КОМИ-ПЕРМЯЦКАЯ НАЦИОНАЛЬНАЯ БИБЛИОТЕКА им. М.П. Лихачёва

«Эверестісь» Саша Федосеев пыртчис монах Евграфӧ да Чердынскӧй монастырьын гижӧ кывбуррез коми-пермяцкӧй кыв вылын.  

Сылӧн музыкаыс гораліс Коми округ пасьта 80-ӧт воэзӧ да 90-ӧт воэз пондӧтчикӧ. Быдӧнлӧ сэк вӧлісӧ тӧдсаӧсь «Овны бы да овны», «Лыммез бергалӧны», «Кытӧн тэ, музыка, кытӧн» да мукӧд сьӧлӧм вӧрзьӧтана сьыланкыввез. Песнялӧн кыввез бытьтӧ каттисьӧмась да ёна йитсьӧмась мелодичнӧй музыкаыскӧт. Ӧтпыр кӧ кывзан сьылансӧ, мӧдпырсясӧ сьӧлӧмыс ачыс ни корӧ.
Чужтіс «Эверест» нима вокально-инструментальнӧй группасӧ Гуринскӧй школаись директор Александр Федосеев. Чукӧртіс ас гӧгӧрас сэтшӧм жӧ творческӧй отирӧс да пондӧтісӧ ӧтласа удж. Унжык сьыланкылыс репертуарын вӧлі коми-пермяцкӧй кыв вылын. Кыввес — коми гижиссезлӧн: Федор да Аркадий Истоминнэзлӧн, Степан Караваевлӧн да мӧдік авторрезлӧн. А музыкасӧ ны понда гижис ачыс Александр Федосеевыс. Некытшӧм вежалун Мижуйын да ордча деревняэзын эз чулав «Эверестлӧн» сьыланкыввезтӧг. Директор Федосеев пондіс велӧтны орсны иструменттэз вылын и томжыккесӧ, школаын велӧтчиссезӧс. Нія сідзжӧ выступайтісӧ школьнӧй праздниккез вылын, а ӧні этӧ кадсӧ касьтылӧны шоныт кыввезӧн.
Сэсся кывсис, что «Эверестыс» дугдӧма сьывны — веськӧтлісьыс пӧ мунӧма. Сы бӧрсянь пондылісӧ эшӧ ӧтік-мӧдік сьывны-орсны, но ӧдныс тырмис етша кад вылӧ. Ӧні важын ни «Эверест» кыдз группа оз горав, но кольччисӧ творческӧй отир, кӧдна одзлань сьылӧны сылісь бытшӧм, лов вӧрзьӧтана сьыланкыввез.

