 Кадыс кöвдалiс сiйö пöттöдз. Кöчись асныра зонкаок быдмис велöтiсьö, вöлi землемерöн , сэсся «чочком» офицерöн сюрис пленö, пышшис Финляндияö «политическöй эмигрантöн». Ылын гортсянь, инь да челядь дынсянь Игнатий Мошегов чулöтiс джын олансö. Осьтiс ассис книжнöй магазин, велöтiс баитны комиöн да отсалiс сувтны кок вылö финскöй ученöй-финноугроведдэзлö, осьтiс туй финно-угорскöй конгрессэзлö. Ачыс уна гижис коми отир история да кыв йылiсь. Сылӧн уджжес, унажыкыс ныись гижöм финскöй кыв вылын да рочöн, вуджöтöмöсь французскöй, польскöй, эстонскöй кыввез вылö. Историк Анатолий Коньшин шуöмöн, Мошегов уджжеслöн доныс сыын, мый нiя гижӧмӧсь важся архивнöй документтэз сьӧрті, кöднö öння кадö миян историккезлö сьöкыт адззыны. Советскӧй кадӧ Мошеговлöн нимыс вöлi кидтöм литератураись и наукаись. Сiя лыддиссис «русофобöн», сiдз кыдз сы гижöмын ён визьöн мунö комиэсö дзескöтöм тема. 1924 годö Игнатий Мошегов лэдзис ассис медыджыт удж – «Idän hiidenkattilassa. Erään syrjääniläisen muistelmat» нима мемуаррез. 1992 годö нiя петiсö «Войвыв кодзув» журналын коми-зырянскöй кыв вылын. Коми-пермяцкöй кыв вылö сыись мымдакӧ вуджöтiс Ольга Аксёнова, но быдсöн мемуаррес миянын эзö на петавлö. Тiйö видзат кианыт меодзза кык тор, одзлань вуджöтöм мемуаррес пондасӧ петны «Парма» газеталöн «Коми говк» листбок вылын.
Анастасия Хорошева
«Асыввывся сир пöртын»
Менам челядь кадісь
Кама ю да сы вожжез Иньва да Косва вапӧввезын сулалӧны зырянскӧй унаотираӧсь да басӧкӧсь вичкуэза посаддэз. Косва ю дорын Дурова нима деревняын олӧны менам аймам видз-му вӧдитӧмӧн, сідз жӧ кыдз татӧн олісь мӧдік зыряна.
Аймамӧлӧн вӧлӧмась ӧкмыс кага: нёль зон да вит ныв. Но ӧтiк нывныс учӧтӧн кулӧма пистисянь.
Унаись касьтывла челядькадся олансим ме бабӧc, айӧлісь мамсӧ, кӧда куліс 94 годсяӧн. Син одзам сія сулалӧ пӧрись, винерик зырянскӧй бабӧн. Миянлӧ, нучоккеслӧ, висьтасьліс сія сказкаэз да легендаэз, кыдз олісӧ зыряна сы томувья, тӧдсӧтіс миянӧс одзза зыряналӧн оланкӧт.
Бабӧлӧ висьтасикас бытьтӧ ӧд шедліс, а миянлӧ — сійӧ кывзікас. Сія висьтасис и висьтасис. А ми юасим сылiсь быдтор йылiсь, нельки сэтшӧмӧ, мый йылiсь бабӧ эз чайтлы.
Медбура видза тӧд вылам бабӧлісь лёк разбойниккез йылісь вистасьӧмсӧ, кытшöм ыджыт чукöррезöн нiя вовлiсö зырянскӧй му вылö, вийлiсö да грабитлiсö, сотлiсö пöимöдз керкуэз, нуöтлiсö сьöраныс нывка да том иньпöлöсӧс нылісь воннэзнысö, айезнысö да жöниккезнысö вийöм бӧрсянь.
Кӧр бабö вӧлӧм том, ӧтік ойöн сы аймам ордӧ, узиканыс, локтöм эттшӧм чукӧр. Айсö кутöмась, лячкушöдз чӧвтӧмась, джодж шöрас öзтöмась бипур да тапкöмась сiйö сэтчö и видзӧмась, мед висьталiс кытöн деньганыс куйлö. Кöть айыс и сетöма нылö быдöс, разбойниккез абу дугдöмась сiйö сотны. Куим лун бöртi айыс кулöма пыдын да ыджыт ранаэзсянь.
