Главная » Статьи » Писатели Коми-Пермяцкого округа

Андрей Никифорович Зубов. Гижисьлöн олан туй.

Андрей Никифорович ЗубовНоябрь 1899 годö Верх-Иньваын крестьянскöй семьяын Никифор Савельевич да Анна Михеевна Зубоввезлöн шогмис зон Андрей.

Верх-Иньваын шувлöмась Андрейесö – Öньö, а Никифорресö – Питю. Сідз Андрей Зубовлöн шогмис мöдік ним, литературнöй псевдоним – Питю Öньö.

Велöтчис сельскöй школаын, сыбöрын нѐль год – Юрлаын высшöй начальнöй училищеын. Сесся Андрей Зубов кык год уджалiс Кудымкарын почтово-телеграфнöй контораын. 1919 годö пондiс служитны Краснöй Армияын рядовöй красноармеецöн, служитiс почти куим год. 1922 годö Зубов демобилизуйтчис и локтiс гортас. Эта жö годö Андрей Никифорович пондöтчис гижны. Первöй стиххез печатайтiс «Лымдорчача» да «Горадзуль» сборниккезын, сыбöрын «Гöрись» газетаын и Коми АССР-ись «Ордым» да «Ударник» журналлэзын.

А. Н. Зубов велöтчис перво Сыктывкарскöй коми институтын, а 1923 годсянь 1927 годöдз – Пермскöй государственнöй университетын, педагогическöй факультет вылын. Велöтчикас сiя уджалiс преподавательöн коми отделеннѐ рабфак университетын, заведуйтiс детскöй домöн №12 Пермь городын. Велöтчикö сiя уджалö одзлань коми-пермяцкöй письменность вылын. Сiдз 1925 годö Москваын печатайтчöны «Задачник – лыддьисьны велöтан» и учебник вторöй класс понда «Виль ован» (Новая жизнь). Велöтчикö 3-й курс вылын Андрей Зубов гöтрасис. Инькасö
босьтис химическöй факультет вылiсь студенткаöс - Валентина Ивановна Ганнеманнöс.

Университетсö кончитöм бöрын Андрей Никифорович велöтiс Кудымкарскöй педагогическöй техникумын, кынымкö год уджалiс Коми-Пермяцкöй окрисполкомись Научнöй бюроын. Кыдз преподавательöс студенттэз сiйö ошкисö. Эта жö кадö Зубов уна уджалiс литературнöй произведеннеэз вылын. 1929 годö Москваын сылöн петö торья сборник стиххезöн «Öнджа». 1933 годö петö мöдiк книга, кытöн вöлi печатайтöм поэма «Виль туй вылöт». Эта поэма виль олан йылicь, кыдз оссисö школа, читальня, столовöй.

Андрей Зубов вöлi талантливöй мортöн. Öтлаын писатель Михаил Лихачевкöт уна уджалiсö коми-пермяцкöй литературнöй кыв зорöтöм вылын. Андрей Никифорович гижис учебниккез да учебнöй пособиеэз, öктiс терминологическöй словарь. 1928 годö петö «Коми грамматика» 1 часть, 1930 годö – учебник куимöт класс понда «Виль олан», 1931 и 1934 годдэзö – книгаэз роч кыв вылын «Основы грамматики» и «К вопросам языкового строительства», 1932 годö – учебник витöт класс понда «Природа тöдмöтан книга».

1935 годö Андрей Никифоровичлöн петö пьеса «Пемыт ой пырйöт» (Сквозь тьму). Эта пьесаын автор мыччалö коми-пермяккезлiсь важся сьöкыт олан. Пьеса вöлi сувтöтöм Кудымкарскöй театр сцена вылын, а серöнжык 1937 годö нельки Свердловскын уральскöй народдэзлöн олимпиада коста. Эта вöлi триумф. Эшö тöн народ, кöдалöн эз вöв аслас письменность, роднöй литература, а талун сылöн эм первöй пьеса аслас роднöй кыв вылын. Сiдз Андрей Зубовöс можно шуны коми-пермяцкöй драматургиялöн основоположникöн.

Питю Öньö öддьöн интересуйтчис народнöй поэтическöй творчествоöн. Сiя уна öктiс сказкаэз, загадкаэз да пословицаэз. 1935 годö коми-пермяцкöй книжнöй издательство лэдзис сылiсь книга «Cказкаэз”.