Мийӧ адззим Александр Федосеевӧс Чердынись, кытӧн сія олӧ монастырь бердын обительын. Асьсӧ шуӧ отец Евграфӧн. Тӧдім, что ӧні не только юрбитӧмӧн олӧ, сідзжӧ одзлань творитӧ. Ӧння кадӧ гижӧ духовнӧй кывбуррез. Пантасьны монах Евграфкӧт эг вермӧ, баитім телефонӧт. И вот мый сія миянлӧ висьтасис ас йывсис:
— «Чужи-быдми сьӧд вӧр шӧрын, деревняись петi». Чужи Косинскӧй районісь Пуксипи деревняын 1958 годӧ. Айӧ да мамӧ уджалiсӧ колхозын. Кыкьямыс класс кончитi да мунi велӧтчыны учитель вылӧ Кудымкарись педучилищеӧ. Армияын служитi да бӧра велӧтчи Перемын университетын. Сыбӧрын олан кузя уджалi, инь радейтi да челядь быдтi.
Деревняас рыттэс кузьӧсь, вот и пондi ӧтiкӧ-мӧдiкӧ гижны… Ӧнi ола Ен керкуын, сылӧ и юрбита, медбы греккезӧс меным лэдзис. Юрбита вот эттшӧм молитваӧн: «Пыма Еныслӧ юрбит, пукты Енлӧ пернапас!.. Аминь.
— А мыля кутчит гижны коми-пермяцкӧй кыв вылын?
— Мамйӧлӧн учӧтсянь мийӧ и сьылам, и горзам, и радуйтчам асланым коми-пермяцкӧй мам кыв вылын. Эм нянь-сёян асланым гырк понда, а эм эшӧ и сёян миян лов понда. Кыдз отирас баитӧны: «Кинлӧ мый, а тойӧсьлӧ — баня». Быд мортлӧ эта му вылын кытшӧмкӧ кыв вылын пырӧны думаэз. Кытшӧм кыв вылын кылӧ ассис сьӧлӧмсӧ, сэтшӧм кыв вылын и гижӧ, натьтӧ. Ме не историк, и не космонавт, и не музыкант. Ме учӧтсянь кувтӧдз Ен одзын кольчча умӧлик, дыш юрбитісь, нятьӧсь лола учӧтик мортокӧн. Уджавны позьӧ кӧть кинӧн, Ен понда рам мортӧн колӧ овны.
— Позьӧ ли мыйкӧ гижны сэтшӧмӧ, медбы сійӧ гижӧтсӧ вӧлі интересно лыддьӧтны отирлӧ?
— Гижӧны не пеллез понда да рӧма чужӧмбан понда, а сӧстӧм лов понда.
— Мый колӧ керны, медбы коми кылыс эз кус?
— Мед эз ӧш кості миян мам кывным, колӧ пыртны ыджыт юраліссезлӧ сэтшӧм закон, медбы зыбкасянь кувтӧдз (шойнаӧдз) радейтны ассиным кыв. Кин мӧднежа думайтӧ, сія пилитӧ ассис увсӧ, кӧда вылын пукалӧ. Ен да отсалас миянлӧ!

Ирина Дульцева

Ме кыдз кöин, пыд вöрын öтнам,
Мыр бокын куйла, нач ни дзор;
Мыйлö оланыс меным сетöм? –
Эг кеймы Енлö, нем эг кор…

Мыля ме сэтшöм одз пöрисьми
И кусiс морос пытшкам би?..
Кöр локтö пемыт ой, вöлись ми
Шоччöтам мыдзöм кок и ки.

Мыйлö сiдз мырсям и тöждiсям?
Мыля сiдз дорьям чужанiн?
А Енлö сэк вöлись кеймисям,
Сьöлöм кöр сувтö, кусö син…
***
Кöть и лунiсь лунö мырся,
Ойöн адза умöль вöт,
Кытчö пöрись вöв моз кысся –
Одзлань, бöрлань? Ог ме тöд.

Натьтö лэдзча ад пыдöсö,
Видно, Енлö ог ни ков,
Петö öмöттям сьöлöмö,
Чорзьö из моз менам лов.

Бытьтö кинкö сьöрам вöтчö, —
Поди этö сьöд калян?
Лолам шытöг жельмоз мöртчö,
Мед кусöтны му олан…

Ружта-куйла Ен угöлын.
Видно локтiс сiя кад,
Кöр кöть сьылö кай öтöрын,
Сьöлöм сылö абу рад…

Школаын получка коста

(юмористическӧй рассказ)

Школаӧ ваясӧ получка. Директор ведомость сьӧрті быдӧнныслӧ сеталӧ деньгасӧ, кольччас получитны только Иван Ивановичлӧ, физикаӧн да математикаӧн велӧтісьлӧ, кӧда шоччисис отпускын. Вӧлі сёр ни, но директор сёжӧ мӧдіc видзчисьны, надейтчис, что Иван Ивановичыс кежалас сы дынӧдз. Поди пӧ кинкӧ велӧтіссез коласісь, гортӧ мунтӧн, юӧртас сылӧ.

