КОМИ-ПЕРМЯЦКАЯ НАЦИОНАЛЬНАЯ БИБЛИОТЕКА им. М.П. Лихачёва

ТАТЬЯНА САВЕЛЬЕВАЛŐН НОВЕЛЛА «ЛЫСВА ВОТТЕЗ» ЙЫЛIСЬ…

Боталова Валентина Георгиевна,

учитель русского языка и литературы, МБОУ «Тукачёвская ООШ», п. Тукачёво, Юсьвинский м. о., Пермский край

Май месяцö 2021 воö газета «Кама кытшын» вöлi печатайтöм Татьяна Савельевалöн прозаическöй   произведенне. Автор жанрсö эз определит, но сюжет сьöртi «Лысва воттез» - этö классическöй новелла. Этö медодзза новелла, кöда гижöм коми-пермяцкöй кыв вылын. Эм эшö новелла коми-пермяцкöй литератураын, кöдö гижис Александр Шадрин. Но А.Шадринлöн новелла «Звездопад» гижöм роч кыв вылын (газета «Парма» №91 май 6 лунö 2000 во). Эта новеллаись герой пантасис призраккезкöт. Эна призраккес – вий-öм военнöй отир быдкодь кадicь и нельки историческöй эпохаись: скиффез, монголо-татара, русиччез, немецкöй рыцаррез, колчаковскöй офицеррез, комиссаррез, летчиккез, танкисттэз, артиллеристтэз, партизаннэз, разведчиккез, омоновеццез и десантниккез. Нiя пöрисö призраккезö, сiдз кыдз эзö вöлö дзебöмöсь. Автор лэбтö   важнöй проблема: политиккезлöн да дипломаттэзлöн ошибкаэзсянь öзйöны войнаэз…

Но ошибкаэсö керöны не только политиккез да дипломаттэз, а и быд мортлöн кузь либо дженыт олан коста нiя сiдзжö уна. Кин веритö Енлö, сiя ветлывлö вичкуö, юрбитö Енлö, участвуйтö быдкодь обрядын, бура вежöртö ассис греххесö и старанне ыджытö пуктö, мед исправитчыны. Еныс быдсö веж- öртö, кöть кытшöм кыв вылын ми бы сы дынö эг шыöтчö молитваöн. Сiя быдöннымöс радейтö. Сiйöн, Енлö веритöмöн, кокнитжык овны и дзимлявны быдкодь сьöкыт проблемаэз. Но не быд морт веритö Енлö. А ежели эшö сы понда некин оз юрбит, то сэтшöм мортыслö колö надейтчыны дзир аслас вына характер вылö.

«Лысва воттез» новеллаын медшöр герой Лена учöтсянь лоис сиротаöн, быдмис баб да дед ордын. Дедыскöт нылочка пыр ветлывлiс вöрö то ягöдла, то тшакла. Но дедыс кулiс, кöр внучаткалö тырис öкмыс во. Леналöн оланыс вö-лi кöть и не öддьöн бур. Но сiя бабыс молитваэзöн да аслас стараннеöн помалic деревнясис школа, а сэсся и городiсь училище, кытöн велöтiсö вурсисьны. Нывка вовлiс баб ордö дзир медодзза курс вылын велöтчикö, а сэсся решитiс, что öнi ыджыт ни, ачыс быдöс вежöртö и некытшöм отсöт бабсянь оз ков. А мыйлö? Велотчикас олiс общежитиеын, а сыбöрын государствосянь кыдз сироталö сетiсö квартира. Лена пондiс уджавны супермаркетын техничкаöн и эшö ештiс вурсьыны. Чожа тырмöмви лоисö клиенттэз, кöдналö гленитчис том вурсисьлöн мода сьöртi вурöм мöдöтчаннэз.

Вот бы ов да уджав. Но, кыдз баитсьö, чери кошшö пыдынжык да сöстöмжык ва, а морт – кокнитжык олан да унажык сьöммез удж понда.Вот и миян Леналö кажитчис, мый пыр уджавны кöпейкаэз понда, колö бур удж бердö кутчисьны. Звонитiс телефонöт модз (подружка), кöдакöт олiс öтiк ком-натаын училищеын велöтчикö.Модз-катша ошшасис аслас бур öння оланöн. Дворец ыжда керкуын уджавтöн, сiя тöдсасьöма том зонкакöт, а öнi петöма  жöник сайö. Жöник уджалö бура и сьöммез тырмöны кыкнанныслö олöм понда. Конечно, модз сярзис-ошшасис и Леналö висьталiс, мый кöзяйкаыс пö

öнi кошшö горничнöйöс, кутчись пö. Да эшö модзанка-катша содтiс, мый пö заробитны сьöммез пондан витiсь унажык техничкася да и кыв-мöд тэ йылicь пö горöтча сылö. Кинлöн юр оз понды бертны этшöм бур юöрсянь? Вот и миян Ленок согласитчис.