Юасимö бабöлiсь, киннэз нiя, лёк морттэс, вöлiсö да кытöн олiсö, эмöсь я нiя öнi. Бабö горöтчис, нiя пö вöлöмась рочöсь, вовлывлӧмась ылісянь, а Александр II реформа бöрсянь нiя сэсся абу вовлöмась.
Бабöсянь ми кывлiм эшö кытшöм вына да богатöй отир одзжык зырянаыс вӧлӧма, да кыдз ыджыт вира пессьöмын зыряна да московса коласын вермисö йöз отирыс, мырддисö нылісь мусӧ.
Сьывлiс бабö миянлö важ сьыланкыввез важся зыряналӧн бур олан да вын йылiсь.
Дедö син одзам кольччис ыджыт мыгöра да смев мортöн, кöда етша овлiс гортын.
Пöрисьувьяс сiя пыр чериалic. Тулыссянь сёр арöдз олiс дедö Косва ю дорын учöтик керкуокын, луннэзнас узис, ойэзнас кыйис чери. Гортö шоча вовлic — вöлись сэк, кöр бырсьывлiс сёян-юаныс либо ковсис отсöт, медбы вайны гортö чери. Косва ю вапöлыс – кыт видззеза, кыт пыд вöра – вöлi сылö мед ни дона.
Гортö бертiкас сiя гажöна висьтасьлiс миянлö аслас олан йылiсь вадорын, дженыт югыт ойез йылiсь, кöр шоныт дзик лунöн, дзоридзӧн тырӧм видззез йылiсь, кöднасянь гожумся руö кайö чöскыт дук, гажа рассэз да вöррез йылiсь, кытöн чивзöны кайез.
Вежалуннэзö дедö пыр корлiс миян пызан сайö соседдэзнымöс, потшуйтлiс нiйö медбур чериöн. Вöвлi, ювлiс, а кöр юрас каяс, сьывлiс кузь сьыланкыввез.
Зырянскöй начальнӧй школаын
Кочёва посадын, кыкьямыс километра ылынаын миян Дуровасянь, вöлi медматынся школа. Сэтчин велöтчис пöрисьжык вонö. Сiя школаас вöвлi быдса неделя, вовлiс гортö суббöтаэзöн да понедельник асыввезнас вонöс берся сёянöн бöр кыскывлiсö школаас. Ме корси сьöрас, корси велöтчыны, но айö висьталiс, что ме пö учöтöв, ыджытжык лоа и муна школаас, коли сэтчöдз öдӧ оз быр — школаас велöтöны роч кыв вылын, кöдö ме ог тод.
Меным вöлi 11 год, кöр ме мунi велöтчыны. Велöтiсьыс вöлi роч, эз вежöрт комиöн нем, а велöтчиссес эз вежöртö рочöн. Ми быдöс велöтiм роч кыв вылын, и сы кузяись вöлi сьöкыт. Велöтчиссез велöтiсö уроккесö вежöрттöг, мый йылісь сэтӧн гижӧм. Усьö тöд вылö, кыдз öтпырись учöтик велöтчись лыддьöтöма сказка, абу вежöртöма, чайтöма сiя молитва и рытся молитва сорöн горöн лыддьöтлöма сiйö енджадж одзын пидзöссэз вылас сулалöмöн. Лыддьӧтлӧм сэтчӧдз, кытчöдз пöрисьжыккес абу казялöмась да пондöмась тешитчыны сы вылын. Сiдз и ме, вежöрттöг, велöтi не öтiк кывбур да висьт, мый йылiсь нiя, авйи тожно семинарияын велöтчикö.
Школаным вöлi кык этажа, улын – вит жырын — олiс миян велöтiсьным. Вылын вöлiсö кык класс да велöтiсьлöн кабинет. Кöр челядьыс школаас вöлiсö етша, ми пукавлiмö öтiк классын, мöдiкас олiсö велöтчиссез, кöдна эзö ветлö гортаныс кузь туй кузяись. Эта классын ме чулöтi куим тöв.