Лунся удж  бӧрті школаын вӧлі лӧнь. Ыбӧс гым-ёрк керис. Сідз и эм. Кинкӧ кылӧ пырис школаӧ. И мылякӧ директорлӧн эта коста ёкнитіс сьӧлӧмыс. И не весись, сідз кыдз Иван Ивановичыс, тыдалӧ, ляз код, аслыс зызтӧн, ӧдва ӧшйӧ кок вылас. Иван Ивановичыс сибӧтчис пызан дынӧ и, люммӧм синнэзӧн видзӧттӧн, лёкгоршӧн горӧтіс директор вылӧ: «Сволочь, кытӧн менам получкаӧ?» Пыр, кӧр код, Иван Иванович быдӧннысӧ ласковӧя шувліс «сволочӧн». Директорлӧн син одзас пемдіс, нем эз вермы семдӧмсяняс горӧтчыны паныт. Недыр мыйись  гусьӧна, пиннез пырйӧт висьталіс: «Ог сет, тэ ӧддьӧн код, ашын лок, Ив…» Директор эз ешты и кваркыш  синнас керны, кыдз сійӧ Иван Ивановичыс кутіс сивилёнӧттяс да шелькйӧн-мелькйӧн турка-берки кыскис пызан сайись и бӧр гӧгӧрас чужьялӧмӧн, сюйыштіс сейфас, сэк жӧ лӧгӧн шупыта бергӧтіс вугсӧ-ключсӧ. «Он сет, сволочь, пукав сэк аслат жырын, аслат деньга вылын», – лёкгоршӧн горӧтіс Иван Иванович. Директор нем эз ешты эта коста керны, некӧр эта мымдасӧ эз видзчись Иван Ивановичсянь. Сейф пытшкас вӧлі пемыт, кӧть и кыкнан бокас керӧмась-пырӧтӧмась уна осьтаэз.

«Этӧ эшӧ мый сетшӧмсӧ керан, вакрамеш, ось ӧні жӧ, а то ме сейчас милицяӧ звонита. Ось ӧні жӧ!» – мымда вын стукӧтікӧ ыбӧс кузя, горӧтліс директор. Иван Иванович сэтчӧ нач лӧгасис, кӧр кыліс милиция йылісь. «Звонит», – сымда и горӧтчис паныт и, шыннялӧмӧн, мыйкӧ ӧм увтас бобгӧмӧн, жагвыв петіс дирекцияись. Кыскис кармансис джыння бутылка «Водка» и чажнитіс-юис  пыдӧсӧдз. Сыбӧрын, соссӧ нюкайтӧмӧн, тарласьӧмӧн иньдӧтчис гортланьӧ…

Ыркыт  асъяпонсяняс саймис и эз вежӧрт, кытӧн сія и мый сыкӧт. Чеччыны эз тэрмась. Ӧтмӧдӧрын морт сувда петшӧр да шишибар. Нырӧ жӧ вачкӧ морт сітӧн да кудзӧн. Юр нӧш кодь сьӧкыт, шӧри потӧ-висьӧ, лэбтыны оз позь, ӧмын бытьтӧ каннез сіталӧмась, сьӧлӧм гудрасьӧ. Иван Иванович ӧддьӧн жагвыв чеччис. «Быль тай вӧлӧма, уссьӧма-тарассьӧма нужник сайӧ, петшӧр коласӧ, морт сіттэз вылӧ. «Тьфу, тэ, сволочь, кытшӧм зын», – ӧмувтас бобгытӧн-видчытӧн Иван Иванович иньдӧтчис ачыс эз тӧд кытчӧ. Юрыс куд кодь сьӧкыт и нач бӧбӧв, жыв кыдз кольмӧм, вот-вот шӧри потас. А коккез нӧбӧтісӧ деревня конечӧ, Ӧгруш баб керку дынӧ. Пырны керкуӧдз етшыс эз ни вӧв, мылаыс нач бырис. Иван Иванович ляпкисис-пуксис посӧдз дорас. Сьӧкыта лолалӧмӧн, кок пидзӧссэз вылас  кыссис ыбӧс дынӧдз. Жагвыв, люзь пымавтӧдз, ыбӧс пӧлӧнняс, киэзнас кутчисьӧмӧн, ӧдва-ӧдва сувтіс коккез вылӧ. Ки-кокыс только лёбйӧтлісӧ, хозяиныс ныкӧт нем эз вермы керны. Юрас только клён да клён, син одзас только веж-веж, а сьӧлӧмыс вот-вот ӧмӧттяс петас, вывтырись рудзалӧ-визывтӧ ньылӧм, увдӧрись тырпыс ӧшӧштчӧм, ӧмын кылыс косьмӧм, гудыра синнэз, кыдз кроликлӧн, гӧрдӧсь. Костюмыс вылас чукрасьӧм, лякӧм шишибарӧн, куш сіт. Юрсиыс пашмӧм. Ӧт кӧмкӧтыc кокас эм, а мӧдыс абу. Кин бы ӧні адззыліс Иван Ивановичсӧ, эз тӧд. Эз вачкись талуння асъяпонӧ ас вылас удерлунся эшӧ том да визыв, бытшӧм мыгӧра одзжыкся армияись десантник физикаӧн шӧрӧт школаись медъюра велӧтісь. Но Иван Ивановичӧс, шуд дорӧ, некин эз адззыв, сідз кыдз кадыс вӧлі одз  эшӧ, вит час сьӧрна, кодя отирыс эшӧ узисӧ асланыс чӧскыт онӧн. Ӧгруш баб эз ни узь, ружтӧмӧн ышки-пойки петіс пантавны ассис «дона» гӧсьсӧ. Не ӧтік год уже вийӧтӧ гусьӧник «Инька синвасӧ» – аскурсӧ, эм мыйӧн потшшуйтны люммӧм синсӧ, ассис вежайписӧ…

