Главная » Статьи » Литературная страница

Василий Климов: «Ыджыт гижись — пыр профессионал»

Коми-пермяцкӧй литература зорамӧм йылісь сёрнитӧны Любовь Старцева да Василий Климов.

Screenshot_14- Василий Васильевич, кыдз бы Тійӧ донтіт ӧння кадся литература? Мый сыын вильыс, а мыйӧн вачкисьӧ одзза кадся литература вылӧ? Мый радуйтӧ, мыйсянь, поди, гажтӧм кутӧ?
— Öння литература, ме бы шуи, нуӧтӧ и зорӧтӧ коми-пермяцкӧй литератураись важ традицияэз, сэтшӧмӧсь, кыдз патриотизм. Патриотизм тема вӧлі Степан Караваев да Николай Попов творчествоын, сёрӧнжык Иван Минин, Валериан Баталов да и ме тожӧ сы кадісь гижись, пыр видзӧтлім бӧрлань, кыдз гижисӧ одзза гижиссез. Пыр старайтчим нуӧтны визь, кӧдӧ пондӧтісӧ эшӧ Андрей Зубов да Михаил Лихачёв. Литератураын пыр вӧлі асланым Парма дынӧ да и Россия дынӧ радейтӧм, пыр вӧлі гражданскӧй тематика. Эм сія и ӧні. Сідзжӧ пыр вӧлі и эм лирическӧй визь.
Вуджны кӧ мед томмез дынӧ, вот тай часӧт видзӧті газетаись медтоммезлісь кывбуррез, кӧдна сетӧмӧсь «Проба пера» страница вылын, колӧ висьтавны, нач оз тӧдӧ кывбур гижан теория. Медтоммезнас шуа и пӧриськодь ни морттэзӧс, кӧдна не ӧддьӧн важын гижӧны, а сідзкӧ литератураын томӧсь. Медбы пондӧтчыны мыйкӧ керны, колӧ велӧтчыны.
Эд, шуам, медбы первуись пӧжавны тупӧсь, хозяйка юасьӧ, кыдз пондӧтчыны: мымда пуктыны ва, мымда пизь, кыдз солавны, кыдз шӧммӧтны, кытшӧм ви вылын пӧжавны.
А миян медтоммез оз юасьӧ кыдз кывбурсӧ керны, оз видзӧтӧ мӧдіккезлісь опыт. Оз лыддьӧтӧ — эд рифма да ритм велӧтӧны школаын, да и быдлаись этӧ теориясӧ позьӧ адззыны. Позьӧ, конечно, гижны и рифматӧм кывбуррез, но и нылӧн эм аспытшкся организация.
Эстӧн не только томмезлӧн винаыс, но и пӧрисьжык гижиссезлӧн, и редакторрезлӧн, кӧдна сэтшӧмсӧ печатайтӧны. Одзжык эд петас литературнӧй страница, дак кин-нибудь висьталӧ сы йылісь – мый бурыс, мый умӧльыс. Öні абу некытшӧм рецензия, некытшӧм бӧрйӧм (разбор). Öні том гижиссезлӧ кыдз бы козинӧн сетӧны печатайтны – гижӧ, мийӧ печатайтам. И козиныс петӧ нештӧм пельӧса, нёштӧм сера. И литература понда, и том гижись понда этӧ ӧдьӧн умӧль. Том гижисьӧс колӧ велӧтны, конечно, не грубӧя, не лӧга, но чорыта. Эз кӧ пет кывбурыс, колӧ висьтавны: одзӧв эшӧ печатайтны, колӧ уджалыштны.