Но не прицессаöн, а бесправнöй горничнöйöн пырис сiя эта ыджыт керкуö. Кöзяйка лунiсь-лун уджалiс, а том жöник некöр некытшöм удж вылö эз тэрмась.Сiя лунiсь-лун давитiс диван телевизор одзын, сейис кухаркаöн лö-сьöтöм бур сеян да ысласис виль иномарка вылын. Миян Лена вöлi радся-рад виль удж вылын : сьöммез вештicö cымда, мымда китшкис модз-катша. Но казявтöг локтiс кад, кöр виль горничнöй  вылö пуктiс син кöзяин-дышкучик. Лена старайтчис чожа керны ассис удж, мед не усьны эта умöлик морток синнэз вылö. Но том мужик,дзик надоедливöй гут, пондiс караулитны нывкасö. И öтпыр Лена шедiс сылöн бура пуктöм налькö. Горничнöй дзимля-лiс бус кöзяйкалöн узьлан жырын.Трюмо вылын куйлiсö басöк дона чачаэз (бриллианттэзiсь да золотоись керöм торрез). Леналö  гленитчисö пелькытшшез. Нiя уськöтiсö деревняын быдмöм мортлö тöдвылас лысва воттез. Горничнöй босьтiс киас и любуйтчис басöк чачанас. Вот эта кадö кань моз гусьöника пырис жырас кöзяйкалöн мужик, казялiс горничнöй киись иньыслiсь драгоценносттесö, сывьялiс нывкасö да мöдic окавны .Лена мездöт-чис наглöй мортсянь, пуктiс бриллиантсö трюмо вылö и пышшис аслас жырö.

Тöдiс бы горничнöй одзлань, мый сiйö видзчисьö асывнас, поди бы кватитiс сумкасö ассис и сэк жö бы пышшис лыйис эта керкуись. Позис эшö рытнас висьтавны кöзяйкалö, мый сiя нывкаслö пуктöм син, мöдö сiйö позоритны, но Лена повзис и нем эз лысьт керны. А асывнас вöлi обыск горничнöй жырын. Сы сумкаись полицейскöйез адззисö лысва вылö вачкисяна бриллианттэсö… А сэсся суд и быдса во Лена чулöтiс нем понда тюрьмаын. Эта жö кадö кулiс бабыс, кöдö внучатка эз вермы кольлавны медбöрья туйö. Кöр сiя петic тюрьмаись,то эз берт аслас оланiнö, а мунic деревняö и пондiс овны бабыс да дедыс важ керкуын. Чожа пондic уджавны кафеын. А сэсся вö-лi и дженытик шуда олан Максимкöт, кыдз думайтiс Лена. Но Максим сералiс только Ленаыс вылын, кöр баитiс кафеись кöзяинкöт.Кыдз инька Ленаыс пö немымда оз гленитчы, сылöн пö коккес чукыляöсь. Невеста пö эм, сiйö и босьта иньö. Да и томжык по сiя Ленаысся. Да вот сiдз петiс, что грузчик Максим ассис том невестасӧ берегитiс-лележитiс, а Ленасӧ оз радейт, а только сералiс-позоритiс.

Кӧр Лена кылiс мужиккезлiсь ас йывсис баснисӧ, то «сылӧн пемдiс синнэзас. Оланыс ӧтiк секундаӧпамассис». Мӧдiк нывка вына характера сьӧвзис бы рожаас предательлӧ-нечулимлӧ, лёшалiс бы рожабаннэсӧ и мунiс гордӧя одзлань. Но миян медшӧр героинялӧн сила-мыла эз ни вӧв. Сы понда быдӧс дзугсис. Сiя джӧмдiс медбӧрьяись. А сэсся мунiс вӧрӧ…

А Максимлӧн невеста петас ли сы сайӧ? Неужели сiя оз вежӧрт, кытшӧм подлӧй морт эта Максимыс? А ачыс Максимыс лоас ли шуда, кӧр вежӧртас, мыйсянь Лена мунiс вӧрӧ, «пӧрис лысва воттезӧ»? Вопроссэз уна. Но сэтшӧм олан. Сiя пыр миян одзӧ сувтӧтӧ быдкодь вопроссэз, проблемаэз. Нiйӧ колӧ аскадӧ дзимлявны. Но дзимлявны не тэрмасьӧмӧн.

Литератураын эм вежӧртас – «лысвалӧн челядь». Эта вежӧртасыс ӧддьӧн лӧсялӧ медшӧр геройлӧ Татьяна Савельевалӧн новеллаись. Произведеннё ӧддьӧн интереснӧя гижӧм. Автор нейтральнӧя гижӧ быд герой йылiсь. Новеллаын эм приём «висьт висьтын», мукӧд тема осьтӧм ӧддьӧн паськыта, а мыйкӧ йылiсь колӧ догадывайтчыны только. Новеллаын метафоричнӧй пом. Öддьӧн бур, подробнӧ описаннёэз. Автор лэбтiс актальнӧй темаэз ӧння оланiсь.

…Миян посадiсь кыкдас мымда отир сiдз жӧ пӧрисӧ «лысва воттезӧ». Нылӧн эз тырмы вын мыйкӧ вежны оланын, чапкыны бӧрӧ и вунӧтны кытшӧмкӧ обида. Кинкӧ ны коласiсь вынасянь мунiс мӧд светас, кинкӧ наркотиккезӧн бӧбалiс и умӧль шогӧт сы увья кутiс, а сiдзжӧ семьяын ыджыт проблемаэзсянь…