Сейфын ой чулӧтікӧ директорлӧ юрас уна сякӧйыс пырис. Он эз пет. Лолавны вӧлі сьӧкыт. Но кытшӧм вермас петны он, кӧр сія, кыдз медбӧрья бӧбӧв морт, эз и думайт, а сюрис аслас жӧ сейфӧ. Сідз и колӧ, ачыс эд силком тшӧктіс  варитны-дорӧтны сыыжда сейфсӧ, кӧть и видзнытӧ сы пытшкын кодьӧн нем эз вӧв. Этӧ эд колӧ жӧ эттшӧмыслӧ шогмыны, – одзлань думайтіс директор. – Кинлӧ висьтась, да коз веритӧ. Директор сё думайтіс, но некыдз эз вермы вежӧртны, мый умӧльсӧ керис Иван Ивановичлӧ, медбы этадз издевайтчыны сы вылын. Мый? Куритыштны бы, да оз позь. Дзескыт, пуксьыны оз туй. Коккез долӧтӧны ни. Кӧть тэ мый кер. Вакрамеш, вӧр лешак бы сійӧ босьтіс дынас, сьӧд калян. Милицияӧ ли мый ли явитны, абу ни олан. Не ӧтпыр эд педслвет заседаннёэз коста велӧтіссез ас коласын баитлісӧ Иван Иванович кодувья мывкыд йылісь. Пыр пӧ кӧр юас, да не юрас: то челядь сьӧрын партаэз коласӧт указкаӧн или метровӧй линейкаӧн вӧтлісьӧ, то кочегарӧс котельнӧяс весись невна абу сюйыштӧма биа горас. Сё думайтіс и думайтіс кузь думаэз аслас виль позын директор. Гортын, натьтӧ, ӧштic ни, поди кошшӧны, кӧть бы кинкӧ школаас пыраліс, и кытӧн  кульыс кыскалӧ сторожсӧ. Бӧра поди код, узьӧ кочегаркаын или стын бокын бӧрись коккезтӧг. Получка эд вӧлі. И джодж миссьӧтісьыс оз лок. Ашын кресення, выходнӧй, чередь кин мыччисяс школаын. Горш пондӧ косьмыны, юр висьӧ, кӧсичаэзас давитӧ, коккез нач ни мыдзисӧ, голя тувдіс, кӧть вот сідз сувтсӧн и кув. «Щмек и горьё», – кӧть тэ мый кер. Абу ни олан. Сідз, тӧждісьӧмӧн, горзытӧн, чулӧтіс ойсӧ директорыс аслас сейфын. Ӧддьӧн колӧ меным  эттшӧм уджыс. – Одзлань думайтіс директорыс. – Сякӧй страмыс пондасӧ ыждавны, тырмас! Сё! Понедельникас жӧ пукта заявленнё. Ни лун, ни ой абу спокой, да эшӧ издевайтчӧны. Ась Иван Иванович кодьӧммез и уджалӧны, панялӧны пӧтмӧна курыт олансӧ, кыдз дорӧн узьны вочӧтлас директорскӧй уджыс, сэк вӧлись тӧдласӧ. Сідз ойбыт сувтӧн сейфын кузь думаэз думайтіс директор, бур, кӧр юр ыджыт, эм  мыйӧн думайтны. А эшӧ думайтіс сы йылісь, что, тыдалӧ, греккез жагӧника вӧтӧны ни. Тӧдвывлӧ  пондісӧ усьны  умӧль делоэз керӧм челядь да велӧтіссез кузя. Вот и зоночкаэсӧ весись виді да эшӧ милицияӧ ысті ны вылӧ гижӧт. Быдӧс правильнӧя кери. Мый эд только оз придумайтӧ, вакрамеш бы нійӧ. Школаын удж  чулӧтӧм бӧрсянь директор жагвыв оськаліс-муніс ыджыт туй кузя горт ладорӧ. Адззӧ, туй шӧрас валяйтчӧ быдса «восьмушка» – махорка пачка, кинкӧ, тыдалӧ, уськӧтӧма-ӧштӧма. Директор сувтчис, ӧтмӧдӧрӧ дзар керис, абу некин гӧгӧрас, сыбӧрын шупыта мышкыртчис и только мӧvlc кватитны пачкасӧ, кыдз сія вешшис одзлань. Директор бӧра ӧтмӧдӧрӧ дзир-бар керис и шупыта кватитіс махорка пачкасӧ веськыт кинас. Пачкаыс одзлань эз ни пышшы, сетчис директор киӧ. Неылын  стын сайын кыліс челядьлӧн ӧмтырья сералӧм. Директор бӧбӧвмоз сулаліс, видзӧтіс сітӧсь киыс  вылӧ и нем эз вермы вежӧртны, мый шогмис. А морт сітыс шучкӧп муніс чуннез пырйӧт и ӧддьӧн зына, вуктытӧдз вачкис нырас шардӧм директорлӧ. Кӧр сибӧтчис стын дынӧ, то казяліс, кыдз челядь стын сайын, кынӧнммезнысӧ  кутӧмӧн, куимкусіньӧн, семдытӧдз серавтӧн, куснясьӧны-быглясьӧны луд вылын. Только челядьыс одз сералісӧ. Ашынас жӧ уроккез вотӧдз дирекцияын, юррезнысӧ ӧшӧтӧмӧн, сулалісӧ тӧння стын сайись директор вылын кувтӧдз сералісь зоночкаэз. Эта понда директор кӧс нійӧ лёка видіс и ыстіс ны вылӧ милицияӧ гижӧт. А эшӧ тӧдвылас усис, кӧр весись уна умӧль кыв шуис  Парасковья Евлампиевна уроккез чулӧтӧм сьӧрті. Ашынас школаас учительницаыс абу локтӧм. Вот эд кыдз овлӧ. Ойбыт пӧ маитчӧма сьӧлӧмнас, а одз асъяпонӧн «скорӧйӧн» кыскӧмась больницаӧ. Директор сё думайтіс, что греккез этӧ вӧтӧны, греккез… Нем он кер, оланын быдӧс понда колӧ вештісьны. Юрӧ бӧра пырис Иван Иванович йылісь дума. Кӧр садь, медбур морт, медвына учитель школаас. А юас, нач бӧбсялӧ. Мый сыкӧт керны? Уволитны, а кин пондас уроккесӧ чулӧтны и сідз учителлез оз тырмӧ, кӧть кӧинмоз уняв тӧлісь  вылӧ…

