КОМИ-ПЕРМЯЦКАЯ НАЦИОНАЛЬНАЯ БИБЛИОТЕКА им. М.П. Лихачёва

В Министерстве награждены лауреаты литературных премий: информация на русском языке

Декабрь 12 лунö Коми-Пермяцкöй делоэз сьöрті Министерствоын чулаліс «Церемония вручения премий в области литературы за 2013 год».

М. Лихачев нима да А. Зубов нима литературнöй премияэз вылö таво номинируйтчисö 5 гижись: Семён Алексеевич Федосеев «Оланыс сералö» небöгöн, Василий Васильевич Козлов «Горт менам ойвывся» кывбурчукöрöн, Василий Васильевич Климов «Пешнигортлöн бöдвапöв» небöгöн, Михаил Егорович Мартынов «Преданье старины глубокой» небöгöн, Косова Любовь Афонасьевна «Вильгодся дивоэз» небöгöн. Премия вылö сiдзжö вöлiсö номинируйтöм книжка-малышкаэзлöн роч да коми-пермяцкöй кыввез вылын серия («Пармалöн серрез», «Öтöрлöн гаж», «Дзоридзок»).

Уджалан литературнöй комиссияöн вöлі примитöм решеннё, мый колö сетны А. Зубов нима литературнöй премия Василий Васильевич Козловлö «Горт менам ойвывся» кывбурчукöр понда, а М. Лихачев нима литературнöй премия – Семён Алексеевич Федосеевлö «Оланыс сералö» небöг понда.

Коми-Пермяцкöй округлöн юралісь Виктор Рычков виль лауреаттэзлö висьталіс шоныт кыввез, туйдöтіс одзланься творчество вылö. Сы киэзісь Семён Алексеевич да  Василий Васильевич босьтісö дипломмез да букеттэз.

Министерствоö вежалуналöм понда öксьывлісö уна отир: окружнöй да Белоевскöй библиотекаэзiсь уджаліссез; педагогическöй колледжлöн, 3 номера школа-гимназиялöн да Кудымкарись образованнё сьöрті управленнёлöн юраліссез; Коми-Пермяцкöй этнокультурнöй центрись да Косаись образованнё сьöрті управленнёись уджаліссез; Коми-Пермяцкöй литературнöй объединеннёлöн председатель, гижиссез да журналисттэз; литературнöй комиссияись членнэз.

Архангельскöй школаись коми-пермяцкöй кыв да литература сьöрті велöтісь Селина Людмила Ивановна висьтасис гöссеслö ассис  кывбур:

      Кöр мортыс дорйö вывтырнас мам кыв,

      Мыччалö сылісь ассямасö бура,

      Дзир сэк лэбалö кылыс, топ бабыв,

      И сэк оз кус чужан литература!

      Кöр мортыс кывлісь донтö быд ладор,

      Паськöтö сылісь сöстöм, югыт, ота,

      Дзир сэк тöдмалам кывлісь öд да гор

      И сэк сьöлöмным радсянь миян потö!

      Кöр мортыс кылö пуктö ассис лов,

      Югдöтö сылісь пытшксö шынь-серöмöн,

      Дзир сэк вежöртам: уна оз и ков,

      Свиттялiс бы мам кывным быдкодь рöмöн!

Чужöм строчкаэз быдöс гöссезлісь вöрзьöтісö сьöлöммез, тшöктісö эшö öтпыр вежöртны, мый кывбургижиссез, гижиссез, «мастера художественного слова» кужöны, вермöны сетны öд мам кыв да культура пессьöм понда.

           Колö содтыны, мый отсаліс чулöтны этö церемониясö Коми-Пермяцкöй этнокультурнöй центр.

Источник: http://www.minkpo.permkrai.ru/node/2039

Новости на коми-пермяцком языке