Ми классас олiмö даскык зонка. Вежöртана, бöбавлiмö, кыдз и быдöс челядь. Миянлö колiс пукавны гусьöна, мед не мешайтны велöтiсь семьялö. Но эта йылісь мийӧ вунӧтлім. Сэк велöтiсь мыччисьлiс миян классӧ, кутлiс медбöбалiссесö, летiс пеллезöттяныс да сувтöтлiс пидзöссэз вылö не öтiк час кежö. Миян коласiсь некинлöн эзö вöлö часыэз, а велöтiсьным вунöтчывлiс гижны, кöр сiя пуктiс ассис наказаннё, сiйöн кыссьывлiс эта дыр, öддьöн дыр. Этасянь школаын олӧмсӧ мийӧ синнаным эг адззӧ.
Тöд вылö усьö, кыдз менö накажитiс сулавны куим час дырна. А велöтiсьö ордö локтiсö гöссез, коднакöт сiя кутчис юны да вунöтiс ме йылiсь. Ме сулалi джоджас пидзöссэз вылам кузь ой, кытчöдз мылаö эз быр да эг öнмöссьы.
Гортын ме эг лысьт висьтасьны, но аймамö кылöмась да видiсö, мыля шы эг сет лёк велöтiсьыс йылiсь. Сідз меным кыкись дӧнзис.
Религия сьöртi миянöс велöтiс поп. Сiя вöлi велöтiсьнымся уна лöгжык. Ветлöтiс класс кузя киас бедьöн да вартлiс нiйö, кин эз куж керны сетöм удж.
Ӧтпырись локтiс школааным инспектор, пырис овны постоялöй дворö. Сы дынö велöтчиссес рытьявнас ветлiсö норасьны велöтiссес вылö. Бурыс нем эз пет. Ашынас быдöннымöс накажитiсö сулавны пидзӧссэз вылын куим час.
Велöтiссес эзö öддьöнсö видзöтö миян велӧтчӧм вылӧ. Вӧлі, попыс кык месяц эз пырав школаас. Мöдiкыс – уна лöньжыкыс — вовлiс быд лун.
Кӧть и зырянскӧй челядьыс ӧддьӧн мӧдісӧ велӧтчыны и эз дышӧтчӧ велӧтчыны йӧз кыв вылын, мукӧдыс чапкисӧ школасӧ лёк велӧтіссез понда, и быдмисö – эзö кужö не лыддьöтны, не гижны.
Кочёва посад школаö, кытöн ме велöтчи, аррезнас вовлiсö 30-40 челядь, тулыснас ныись кольччывлiсö 10-12 велӧтчись.
Менам вöлi ӧддьӧн ыджыт желаннё велӧтчыны и ме вӧлі асныракодь, и сійӧн, пиннез зэлӧтӧмӧн, терпиті да велöтчи куим год — шедті аттестат, кöдöн позис мунны велöтчыны одзлань.
* Коми-пермяцкöй кыв вылӧ вуджöтiкӧ вöлi босьтöм уджыслöн оддза нимыс — «Асыввывся сир пöртын. Öтiк комилöн кастылöммез», кыдз вуджöтiс Ольга Аксёнова коми-зырянскöй кыв вылiсь. 1992 годö уджыс петалiс «Войвыв кодзув» журналын «Асыввывса сир пöртйын» ним увтын, финскöй кыв вылiсь вуджöтiс лингвист А.Туркин. Вуджöтiссез понда, кыдз лыддьӧны ученöйез А.Сурво да В.Шарапов, сьöкытыс сыын, что кыв ««hiisi» многозначнöй. Вуджöтны кö роч кыв вылö – «В восточном кромешном аду» (букв: «в чёртовом котле Востока»). Позьö сiдз жö вежöртны кыдз «В вареве Востока».
** Косва — река Коса, Кӧс ю
*** syrjäänit – (зыряна (финск.) – ХХ век джынöдз историческöй да филологическöй наукаэзын Финляндияын этнонимöн «зыряна» шуисö коми-пермяккесö и коми-зырянасö, онi шуöны «komit». Европаын коми-пермяккес и коми-зырянаыс öнöдз лыддиссьöны öтiк народöн.
**** Церковно-приходскöй школа Кочёваын
***** «Закон божий»
Вуджӧтіс Анастасия Хорошева
Источник
|