Ӧгруш баб керкуись кыліс сьыланкыв. Этӧ Иван Иванович юӧм-сёйӧм бӧрсянь мымда вын горӧтліс-нюжӧтліс сьыланкыв: «Овны бы овны, нем не керны, юны да сёйны…» Ӧгруш баб эз лысьты веськӧтлыны сьыланкывсӧ вежайпиыслісь, кӧда кодувьяс вунӧтӧма кыввесӧ и асмознас сьылӧ этӧ сьыланкывсӧ. Ӧгруш баб этӧ сьыланкывсӧ ӧддьӧн любитӧ кывзыны радиоӧт. Кӧр Ӧгруш баб юаліc Иван Ивановичлісь, босьтіс — эз я сія получкасӧ, сэк вӧлись жвангис кольмӧм юрас директор йылісь, поди пӧ чорзис ни аслас сейфын. «Ась, сволочь, абу жаль, вир юись, сетны коліс деньгасӧ, нем бы эз вӧв», – думайтіс недырик ас кежас Иван Иванович да чеччис пызан сайись. Люммӧм синнэзӧн сибӧтчис бабыс дынӧ, жмитіс бердас, чышкыштіс ассис синва, пильскнитіс нырнаси петіс ӧтӧрӧ, иньдӧтчис школа ладорӧ. Кӧть и бӧра ляз кодззис, а сё жӧ вежӧртіс, что директорсӧ сейфсис колӧ лэдзны. Сітӧтны, кудзӧтны, поди гленитчис, сэк позяс бӧр йӧртны.