Почти быдöс коми-пермяцкöй писателлез велöтчисö русскöй и советскöй писателлез дынын – вуджöтiсö нылiсь произведеннѐэз коми-пермяцкöй кыв вылö.

Эмöсь переводдэз Андрей Никифоровичлöн: Е. Полонская «Часы» (1929), К. Чуковский «Солнечная» (Шондiа), А. Гайдар «Школа» (1934), пьеса Н. Гогольлöн «Женитьба» (Гöтрасьöм) и мöдiк произведеннѐэз.

Андрей Зубов мöдiс адззыны ассис народ не только грамотнöйöн, но и мед вöлi пöт, мед аслас сылöн вöлiсö фрукттэз. 1934 годö сiя уджалiс Пермскöй биологическöй научно-исследовательскöй институтын аспирантöн. Год бöртi Зубов велöтчiс Мичурин нима плодоовощеводство институтын, лоис агроном–плодоовощеводöн и нельки уджалiс эта специальность сьöртi год и джын. 1938 годö коми-пермяцкöй окружнöй книжнöй издательство печатайтö Зубовлiсь книга коми-пермяцкöй кыв вылын «Плодоовощеводство». Сы старанѐэзöн округö вайöны пуэз южнöй плоддэзöн (яблоняэз да мöдiк культураэз).

Отирлiсь лэбтыны культура бура отсалöны «коми рыттэз», кöдна вылын сьылiсö, лыддьöтiсö, сувтöтiсö коми пьессаэз. Народ öддьöн интересуйтчис роднöй кыв вылын первöй произведеннѐэзнас. Да и асьныс авторрез, унажжыксö М. Лихачев да А. Зубов, тöдсöтiсö быдöс отирсö асланыс творчествоöн. Андрей Никифорович покоряйтiс отирлiсь сьöлöммез ассис стихотвореннѐэз лыддьöтöмöн.

Андрей Зубов унажыксö гижис важся олан йылiсь. Бура тöдiс революцияöдз олан. Уна адззылiс, кыдз пессис коми отир, кытшöм сьöкыт доля вöлi коми иньлöн, кыдз сiя кисьтiс ассис пым синва. Сiдз шогмисö стихотвореннѐэз «Горттöм кöк» да «Шудтöм» (Счастьетöм), кыдз том нывкаöс сетöны жöник сайö, нелюбимöй сайö.

Андрей Зубов творчествоын вöлi сатира и юмор. «Олат-вöлат, комиэз», «Öнджа, бöра да мöсвöра», произведеннѐэзын автор сералö дышшез да вина юиссез вылын. Зубовлöн эмöсь и лирическöй да любовнöй стихотвореннѐэз, мукöдыс лоисö песняэзöн - «Пемыт ойöн», «Кöкö горттöм».

1937 год – год, кöр мунöны уна репрессияэз. Арестуйтöм Михаил Лихачев. Зубовлöн сьöлöмыс кылö, что локтасö и сы дын. Стихотвореннѐ «Овсьöм» Зубов А. Н. гижис медбöрьяöн. Геройыс стихас тшöктö мамыслö лöсьöтны котомка, что сiя мунö ылö да дыр кежö, поди, оз и берт гортас. Поэт ятнöя адззис ашыння лун, сылiсь неизбежность и трагизм.

Июль 16 лунö 1937 годö А. Зубовöс арестуйтiсö. Студенттэзлö висьталiсö, что сiя мунiс командировкаö, а керку одзас керисö костер, кытöн сотiсö сылiсь книгаэз, тетраддез, записсез. Этадз öшисö уна произведеннѐэз.

Сентябрь 8 лунö 1937 годö Свердловскын А. Н. Зубовлö вöлi примитöм приговор: вийны лыйöмöн.

Народ эз вунöт Андрей Никифорович Зубовöс. Öнi миян округын учредитöм А. Н. Зубов нима Литературнöй премия, кöда сетчö поэттэзлö. 

Кудымкарскöй детскöй библиотекалö сетöм А. Н. Зубовлöн ним.

 

Зубов Андрей Никифорович. Биография на русском языке

Категория: Писатели Коми-Пермяцкого округа | Добавил: Библиотека (18.06.2014) | Автор: Библиотека
Просмотров: 749 | Теги: Гижисьлöн олан туй, Коми-Пермяцкая библиотека, коми-пермяцкая литература, коми-пермяцкая поэзия, Андрей Никифорович Зубов, основоположник коми-пермяцкой литер | Рейтинг: 5.0/1
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]