Главная » 2021 » Февраль » 10 » Коми кылӧн югдӧтӧм туй
12:40
Коми кылӧн югдӧтӧм туй

Округлӧн чулалӧм да ӧння историческӧй кад вылӧ дзарьялⅰкӧ казяссьӧ да лоӧ вежӧртанаӧн национальнӧй делолӧн зоралӧм да быдмӧм. Ачыс книга печатайтан процессыс Европаын кыссьӧ ни вит век гӧгӧр. Коми-пермяцкӧй кыв вылын книга лэдзӧмлӧн аслас историческӧй кад, а эта кадлӧн лыдыс локтӧ дзир век дынӧ.

Чулалӧм веклӧн кыкдасӧт годдэз помын да куимдасӧт годдэз пондӧтчикӧ округын издательстволӧ да полиграфическӧй базалӧ лоны вӧлⅰ вӧвлытӧм сьӧкыт. Эз вӧлӧ колана кадррез, книгаэз печатайтӧм понда полиграфическӧй оборудованнё (нельки эз вӧлӧ национальнӧй букваэза шрифттэз), эз вӧлӧ колананёж лӧсьӧтӧм-аркмӧтӧм коми кыв вылын гижӧм понда орфографическӧй правилоэз, эз вӧв зорӧтӧм эшӧ устойчивӧй литературнӧй норма. Кӧть газета лэдзӧм понда типография сёжӧ вӧлⅰ аркмӧтӧм 1926 годӧ, а велӧтӧм понда книгаэз сы коста сё эшӧ печатайтчисӧ Москваись Центральнӧй издательстволӧн коми-пермяцкӧй секцияын.

Кадын видзсисӧ миян понда медодзза энтузиасттэзлӧн да патриоттэзлӧн ниммез, киннэз керисӧ быдлунся сьӧкыт да ответственнӧй удж редакторрезлсь да корректоррезлсь. Ны колассь дырӧн уджалⅰсӧ А. М. Спорова, З. А. Тетюева, Ф. С. Яркова да мӧдⅰккез. Зинаида Александровна Тетюева 1932 годӧ вӧлⅰ иньдӧтӧм Москваись национальнӧй литература лэдзӧм сьӧртⅰ издательствоӧ, мед уджавны коми кыв вылын учебниккез печать кежӧ лӧсьӧтӧм сьӧртⅰ. 1939 годӧ сⅰя бертⅰс Кудымкарӧ велӧтӧм да опытнӧй специалистӧн. Пондⅰс уджавны Коми-Пермяцкӧй книжнӧй издательствоын, кытӧн ассис уджсӧ керис 1964 годӧдз, а сыбӧрын пенсия петӧм вотӧдз уджалⅰс корректорӧн Кудымкарскӧй типографияын. Сⅰдз, коми-пермяцкӧй кывлӧ, литературалӧ вӧлⅰ сетӧм оланⅰсь 35 год. Зинаида Александровнакӧт ӧткоста уджалⅰсь морттэз донтӧны сылⅰсь техническӧй да заказнӧй литература сьӧртⅰ редакторлⅰсь, корректорлⅰсь да роч кыв вылⅰсь коми кыв вылӧ вуджӧтⅰсьлⅰсь удж. Сⅰя пыдына тӧдⅰс коми кыв, а сⅰдзжӧ сылӧн вӧлⅰ бытшӧм опыт роч кыв тӧдӧмын, кӧдӧ сⅰя ӧктⅰс Москваын уджалⅰкӧ. Сⅰя вуджӧтлⅰс учебниккез понда рассказзэз. Сⅰдз вӧлⅰ вуджӧтӧм Виктор Астафьевлӧн (а сэк гижись олⅰс Перемын) висьт «Васюткино озеро».

Гижись Василий Климов ештⅰс уджавны ӧтⅰк кадӧ Зинаида Александровнакӧт. Сⅰя касьтывлӧ бур кылӧн редакторсӧ кыдз принципиальнӧй да делолӧ преданнӧй специалистӧс. А композитор Александр Клещин ошкис эта мортлⅰсь голос, дивуйтчис коми-пермяцкӧй сьыланкыввез тӧдӧмӧн, сы аскодьӧм сьылан манераӧн Сы сьылӧм сьӧртⅰ композитор гижлⅰс народнӧй сьыланкыввезлⅰсь мелодияэз, кӧдна бӧртⅰжык вӧлⅰсӧ печатайтӧмӧсь сборникын «Коми-пермяцкӧй народнӧй сьыланкывввез». Композитор лыддис сⅰйӧ коми отирлӧн медбытшӧм нылӧн сьылан мастерствоын.

2012 годся октябрь 16 лунӧ З. А. Тетюевалӧ тырис чужан лунсянь 100 год. Кадыс оз сувтчыв аслас мунӧмын. Сы кыссьӧмын мыччисьӧны виль делоэз, морттэз. А нⅰя, кин вӧлⅰ одзын мунⅰсьӧн да керис вӧвлытӧм удж локтⅰсь поколеннёэз понда, вешшӧны-пырӧны историяӧ. И дзир уна учебниккез да художественнӧй литература лоӧны ловья свидетеллезӧн ас аркмӧманыс. Нⅰя, книгаэс – сы уджлӧ памятниккез, сⅰдз кыдз нимыс сылӧн гижӧм сы кадся быд книгалӧн, рочӧн сⅰдз шуана, «выходнӧй даннӧйезын». А ачыс сэкся литератураыс – донася-дона опыт ны понда, кин уджалⅰс и уджалӧ, одзлань нуӧтӧ-керӧ национальнӧй книгаэз понда лэдзӧм сьӧртⅰ удж.

Л. П. Ратегова

Парма ру = Дыхание Пармы. – 2012. – декабрь (№ 2). – С. 8.

Прикрепления: Картинка 1
Просмотров: 95 | Добавил: Библиотека | Теги: краеведческие книги, коми-пермяцкая литература, книгоиздание, Коми-Пермяцкая библиотека, Пермский край, редакторы книг, Коми-Пермяцкий округ, Коми-Пермяцкое книжное издательство, коми-пермяцкие книги, корректоры книг, Зинаида Александровна Тетюева, авторы книг, Коми-пермяцкӧй кыв, Кудымкар | Рейтинг: 5.0/1
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]