А эта коста школаись джодж миссьӧтісь Ӧвдя баб локтіс ассис удж керны. Пырас дирекцияӧ миссьӧтны джодж. Директор лёк горшӧн  горӧтас, пондас ёркӧтны сейфас. Сэтчӧ  Ӧвдя баб весьӧ пӧрас, шардас и кок вывсис таралас порог дорас, только и ештаc горӧтчыны: «Свят, свят, свят…» Директор одзлань сё лёк горшӧн медбӧрья выннас горӧтлӧ-ёркӧтӧ сейф пытшкас, корӧ отсӧт. Иван Иванович пырас школаӧ и веськыта мунас дирекцияӧ. Пырикас падмас Ӧвдя бабас да таралас – нюжалас джодж шӧрас. «Вот жӧ, сволочь, кытчӧ водӧма», – ӧмувтас бобгӧмӧн чеччис да чужйис бок кузяс Ӧвдя баблӧ. Сейф пытшкись кыліс норӧна пиксӧм. Иван Иванович адззис ключ и осьтіс сейфсӧ. Директор, кыдз сулаліс, сідз и тараліс-усис Иван Иванович вылӧ. Кыкнанныc нюжалісӧ  джодж шӧрас. Ӧвдя баб эта коста саймис, лэбтіс юрсӧ, казяліс джодж шӧрын rsr мужикӧс и бӧра син одзас пемдіс, ештіс только горӧтчыны: «Свят, свят, свят…» Директор сё эшӧ куйліс ышки-пойки, кулӧм не ловья  джодж шӧрын, кӧр Иван Иванович кыскис сейфсис ассис получка, умӧлика гижсис ведомостяс и шатласьӧмӧн петіс дирекцияись. Петтӧняс горӧтчис Ӧвдя баблӧ, чеччы пӧ, мый сэтӧн нюжӧтчӧмат порог  дорас, лок пӧ лэдзчам магазинӧ, босьтам пӧ вина да юыштам-керам, тупитапсӧ йӧктыштам. Паныт некин эз шыась, только кытӧнкӧ шыр гырскис сухарик тор…

Деньга тыр, магазин осьта ни, позьӧ одзлань юны да гажӧна чулӧтны отпуск. А мый сэсся керны деревняас. Паныт Иван Ивановичлӧ шедіс директорлӧн бытшӧм мыгӧра иньыс. Юасис эз я пӧ сія адззыв жӧниксӧ. Кыдз жӧ, адззывлі пӧ, валяйтчӧны тай джодж шӧрас дирекцияын аслас Ӧвдя бабкӧт. Директор иньыслӧн би чеччӧвтас синнэзсис, шытӧг босьтіс кузь бедь да котӧрӧн иньдӧтчис школаӧ. Иван Иванович шупыта  муніс одзлань, пырис магазинӧ, шынь сералӧмӧн ӧмувтас нюжӧтліс ассис сьыланкыв: «Кытӧн тэ, «Водкаыс», кытӧн, тшыгьялі  тэ понда ӧддьӧн…» А эта кадӧ деревня шӧрын столб вылын чочком громкоговорительсянь Кудымкарись передача коста ансамбль «Эверест» вежӧра велӧтіссез понда сьыліс:

«Овны бы да овны…

Но разь кинкӧ сетас

Нач сӧстӧмӧн лоны

Эта грешнӧй  светын…»

А. Федосеев, Ноябрь, 1995 г.

Источник