Öтік кылӧн – гижны кывбуррез – ӧддьӧн серьёзнӧй удж, сідз кыдз мортыс гижис не только ас пондасис, аслас лов понда, аслас сьӧлӧм понда, но и отир понда.
- Кыдз Тійӧ думайтат, мыля ӧні етша ыджыт проза – повесттез, романнэз? Не сійӧн ли, что стимул абу? Ыджыт проза понда колӧ уна кад — повесть или роман вылын колӧ пукавны да пукавны, поди джын год, поди годдэз, а вештӧм… Кӧркӧся кад сьӧрті, повесть понда вештасӧ кыдз рассказ-мӧд понда, а роман понда – кыдз повесть понда.
— Сія умӧль, что том прозаиккез, кӧдна бы висьталісӧ мыйкӧ интереснӧйӧ, бурӧ, нето лыддьӧтісь понда мыйкӧ нач вильӧ, позьӧ шуны, абуӧсь. Том гижиссез оз радейтӧ проза. Мыля прозаыс абу? Сэтӧн, натьтӧ, и мийӧ мымдакӧ виноватӧсь – кытӧнкӧ син вылісь лэдзим. Кыдз вӧлӧс лэдзим лудовка вылӧ, ась пӧ ачыс йырсьӧ, ми сійӧ ог пондӧ вердны. Эд литература зорӧтан визьлӧ колӧ кыссьыны, нюжавны орӧттӧг, а мийӧ сійӧ, тыдалӧ, кытӧнкӧ орӧтім.
А мый висьтавны стимул йылісь… Эта йылісь гижисьлӧ колӧ думайтны медбӧрын. Ежели гижисьлӧн эм бичирок, мог, эм тема, колӧ гижны. Поди ме сэтӧн и не прав, ӧні баитӧны — быд удж понда пӧ колӧ бура вештыны. Но эд медбы бура вештыны, сэк колӧ бура и гижны. Мийӧ эшӧ эг висьталӧ кыв талант. Сэк колӧ гижны талантливӧя.
Но сы вылын, что проза абу, колӧ уджавны, колӧ сэтчӧ велӧтны. Шуат тай, уджыс керсьӧ, чулӧтӧны конкурссэз, семинаррез, но эта етшаӧв. Быд гижиськӧт колӧ занимайтчыны персонально, пантасьлыны сыкӧт, бӧрйыны сыкӧт ӧтлаын сылісь гижӧттэз.
- Василий Васильевич, гижны велӧтчӧм йылісь басниыс корӧ вуджны мӧдік, ӧддьӧн колана, басни дорӧ — гижӧмын профессионализм йылісь. Кӧр ме вӧлі томыник гижись, менӧ садь быртӧдз повзьӧтлісӧ кыввез «профессиональнӧй гижись», «профессиональнӧй литература». Ме эг тӧд, мый сія сэтшӧмыс. Кажитчис – этӧ мыйкӧ вӧвлытӧм, судзӧттӧм. Горӧтчасӧкӧ кытӧнкӧ, Кудымкарас ли, Перемын ли, семинаррез вылын, и вывтам бытьтӧ кӧдзыт ва кисьтасӧ: вермасӧ я ме йылісь кӧркӧ висьтавны профессиональнӧй гижись пӧ сія, гижӧ профессиональнӧя? А мый тійӧ думайтат литератураын профессионализм йылісь?
— Ме бы вайӧті сэтшӧм пример. Кузнец кузницаын дорӧ бытшӧм предметтэз: чер, пурт, пыжьян да эшӧ берсясӧ. Сія профессионал, велӧтчӧм уна год. Сылӧн эта уджыс петӧ бытьтӧ ачыс, кузнецыс только лӧсьӧтыштлӧ. Профессиональнӧй гижисьлӧн мыйкӧ сэтшӧм жӧ эм. Шедіс кӧ тема, сія оз ни вермы лӧньсьыны, медбы не думайтны сы вылын. Кӧть керӧ кытшӧмкӧ мӧдік удж, кӧть пуксьӧ сёйны, кӧть водӧ узьны – юрас пыр эта темаыс бергалӧ.
Томмез – эшӧ не профессионаллэз. Но кӧлӧ томсянь думайтны эта йылісь. Мый колӧ, мед лоны профессионалӧн? Ӧткӧ, бура тӧдны, мый йылісь тэ гижан. Унаӧн гижӧны Парма йылісь. Гижан кӧ тэ Парма йылісь, дак колӧ тӧдны, мый сія тэ понда. Мый сетӧ, мыля донтам-гордитчам, мыйӧн сія мӧдкодь Марийскӧй нето Мордовскӧй муэзся. Колӧ адззыны сэтшӧм тусёк, кӧда бы мыччаліс, что этӧ именно Парма. Мӧдкӧ, поэзияын колӧ тӧдны стихосложеннё теория, рифма, размер. Кӧлӧ бӧрйыны интереснӧй тема – интереснӧй ас пондасит и лыддьӧтісь понда. Куимӧткӧ, бура тӧдны кыв, кӧда вылын гижан. И медодз, колӧ аслат желаннё лоны профессионалӧн. Ыджыт гижисьыс пыр профессионал.
- Сідзкӧ, профессионализм Тійӧ вежӧртат кыдз кужӧм, вылын мастрество. Словаррез жӧ сетӧны и мӧдік вежӧртас — профессиональнӧй — этӧ сія, мый лоис профессияӧн, уджӧн. Но эта йылісь мийӧ етша думайтам, и литература зорӧтӧм понда сія ӧддьӧн умӧль. Поди, эстӧн вермис бы отсавны гижиссезлӧн чукӧр. Кыдз думайтат, гижиссезлӧн ӧтувтчӧм – литобьединеннё или организация – мый сія сетӧ аслыныс гижиссезлӧ и быдсӧн литературалӧ?
— Вот, шуам, уджаліссезлӧн эм аслыныс ӧтувтчӧм – профсоюзнӧй организация. А литобьединеннё – этӧ гижиссезлӧн профсоюз. Ежелирабочӧйез босьтӧны бы кытшӧмкӧ отсӧт, дак и гижиссез асланыс организацияись босьтӧны бы отсӧт. И юралісьлӧ пыр колӧ видзны этӧ юрын. Мӧдладорсяняс, аслыныс гижиссезлӧ колӧ кошшыны юраліськӧт йитӧтсӧ. И нысянь уна зависитӧ, лоасӧ я нія профессионаллэзнас. Могыс эта уджлӧн ӧтік — медбы зорамис коми-пермяцкӧй литература. Эд сувтчас кӧ эта процессыс – литература зоралӧмыс – отир ӧштас ӧддьӧн уна. Эд литератураыс — миян духовнӧй богатство.

Источник

Категория: Литературная страница | Добавил: Библиотека (02.11.2015) | Автор: Библиотека
Просмотров: 142 | Теги: Коми-Пермяцкий округ, Климов Василий Васильевич, Косова Л, коми-пермяцкая литература, стихи, Коми-Пермяцкая библиотека, проза, коми-пермяцкий писатель | Рейтинг: 5.0/1
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]