, кöть öтік, но колö, мед лоис гижöм строка. Гижись веритö бытшöм лоан кадлö. Историческöй справкаэз сьöрті тöдчö, что коми-пермяклö овсис умöля революция вотöдз. Грамотнöй йöз, а нія, кыдз адззам, вöлісö етша эта кадö коми-пермяккез коласын, сьöлöмсянь надейтчöны, что революция ваяс беднöй мортлö виль олан. И сія, коліс бы, мед вöлі кокнитжык одззася.
Михаил Павлович Лихачёв вöлі грамотнöй, вежöра мортöн. Газетаын уджавтöн, округ пасьта ветлöтікö, сія адззис, что и виль властьыс дырни коми мортлö овсьö некокнита: тшыг олан; быдкодь шогöттэзсянь кулöны отир (и ыджыттэз, и челядь). Но, öткö, политикаыс, вилькодь оланыс корисö бытшöма гижны виль власть, виль веськöтліссез йылісь (вöлі сэтшöм идеология), мöдкö – всё жö веритöм буржык лоан кадö. Михаил Лихачёв гижö сы йылісь, кытшöм умöльöсь «богаттё», а газетаын быд лун осьтö югыт туй виль оланлö: геройез – бедняккезісь да середняккезісь передовöй отир, бытшöм велöтіссез; виль колхознöй олан, ыджыт событие - Ильичлöн лампочка. «Виль би» йылісь коми-пермяцкöй основоположник öддьöн шоныта гижö кывбурын, кöдалö и нимсö сетö сэтшöмö жö. Кытшöм ыджыт гаж отирлöн, и öтлаын, не öтік сотня мымда йöзкöт гажöтчö и шонді: «…И шонді вылісянь сералö, буражыка сотö, содтö вын. «Ура» горöнжыка горалö. Ми дорам ёна, сьöлöм пым»!

Сія кадö крайись патриоттэзлöн, а ны сайсянь и отирлöн оптимизм тöдчö быд оськöлын.
1928 годö Лихачёв козьналö кузь кывбур газеталö. Кывбур тырöм быдкодь эмоцияэзöн, кытöн гижись газетасö сравнивайтö: «паськыт бикöт» (локтö вöррез пытшкöт отир дынöдз), «зікöт» (бытшкö мукöд мортсö зубыта умöль удж понда), «ньöвьёськöт» (лэбзьö öддьöн ылö и адззö аслыс горт деревняын) и велöтіськöт (« …Дак велöт, велöт, кин пемыт, китöм, кывтöм, велöтісь. Талун горöн иньда тэныт пым юöр, виль югдöтісь»).

И всё жö, мед и öзйис «Ильичлöн лампочка», беднöй мортлöн лоис воз-можность велöтчыны гижны да лыддьöтны, светö пондісö петны книгаэз да букваррез, олан и сэк вöлі öддьöн сьöкыт, тöдтöм да повзьöтчана. Эд не весь Лихачёв гижö автобиографияын, что творческöй йöз оз лöсялö эта кадлö. Творческöй мортлö быд кадö матын эта думаыс. Сія оз вермы примитны мирсö, олансö нія проблемаэзöн, кöдна эмöсь эта кадö.

Но сэк, натьтö, М.П.Лихачёв эз ешты унасö думайтны сьöкытыс йылісь да повны сыись. Сылö просто вöлі некöр. Том зон шыасис кадлöн корöмлö. Этö вöлі сылöн кад, и сія эз вермы мöднёж. Не кинлöкö, а сылö вöлі сетöм природаöн лоны одзын коми-пермяцкöй кыв да литература зорöтöмын. Эд эта мымда коліс керны и сы ыжда ответственность – велöтны отирöс кужны лыддьöтны да гижны. Современниклö кольччö дзир дивуйтчыны, кытісь Михаил Павлович аслас ёрттэзкöт адззис кад, мед организуйтны ликпункттэз, ветлыны деревняэзö, мед öктыны фольклор, а эшö баитны отиркöт виль олан йылісь, грамота йылісь и конечно жö, гижны: кывбуррез, рассказзэз, поэмаэз, повесттез. Сія, кыдз бытьтö тöдіс, что кадыс сылö сетöм етша овны эта светын, и пессис керны быдöс перытжыка.

Михаил Павлович öзтіс бичирсö коми-пермяккез сьöлöмын, висьталіс нылö: «Тіян эм сэтшöм дона козин – асланыт мам кыв», и мымда ештіс, мыччаліс, кыдз колö этö козинсö берегитны, зорöтны.

Репрессияэз коста, вира годдэзö вийисö не только Лихачёвöс да сылісь ёрттэзöс. Кусіс öд и национальнöй культура зорöтöмын. Оз туй висьтавны, что сія öшис . Сія олö и оз бы кольччы олансянь, но оз вермы лоны ыджыт биöн, мед öгравны югыта, мед мыччавны коми-пермяклісь вын. Сэк, кöр мыччисис миян асланым письменность да пондіс зорамны коми-пермяцкöй литература, мам кыв пондылісö керны государственнöйöн, но öзтöм бичир кусіс бöр. А мый жö лоас одзлань?

Вторые Лихачевские краеведческие чтения

Категория: Лихачевские чтения II | Добавил: Библиотека (21.07.2016) | Автор: Библиотека
Просмотров: 13 | Теги: Лихачев М.П., Коми-Пермяцкий округ, Литература, Лихачевские чтения, Пермский край, коми-пермяцкий язык | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]